Read Banggai YOHANES 3 Bible Online

YOHANES 3 - Banggai bible

YOHANES 3

¹Daano komeeng komian balakaikene koagama doi Parisi miano kosambuno Nikodemus.

²Daano kopopook meeng yana lubat doi Yesus tukon bantil, “Tama Guru, kami toiyo Tama Mian Bisa nasosumbolii. Sabab akiyo komeeng komian monggoola mongkubai langge meeng mososibong mo buno Tama nakinubai, kalu Mian Bisa aki nalolainge Yana.”

³Yesus timbiliyo, “Poanggayomo, akiyo komeeng komian moteali Mian Bisa namian, kalu yana aki nasinuung koikoidan.”

⁴“Bulaando komian mobabasalo monggoola kai sinuung koidan,” Nikodemus bantile doi Yesus, “Moola kai yana usok koikoidan doi tinano tiano lalomo maka nasinuung koidan?”

⁵Yesus timbiliyo, “Bisa tuuno Kubantilan nia: kalu mian aki nasinuung tukon paisu tukon Mian Bisa Na Roh, do mianoo aki nateali Mian Bisa namian.

⁶Kobanggapi motubo doi dunia sinuung tukon doi tama-tinanggita, bai kalu doi cara rohani kita sosuung tukon Mian Bisa Na Roh.

⁷Inai masaingding kalu Yaku bantile: komuyu sasaibino sio posinuung koidan.

⁸Kombombuul napuul inaando kona mongiasan; kita lengele kona lalo, bai aki nda toiyo kona lubatan tukon inaando kona tausan. Bunomo lakon doiya tukon mian mo sinuung tukon Mian Bisa Na Roh.”

⁹“Bulaando doiya nggoola nateali?” Nikodemus mansadai.

¹⁰Yesus timbiliyo, “Ikoo guru doi Israel; bulaando ikoo aki mutoiyo?

¹¹Anggayomo: Kami basilingan tolongo oila kaliangano Kami mo toiyo, tukon Kami mebee bantilan tolongo oila komo lapamo Kami kitayo; bai komuyu aki poyase talimayo Komai bantilan.

¹²Komuyu aki poanggayo kalu Yaku basalitakene doi komuyu kolangge-langge nai dunia nia; bulaando komuyu monggoola anggayo, kalu Yaku basalitakene doi komuyu kolangge-langge doi surgaa?

¹³Akiyo komeeng komian monggoola liba doi surgaa, tolongo Yana mo obuluso doi dunia, doiyamo Manusia na Pau.

¹⁴ Bunomo pokakana Musa molibakene kobinda tambaga doi meeng kokayung batango doi padang lalomo, bunomo lakon doiya Manusia na Pau sio nalinibakon,

¹⁵sulano sasaibino komian mo maangga doi Yana malaat tuboan mobisa tukon posidutukon.”

¹⁶Tobikon Mian Bisa namamaasikanano kobanggapi nai dunia nia, tobikon Yana beekene Kona Pau mo meeng sulano doi inde-indee komiano komaangga doi Yana aki nasilaka, bai malaat tuboan mobisa tukon posidutukon.

¹⁷Mangaani Mian Bisa kapatuwo Kona Pau bolikon sulano naukume kodunia nia, bai sulano nasalamatene.

¹⁸Mian mo anggayo doi Yana aki nainukum, bai mian mo aki namaangga lapamo Mian Bisa ukume, sabab yana aki naanggayo ko Mian Bisa na Pau mo meeng.

¹⁹Yana tinuntut luwedoi langge nia: Madialanoo lapamo lubat doi dunia, bai kobanggapi tolongo yase kokalipookan maka baino doi madialan, sabab yanila nakokubai lokis.

²⁰Doi memeeng komian mo mongkubai lokis, mosikitene komadialan; yana aki nayase lubat doi namadialanan, sulano kona kokubai mo lokis aki natotingonii.

²¹Bai komian mo loingiyo ko Mian Bisa namongiasan, lubat doi namadialanan sulano nateali tokita oila kona kinubaidoo doiya daano pokokonoi ko Mian Bisa namongiasan.

²²Sala buno doiya Yesus tukon Napololaing-pololaing ampakono doi Yudea. Yana dungol indaa moimoiya kotempo kona kalumbit tukon yanila mansau mian.

²³ Doiya kosinggatoo Yohanes akiyoon nausok doi talunggu. Yana mansau mian doi Ainon, aki namododoon doi Salim, sabab indaa daano mobadaang kopaisu. Mian-mian lubat doi yana, tukon yana sauwo yanila.

²⁵Moimoiya Yohanes napololaing tambuuno ponggeeleki tukon Yahudi miano naaturan tentang babilisiian butong.

²⁶Yanila ampakon doi Yohanes, tukon bantile, “Tama Guru, kai Tama daano moneneeke komian mo pololaing Tama doi Yordan Paisunobatango sembeleng, mo Tama otudoikene doi kami lolukonoo? Yana diabudodoo momansau mian koidan, tukon sasaibino komian ampakon doi Yana!”

²⁷Yohanes timbiliyo, “Kobanggapi aki namoola malaat langge-langge kalu Mian Bisa aki nabeekene doi Yana.

²⁸ Komuyu susuungo lapamo lengele yaku mobantile, ‘Yaku bolikon Tomundo Pasalamat. Yaku sinumbolii poloolukoni Yana.’

²⁹Babaabu boine daano babaabu malane koona. Babaabu malane nasobat tolongo kokondong nggaupe yana tukon mondongolii, tukon sanaang molongol babaabu malane nalalo. Bunomo koidan tukon yaku. Diabudodoo yaku sanaang tuuno.

³⁰Yanamo komo palaluu tuuno, tukon yaku kinduungo napalaluu.”

³¹Komo lubat doi babo liisiyo sasaibino. Komo lubat doi dunia tongusokon dunia miano, tukon basalita tolongo langge-langge doi dunia. Yana mo lubat doi babo liisiyo sasaibino.

³²Yana basalita tolongo langge mo lapamo kinita tukon Yana linongol, bai akiyo komeeng komian moanggayo Nabantilan.

³³Mian mo anggayo doi nabantilanoo, anggayo baikon ko Mian Bisa bisa.

³⁴Sabab komian Mian Bisa mo bintekene pelenggene ko Mian Bisa nabantilan-bantilan, sabab ko Mian Bisa Na Roh lapamo bineekon totubo doi Yana.

³⁵ Tama seange Kona Pau, tukon lapamo beekene sasaibino Kona kuasa doi Yana.

³⁶Mian mo maangga doi Yesus naikon yana malaat tuboan mobisa tukon posidutukon. Bai komian mo aki naloingiyo Yesus aki namalaat tuboan. Yana Mian Bisa ukume sidutu polong posidutukon.