Read Banggai YOHANES 2 Bible Online

YOHANES 2 - Banggai bible

YOHANES 2

¹Lua kopopook koidan daano kolamean osowaanan doi kota Kana doi Galilea, tukon Yesus tinano daano idoo.

²Yesus tukon Napololaing-pololaing inuang doi lameanoo.

³Sambuno kosuka kabuso, kotinano bantile doi Yesus, “Yanila kobuso kona suka.”

⁴Yesus timbiliyo, “Tina inai mosumboliiyo Yaku. Akiyoon napolong kotempono Yaku mookitakene kobutonggu.”

⁵Bai Yesus tinano bontiikene kolombonua, “Pokubaiyomo indee kona binantil doi komuyu.”

⁶Idoo daano noom kogumbang mo inabos sulano komian nabakumosi loloiyo koadat Yahudi miano. Do gumbangoo koantoko meeng-meeng uga-ugaatene sakat koliter.

⁷Yesus bontiikene doi lombonua-lombonuadoo, “Poontokiyo do gumbang-gumbangoo tukon paisu.” Yanila ontokiyo polong moono.

⁸Maka Yesus bantile doi yanila, “Diabudodoo mangala paisudoo soisik tukon babakene doi mokatuaiyo lameanoo.” Yanila babayomo paisudoo doi mokatuaiyo kolamean,

⁹tukon yana tamise dopaisudoo mo tealimo suka. (Yana aki natoiyo doiyaa do sukadoo tolongo nalombonua mobatune do paisudoo komo toiyo.) Maka mokatuaiyo lameanoo koolaniyo babaabudoo malane,

¹⁰maka nabantile doi yana, “Sidutu komian tabayo kona suka mo monondok tuuno loolukon tukon kalu komian molubat lungguwono momonginum, maka nasodo kosuka mo meele. Bai Utus mangabos suka mo monondok tuuno polong budodoiya!”

¹¹Doiyamo komo minasaindinggon tumbeno Yesus nakinubai. Yana kubaiyo doiya doi Kana doi Galilea. Tukon nakokubaidoo Yana okitakene Kona babasalan. Maka Napololaing-pololaing anggayomo Yana.

¹² Sambuno lapa doiya Yesus ampakono doi Kapernaum polaing-laing tukon tinano, utus-utuso tukon pololaing-pololaingoo. Yanila dungol indaa moimoiya kooloyo kona kalumbit.

¹³ Sambuno Oloyo Babasal Paskah Yahudi lolanimo, Yesus ampakono doi Yerusalem.

¹⁴Temeneno Na Bonua doi Yerusalem Yesus laate komian momabalukon saapi, domba, tukon tomisi lapatiing; tukon mian paisoboli doy osulang idoo.

¹⁵Yesus mangala meeng koalos pongumbas maka siikayo sasaibino do iyayonoo, mau domba tukon saapi, doi Temeneno Na Bonua lalomo. Domianoo mo paisoboli doy nameja-meja Yana anggalaupe tukon kona podoy tasabukon doi yayaa.

¹⁶Maka Yana bantil doi mianoo momabalukon tomisi lapatiing, “Bingkate sasaibino naimbaa. Inai potealikene ko Tamanggu Na Bonua pobolukiyan!”

¹⁷ Maka Napololaing-pololaing neneeke naikon koayat Kitab Moliyous nia, “Daku seang motuuk doi Mu Bonua, oh Mian Bisa, suayo konoang-Ku.”

¹⁸Pamarenta Yahudi miano apese Yesus, yanila bantile, “Coba kubaiyo Mukuasa moinaanggon motokita doi kami baikon Ikoo daano Mu haak mokubaiyo buno doiya.”

¹⁹ Yesus timbiliyo, “Polopoyomo na Bonua nia tukon tempo tolu kooloyo Yaku kekendengemo koikoidan.”

²⁰Maka yanila bantile, “Sangkap kolono noom kotaun kona binangunan Temeneno Na Bonua nia, tukon Ikoo kuwotiyo kekendenge koidan tolongo tolu kooloyo?”

²¹Bai Temenenodoo Na Bonua Yesus naminakisuutoo doiya butongo susuungo.

²²Sambuno lapa doibundu, Yesus inotuboimo doi namatean, Kona pololaing neneekemo baikon do langgedoo lapamo Yana bantile. Jadi yanila anggayomo indee komo totulis doi Kitab Moliyous lalomo tukon indee komo lapamo Yesus bantile.

²³Yesus daano doi Yerusalem doi tempo Lamekanano ko Paskah, badaang komian momaangga doi Yana sabab minasaindinggon Yana nakinubai.

²⁴Bai Yesus susuungo aki naanggayo yanila sabab Yana ontingoniiyo komian sasaibino.

²⁵Aki napalaluu mian mebee katalangan doi Yana kaliangano indemo, sabab Yana susuungo toiyo oila komo daano doi banggapi noano lalomo.