Read Banggai YOHANES 21 Bible Online

YOHANES 21 - Banggai bible

YOHANES 21

¹Lapa doiya Yesus okitakene kobutongo idan koidan doi Danau Tiberias doi Napololaing-pololaing. Buno naiya kona tealian:

²Daano kooloyo meeng Simon Petrus, Tomas mo sinombuikon Pinga, Natanael doi Kana luwedoi Galilea, Zebedeus napau-pau, tukon lua Yesus napololaing bailon, daano mopototongi.

³ Simon Petrus bantil doi tulano bailon, “Yaku yase ampakon bapukat ikan.” “Kami malaing,” yanila bantil doi yana. Maka yanila taus lakit duangan. Bai doi popooko mau meeng koikan yanila aki namatapu.

⁴Sambuno tambuun sumbot kooloyo, Yesus kokondong doi paisudoo bibilo, bai yanila aki natingoniiyo baino Yesus.

⁵Yesus bantil doi yanila, “Labuk-labuk kai komuyu daano kopo ikan?” “Akiyo,” yanila timbiliyo.

⁶ Yesus bantil doi yanila, “Poaisene kopoo buani taalikon bakalinga doi duanganokon, idoo komuyu matapu ikan.” Maka yanila sakukene donapo buani, bai yanila aki nanggoola bubute koidan sabab badaang koikan mokana doi buanidoo lalomo.

⁷Pololaing Yesus mo mamaasikene bantil doi Petrus, “Ndaiya Temeneno!” Sambuno Simon Petrus ndongoliiyo doiya baino Temeneno, yana pakeyo kona kalambi (sabab yana aki nabakalambi) maka yana basuapon doi paisu.

⁸Pololaing-pololaing bailon tuundu babose tukon duangan ampakon doi buta tina, tukon yanila bubute momeeng konapo buani mo moono ikan. Yanila aki natodudul dodoon doi buta tina, uga-ugaate tolongo sakat kometer.

⁹Singgatoo yanila loboson doi duangan yanila kitayo daano koaung balano indaa tukon ikan doi bungkukono tukon roti.

¹⁰Yesus bantil doi yanila, “Soba babayo doi sumai bubula koikan mo sodo komuyu tapuwe.”

¹¹Simon Petrus lakit doi duangan, maka kedele kona buani doi buta tina. Dona buani moono tukon ikan mo babasal; sasaibino sakat lima kolono tolu kona kadaang. Mau nabuno doiya kona kadaang aki namosiak konapoo buani.

¹²Yesus bantil doi yanila, “Mai nda kaan.” Akiyo komeeng doi Napololaing-pololaing mobarani mansadai, “Tama indee miano?” sabab yanila toiyo baikon Yana Temeneno.

¹³Doibundu Yesus koolaniyo yanila, mangala do rotidoo tukon bekene doi yanila. Yana kubaiyo buno doiya tukon ikanoo.

¹⁴Naiyamo kotoluno luunggon Yesus naokitakanano kobutongo doi Napololaing-pololaing sambuno Yana tubo doi namatean.

¹⁵Sambuno lapa yanila kaan, Yesus bantil doi Simon Petrus, “Simon, Yona napau, kai ikoo lobian komu seangano Yaku doi yanila nia naseangano Yaku?” “Bisa, Temeneno,” Petrus timbiliyo, “Temeneno toiyo yaku kilakene Temeneno.” Yesus bantil doi yana, “Pialao Kudomba-domba pauno.”

¹⁶Tuuk lua luunggon Yesus sadaiyo doi yana, “Simon Yona napau, kai ikoo seseanga-Ku?” “Bisa, Yesus,” Petrus timbiliyo, “Yesus toiyo yaku kilakene Yesus.” Yesus bantile doi yana, “Pialao Kudomba-domba.”

¹⁷Tuuk kotoluno luunggon Yesus mansadai doi yana, “Simon Yona napau, kai ikoo kilakene Yaku?” Petrus teali poloon sabab Yesus sadaiyo doi yana polong tolu luunggon. Maka Petrus timbiliyo koidan, “Temeneno, Temeneno toiyo sasaibino kolangge. Temeneno toiyo yaku kilakene ko Temeneno!” Maka Yesus bantil doi yana, “Pialao Kudomba-domba.

¹⁸Bisa tuuno Kubantilan nia: Singgatoo ikoo daanoon motabokon, ikoo susuumu pagete kooakomu, tukon muampakon doiyaamo komu mongiasan. Bai kalu ikoo motuwamu naikon, ikoo baino ulule kolimamu, tukon baino mian bailon komo pagete ikoo tukon babayo ikoo doi lipu moaki muyase ampakon.” (

¹⁹Tukon Yesus nabantilan-bantilanoo otudoikene bulaando naikon Petrus namatean sulano naakabasale ko Mian Bisa.) Lapa doiya Yesus bantil doi Petrus, “Lainge Yaku!”

²⁰ Tempodoo Petrus mbaleng, yana kitayo doi tonggulungo daano Yesus napololaing bailon mo minamaasikon. (Yanamo komo osulang pokoolanikon Yesus tempodoo napoo kaanan tukon mo mansadai doi Yana, “Yesus, indee miano komo kulokisanggene ko Temeneno?”)

²¹Kitayo yana, Petrus mansadai doi Yesus, “Yesus, bulaando tukon yana nia?”

²²Yesus timbiliyo, “Andeno Yaku yase yana daanoon motubo polong Kulubatan, doiya bolikon muulusan. Bai ikoo, lainga-Ku!”

²³Maka tololongolo kobulitano doi Yesus napololaing Yesus baikon napololaingoo aki namate. Banggokai Yesus aki nabantile, baikon pololaingoo aki naikon namate, bai: “Andeno Yaku yase yana daano motubo polong Kulubatan, doiya bolikon muulusan.”

²⁴Dopololaingoo komo mebee katalangan doi kadadian-kadadianoo naiya. Yanamo koidan komo lapamo tulise. Tukon kita toiyo oila Kona binantiloo bisa.

²⁵Daano mobadaang kolangge bailon Yesus mo kubaiyo. Andeno sasaibinodoo tinulis meeng tukon meeng, yaku lasayo aki nasukup kolipu doi dunia nia sulano nainusokon sasaibino kobuku mo tinulisoo.