Read Banggai YOHANES 4 Bible Online

YOHANES 4 - Banggai bible

YOHANES 4

¹Parisi mian-miano lengele baikon Yesus malaat tukon mansau mian lobian badaang pololaing tukon mololainge Yohanes. (

²Kona bisaan Yesus susuungo aki namansau mian tolongo Napololaing-pololaing.)

³Sambuno Yesus toiyo baikon ko Parisi mian-miano lapamo lengele do halloo, Yana ampakon doi Yudea abali doi Galilea.

⁴Doi naampakonan Yana sio naloloiyo ko Samaria.

⁵ Maka Yesus polongo doi meeng kokota doi Samaria kosambuno Sikhal, aki namododoon doi lipudoo lolukon Yakub mobeekene kona pau Yusuf.

⁶Idoo talaat Yakub nabubung. Yesus pakadak tuuno sabab naampakonan, tobikon doiya Yana osulang doi bubungoo bibilo. Doiya kosinggatoo ugaate batong songulo lua suun kooloyo,

⁷tukon Yesus napololaing-pololaing lapamo ampakon doi kota yanila mongoli kinaan. Boobus doiya meeng koboine Samaria lubat matambuk paisu. Yesus bantil doi yana, “Tina, momoola Kumangkabi monginum?”

⁸

⁹ Boinedoo Samaria timbiliyo, “Tuan Yahudi miano, yaku Samaria miano; bulaando Tuan mangkabi monginum paisu doi yaku?” (Sabab ko Yahudi miano akiyo kopotodulian tukon Samaria miano.)

¹⁰Yesus timbiliyo, “Kalu naikon ikoo toiyo ko Mian Bisa napebee tukon indee komo mangkabi monginum paisu doikoo, tantu ikoo susuumu mangkabi monginum paisu doi Yana, tukon Yana naikon beena ikoo paisu tuboan.”

¹¹Boinedoo bantile, “Tuan akiyo komu patambuk, naiya bubungia atean tuuno. Inaando Tuan komu malaatan paisu tuboan?

¹²Yakub, tamanggami natauwa, mobeekene kami nabubungia. Yana susuungo mangala napaisu ininum naimbaa; bunomo lakon kona labuk-labuk tukon naiyayon piniala. Kai Tuan aanggene Tuan lobian babasal tukon Yakub?”

¹³“Mian monginum napaisu nia yana molou koidan,” Yesus nabantilano,

¹⁴“bai komian mo monginum kopaisu naikon Yaku mobeekene, aki naikon namolou koidan sidutu-posidutukon. Sabab kopaisu Yaku naikon mobeekenedoo teali paisu matano doi butongo lalomo mo lomba sumbot tukon beena tuboan doi yana mobisa tukon posidutukon.”

¹⁵Boinedoo bantile, “Tuan, beena yaku paisudoo, sulano yaku akimo kumolou koidan; tukon akimo napalaluu kuabali naimbaa mangala paisu.”

¹⁶“Ampakono, uange komu langkai maka muabali naimbaa,” Yesus bantile.

¹⁷“Yaku akiyoon nadaano daku langkai,” boinedoo napotimbili. “Bisa kana komubantilan,” Yesus napotimban.

¹⁸“Sabab ikoo osowaano lima luunggon, tukon komalane mupodungolian bolikon mulangkai.”

¹⁹“Diabudodoo yaku toiyo Tuan meeng konabi,” boinedoo nabantilano.

²⁰“Komai tulunan sosubaiyo ko Mian Bisa nai bunggul nia, bai Tuan natulunan bantile baikon tolongo doi Yerusalem kolipu komian nasosubaiyano ko Mian Bisa.”

²¹“Anggayomo,” Yesus bantile doi yana, “meeng kotempo naikon komian sosubaiyo Tama, bolikono nai bunggul nia, tukon koidan bolikon doi Yerusalem.

²²Komuyu Samaria miano sosubaiyo kolobo mo aki potingoniiyo, bai kami Yahudi miano sosuba doi Yesus kami mo tingoniiyo, sabab kokasalamatan lubat doi Yahudi miano.

²³Bai kotempono naikon nalubatan, lapamo lubat, baikon tukon Mian Bisa Na Roh nakuasa kobanggapi naikon sosuba doi Tama doiyamo Mian Bisa mo bisa pokakana kona mongiasan Tama.

²⁴Sabab ko Mian Bisadoo Na Roh, tukon tolongo nakuasa Mian Bisa Na Roh ko mian-mian nggoola sosubaiyo Tama bunomo lakon Yana daano.”

²⁵Boinedoo bantile doi Yesus, “Yaku toiyo Tomundo Pasalamat (mo sinombuikon Kristus) naikon lubat. Kalu Yana lubat, Yana bontiikene doi kita sasaibino kolangge doi kita.”

²⁶“Yakumo naiya,” Yesus bantile, “Yakumo diabudodoo pobasalitai tukon ikoo.”

²⁷Doiya kosinggatoo Yesus napololaing-pololaing abalimo. Yanila masaingding mokitayo Yesus pobasalitai tukon meeng koboine. Bai akiyo mau nabaino meeng komian doi yaniladoo mo mansadai doi boinedoo, “Tina indee komu palaluu?” kai mo mansadai doi Yesus, “Bulaando Tama pobasalitai tukon do boinedoo?”

²⁸Maka boinedoo tinggalemo kona gumbang idoo maka naobuleng doi kota tukon babotilanggene doi mian-mianoo indaa.

²⁹“Mai pokitayo komian mo bantikene yaku sasaibino kolangge mo biasa yaku kubaiyo. Kai Yanamo do Tomundo Pasalamatoo?”

³⁰Maka dopai mian-mianoo tinggalemo konapo kota maka ampakono doi Yesus.

³¹Singgat doiya Napololaing-pololaing tobiyo Yesus mokaan. “Tama Guru,” yanila bantile, “mai kaano.”

³²Bai Yesus timbiliyo, “Daano kokinaan doi Yaku mo aki po toiyo.”

³³Maka dona pololaing-pololaing yanila posadaimo, “Kai daano komian mobabakene kokinaan doi Yana?”

³⁴Maka Yesus bantile, “Daku kinaan doiyamo tolongo loloiyo kona mongiasan bintekene Yaku, tukon alapayo kolimang mo bineekon doi Yaku.

³⁵Komuyu bantile, ‘Baimo sangkap kobituwon laatemo kobapupuian.’ Bai Yaku bantile doikoo: Pombalenge koasi labuwedoo mo sonimo, laatemo kona pinupuian.

³⁶Komian mo bapupui tambuuno talimayo kona tambo tukon pototongikene kona hasil motuuk doi tuboan mo bisa tukon posidutukon. Maka komian mo masabukon tukon mian mo bapupui moola balasanaang posinggat-singgat.

³⁷Nasosombotiya bisa koidan, ‘Komeeng masakakon kobailon bapupui.’

³⁸Yaku bintekene komuyu moampakon bapupui doi asi mo aki pomolimang; komian bailon balimango indaa, tukon komuyu mantalima kountungan doi yaniladoo nalimang.”

³⁹Badaang ko Samaria miano mondoong doi kotadoo momaanggamo Yesus, sabab do boinedoo bantile, ‘Yana bantile doi Yaku sasaibino kolangge mo biasa Yaku kubaiyo.’

⁴⁰Sambuno dopai Samariadoo miano pososuung tukon Yesus, yanila kabiyo tukon sabole-bole sulano Yana nandoong tukon yanila. Jadi Yesus ndoong idoo lua kooloyo kona kalumbit.

⁴¹Boobus doibundu lobian badaang koidan komian momaangga doi Yesus sabab oila kona inotunggulikon susuungo doi yanila.

⁴²Yanila bantile doi boinedoo, “Kami maanggamo diabudodoo, bolikon koidan sabab oila doikoodoo mubinontiikon doi kami, bai kami susuunggami lapamo molongol Yana, tukon kami toiyo baikon Yanamo ko Pasalamat dunia.”

⁴³Sambuno lua kooloyo kona ndoongan doi Sikhal, Yesus ampakon doi Galilea.

⁴⁴ Yesus susuungo lapamo bantile, “Meeng konabi aki nainodotii kalu doi nalipu susuungo.”

⁴⁵ Bai sambuno Yesus polong doi Galilea ko mian-mian indaa talimayo tukon sanaang konoano, sabab yanila daano doi Yerusalem doi Oloyo Babasal Paskah, tukon yanila lapamo kitayo sasaibino Yesus nakinubai.

⁴⁶ Doibundu Yesus abalimo doi Kana doi Galilea, indaamo Yana namoboliian paisu teali suka. Doi kotadoo daano komeeng kopagawe pamarenta, kona pau anoon momasakit doi Kapernaum.

⁴⁷Sambuno yana ndongoliiyo Yesus molubato doi Galilea lengget doi Yudea, yana ampakon doi Yesus tukon kabiyo Yesus nalubat doi Kapernaum sulano naaline kona pau mo kabimo mate.

⁴⁸Yesus bantil doi pagawe pamarentadoo, “Kalu komuyu aki pokitayo komo minasaindinggon, komuyu aki pomaangga.”

⁴⁹“Tuan,” pagawe pamarentadoo timbiliyo, “mosobit lubat moakiyoon daku pau namate.”

⁵⁰Yesus bantile doi yana, “Ampakono, komu pau tangalino.” Do mianoo anggayomo Yesus nabantilan, maka yana ampakon.

⁵¹Doi loloon tanga kona peleleani-peleleani ndobotiyo yana tukon bontiikene, “Tuan napau tangalino.”

⁵²Maka yana mansadai doi yanila batong bulaa do paudoo natambuunan tangalin. Yanila timbiliyo, “Kolubabi ugaatene batong meeng suun kooloyo kona maligoot lapus.”

⁵³Maka do paudoo tamano neneeke baikon doiyamo kona posinggatan Yesus nabontiikanano yana, “Komu pau totobomo.” Maka yana tukon sasaibino kopulino maanggamo doi Yesus.

⁵⁴Doiyamo komo minasaindinggon koluano luunggon Yesus mo kubaiyo doi Galilea sambuno yana lubat doi Yudea.