Read Banggai YOHANES 20 Bible Online

YOHANES 20 - Banggai bible

YOHANES 20

¹Doi minggu oloyono dowa-dowa, daano mokalipookan, Maria Magdalena ampakon doi kibuloo. Yana kitayo kobatu posunggupo lapamo sinaakon doi kibuloo buango.

²Maka yana obulen umboliiyo Simon Petrus tukon pololaing Yesus mo seseange, tukon bantile doi yanila, “Yesus ndinikuko doi nakibul, tukon yaku aki kutoiyo inaando kona inabosan.”

³Maka Petrus tukon pololaingoo bailon ampakono doi kibuloo.

⁴Luaila yanila obulen, bai doi pololaingoo bailon lobian kona suutanan tukon Petrus, tukon yana komo polong tumbe doi kibuloo.

⁵Yana mbalenge do kibuloo lalomo tukon kitayo dotoikoo pabalun daano motangabos idoo, bai Yana aki nausok.

⁶Simon Petrus tuundu doibundu, maka banggadudul usok doi kibuloo lalomo. Yana kitayo do toikoo pabalun daano motangabos idoo,

⁷bai kotoik mo kinubai papagot Yesus oluno akiyono doi napokolanikonan bai toluluko tangalaas.

⁸Doibundu koidan dona pololaing mo polong tumbe doi kibuloo, usoko koidan. Yana kitayomo tukon anggayomo. (

⁹Polong doiya kotempono yanila akiyoon naalatiyo oila komo totulis doi Kitab Moliyous lalomo baikon Yesus tubo doi namatean.)

¹⁰Sambuno lapa doiya Yesus napololaing-pololaing mulemo.

¹¹Maria Magdalena kokondong doi kibuloo salaano tukon kokiil. Daano yana mokokiil, yana kitayo dokibuloo lalomo,

¹²maka yana kitayo lua komalaekat kona pakean moute. Malaekatoo osulang doi Yesus bajano nainabosan, komeeng doi oluno talikon, tukon kobailon doi aino talikon.

¹³Malaekat-malaekatoo mansadai, “Tina, bulaando ikoo mokokiil?” Maria timbiliyo, “Daku Temeneno lapamo inala, tukon yaku aki kutoiyo inaando Yana kona inabosan.”

¹⁴Lapa bantile buno doiya, yana mbaleng doi tonggulungo tukon kitayo Yesus daano mokokondong idoo. Bai yana aki natoiyo baikon doiya Yesus.

¹⁵Yesus mansadai doi yana, “Tina, bulaandokon ikoo mokokiil? Tina indee komu inumbal?” Maria aanggene doiya do asidoo tumbuno, jadi yana bantile, “Tama, kalu Tama komo biyele Yana bajano naimbaa, tulung bontiikanaku inaando Tama naabosano Yana, sulano yaku moola kundokiiyo.”

¹⁶Yesus bantile doi yana, “Maria!” Maria mbalenge doi Yesus maka bantil tukon silingan Ibrani, “Rabuni!” (Koalatino “Guru”.)

¹⁷“Inai motaaniyo Yaku,” Yesus bantile doi yana, “sabab Yaku akiyoon kuliba doi Tama. Bai potauso doi utus-utusong-Ku, tukon bontiikene doi yanila baikon diabudodoo Yaku libamo doi Tamang-Ku tukon Tamamu, Ku Mian Bisa tukon mu Mian Bisa.”

¹⁸Maka Maria ampakono babotilanggene doi Yesus napololaing-pololaing baikon yana lapamo kitayo ko Temeneno tukon baikon Temeneno lapamo bontiikene sasaibinodoo doi yana.

¹⁹Doi Minggudoo oloyono koidan, sambuno kalipookan Yesus napololaing-pololaing pototongimo doi meeng kobonua tukon tataapon-tataapon mo tinataapikono, sabab yanila matakutene kopamarenta Yahudi. Sosinggot Yesus lubat maka kokondong doi yanila tanga-tangano tukon bantile, “Kinatauwan monondok doi komuyu.”

²⁰Lapa Yana bantile buno doiya, Yana tudoikene doi yanila kolimano tukon lisuko. Sambuno yanila kitayo Yesus, yanila laba-laba tuuno.

²¹Maka Yesus bantile doi yanila idan koidan, “Kinatauwan monondok doi komuyu. Buno Tamang-Ku bintekene Yaku, bunomo lakon Yaku bintekene komuyu.”

²²Maka Yana puulikene kona ansaang doi yanila tukon bantile, “Talimayo ko Mian Bisa Na Roh.

²³ Kalu komuyu ompuniyo kopau meeng nalalim, Mian Bisa koidan ompuniyo. Kalu komuyu aki poompuniyo kopau meeng nalalim, maka Mian Bisa koidan aki naompuniyo.”

²⁴Tomas (mo sinombuikon “Pinga”), meeng komian doi songulo luadoo Yesus napololaing, aki napolaing tukon bailon singgatoo Yesus nalubatan.

²⁵Maka Yesus napololaing-pololaing bailon bantile doi Tomas, “Kami lapamo kitayo Yesus!” Bai Tomas timbiliyo, “Kalu yaku akiyoon kumongkita kopaku bakaaso doi lima-No, akiyoon kuusekene kolimanggu saano doi pakudoo pakolo tukon akiyoon kuusekene kolimanggu doi Nalisuko, tutuu yaku akiyoon kumangangga.”

²⁶Meeng kominggu molapa Yesus napololaing-pololaing daano doi bonuadoo tukon Tomas daanomo koidan. Sasaibino kotataapon tinataapikono. Bai Yesus lubat tukon kokondong doi yanila tanga-tangano, maka bantile, “Kinatauwan monondok doi komuyu.”

²⁷Doibundu Yana bantile doi Tomas, “Kitayo kolimang-Ku, tukon usekene kolimamu saano dimbaa. Ulule kolimamu tukon usekene doi lisukong-Ku. Inaimo mosasaaki koidan, bai anggayomo!”

²⁸Tomas bantile doi Yesus, “Ku Temeneno, tukon ku Mian Bisa!”

²⁹Maka Yesus bantil doi yana, “Ikoo mangangga sabab lapamo kitayo Yaku, kai bulaa? Kinatauwan doi mian mo mangangga mau naaki nakitayo Yaku!”

³⁰Daano mobadaang koidan komo minasaindinggon-minasaindinggon Yesus mo kubaiyo doi Napololaing-pololaing salaano, bai aki natinulis nai buku nia.

³¹Bai sasaibino naiya tinulis, sulano komuyu anggayo baikon Yesus daano Tomundo Pasalamat, Mian Bisa Napau, tukon sabab mangangga doi Yana, komuyu malaat tuboan.