Read Banggai YOHANES 5 Bible Online

YOHANES 5 - Banggai bible

YOHANES 5

¹Lapa doiya daano ko Yahudi miano nalamean, maka Yesus ampakon doi Yerusalem.

²Doi Yerusalem nggaup ko “Tataapon Domba” daano komeeng kokolam, doi silingan Ibrani mosinombuikon Betesda. Idoo daano kolima kokombiang.

³Doi kombiang-kombiangoo badaang komian masakit momoolo; daano komo piit, daano komo pelong, tukon daano komo lapit. [Yanila sasaibino montotiili do kolamoo naliaabokan.

⁴Sabab daano kotempono Temeneno namalaekat obulus doi kolamoo lalomo nakabuke kopaisuno. Tukon mian mo seselon indee komo tumbe tulak doi kolamoo lalomo singgatoo kopaisuno daano moliabokan mian naikon tangalin indeemo kona sesel yana mo toupiyo.]

⁵Doi lipudoo daano komeeng komalane mo seselon tolu kolonomo alu kotaun kolumbito.

⁶Yesus kitayo yana momoolo indaa, tukon toiyomo yana malumbito tuuno kona seselonan; maka Yesus sadaiyo doi yana, “Ikoo yase mutangalin?”

⁷Do mianoo moseselon timbiliyo, “Tama, akiyo komian naimbaa sulano nausekene yaku nai kolam nia lalomo doi tempo paisuno modaano liabokan. Tukon nasodo kuampakon doi kolamoo, komian bailon lukono usok.”

⁸Maka Yesus bantile doi yana, “Banguno, bingkate komu balayon tukon ampakono.”

⁹Doiya kosinggatoo do mianoo tangalino. Yana bingkate kona balayon tukon ampakono. Doiya halloo kona tealian doi oloyo Tadean.

¹⁰ Tobikon doiya kopamarenta Yahudi bantile doi mianoo mo sodo tangalin, “Oloyo nia oloyo Tadean. Ikoo aki nanggoola binggate komu balayon.”

¹¹Bai do mianoo timbiliyo, “Mian mo aline yaku budodoo, komo sumboliiyaku binggate daku balayon tukon ampakon.”

¹²“Indee kai yana komo sumboliikon binggate komu balayon tukon ampakon?” yanila mansadai.

¹³Bai do mianoo mo lapamo tangalin kona sesel aki natoiyo indee komiano, sabab Yesus banggilapuso doi mianoo namadaangan.

¹⁴Boobus doibundu Yesus pososuung do mianoo doi Temeneno Na Bonua lalomo, tukon bantile doi yana, “Doiya budodoo ikoo lapamo tangalin. Inaimo momongkubai lalim koidan, sulano naaki mumataup langge mo lobian kona kulokisan.”

¹⁵Maka ampakono do mianoo tukon popitoikene doi pamarenta Yahudi baikon doiyamo Yesus komo aline daku sesel.

¹⁶Sambuno buno doiya yanila atambuunemo kona sakisaawano Yesus, sabab Yana aline komian nasesel doi oloyo Tadean.

¹⁷Bai Yesus bantile doi yanila, “Ko Tamang-Ku sidutu balimang polong naiya, tukon Yaku koidan balimang.”

¹⁸Bantilan-bantilanoo kubaiyo kopamarenta Yahudi pololokon mounggolii loloon sulano napo akateo Yana. Yanila kubaiyo doiya, bolikon tolongo sabab Yana molumbaiyo koaturan agama tentang doi oloyo Tadean, bai koidan mangaani Yana bantile baikon ko Mian Bisadoo Tama-No; koalatino Yana pokakanakene Kobutongo tukon Mian Bisa.

¹⁹Yesus timbiliyo dopai mian-mianoo buno naiya, “Poanggayo, Pau aki nanggoola kubaiyo inde-indee kolangge tukon nakuasa susuungo. Yana tolongo moola kubaiyo kolangge Yana mo kitayo doi Tamano nakinubai. Sabab komo Tama nakinubai doiyamo koidan do Paudoo nakinubai.

²⁰Sabab Tama seseange kona Pau tukon otudoikene doi Yana sasaibino kona kinubai susuungo. Tolongo Tama naikon otudoikene doi Yana kokubai-kokubai mo lobian babasal koidan, polong komuyu masainding.

²¹Tamadoo otuboiyo komian mate, tukon beena yanila tuboan mobisa tukon posidutukon; bunomo lakon doiya Pau mebee tuboan posidutukon doi mian mo yase nabinee tuboan.

²²Tama susuungo aki naukume mau indee komiano. Sasaibino kokuasa, motuuk doi baukuman lapamo beekene doi na Paudoo.

²³Tama kubaiyo doiya sulano sasaibino komian odotiiyo Pau pokakanamo yanila moodotiiyo Tama. Komian mo aki naodotiiyo Pau aki koidan naodotiiyo Tama mo sumboliiyo kona Pau.

²⁴Bisa tuuno daku bantilan-bantilan nia: Mian mo timbikene daku bantil-bantilan, tukon anggayo doi Yana mo bintekene Yaku, malaat tuboan mobisa tukon posidutukon. Yana aki nainukum; Yana tongosodiimo doi matean tukon malaat tuboan.

²⁵Poanggayomo: Naikon laate kotempono — bai lapamo polong kotempono — mian momate naikon molongol Mian Bisa na Pau alalo. Tukon mian mo molongol Yana naikon tubo.

²⁶Pokakana Tama susuungo tuboan nalubatan, yana tealikene kona Pau tuboan nalubatan koidan.

²⁷Yana lapamo beekene doi na Pau kohaak sulano tindokiiyo, sabab Yana Manusia na Pau.

²⁸Inai komuyu pomasainding polengele niiya hallia, sabab kotempono naikon lubat baikon sasaibino komian mo mate lengele koalalo,

²⁹ maka natobuat doi kibul. Mian mo lapamo mokubai monondokan naikon abali luwedoi matean tuuk doi tuboan. Bai mian mo lapamo mongkubai lokis yana tubo bai malaat ukuman.”

³⁰“Yaku aki nanggoola mongkubai oioila motolongo kumongiasan susuunggu. Yaku tolongo mongukum pololoi tukon Mian Bisa napobintokon. Tukon Daku putusan adil, sabab Yaku aki kuloloiyo Kumongiasan susuunggu, bai Tama namongiasan mo bintekene Yaku.

³¹Andeno Yaku mebee bantilan motolongo tuuk doi butonggu susuunggu, dobantilanoo aki namoola inangga.

³²Bai daano komian bailon mo mebee bantilan motuuk doi Yaku, tukon Yaku toiyo dona bantilanoo bisa.

³³ Komuyu lapamo mobintokon bito-bito doi Yohanes, tukon yana lapamo mebee bantilan mo bisa tentang doi Yaku.

³⁴Hallia Yaku bantile, bolikon sabab Yaku palaluuwo kobantilan doi banggapi, bai sulano komuyu posinalamaton.

³⁵Yohanesdoo buno posi mo kolot tukon tebeaason kolaango. Tolongo aki namalumbit komuyu sanaang mantalima do laangodoo.

³⁶Bai Kubantilan lobian babasal doi Yohanes nabantilan. Oila Kukinubai budodoiya, doiya limang mo pinarentakon Tama doi Yaku, natokitaan baikon Tama molapamo bintekene Yaku.

³⁷ Tukon Tama mo bintekene Yaku koidan mebee bantilan motuuk doi Yaku. Komuyu akiyoon pomolongol alalo kai mokita duduso.

³⁸Kona bantilan-bantilan akiyo komo tangabos doi noamuyu lalomo sabab komuyu aki pomaangga doi Yaku nabobintokon.

³⁹Komuyu palajalio ko Kitab Moliyous sabab komuyu aanggene baikon tukon cara doiya komuyu malaat tuboan mobisa tukon posidutukon. Tukon doi Kitab Moliyousoo daano mebee bantilan motuuk doi Yaku.

⁴⁰Bai komuyu aki poyase lubat doi Yaku sulano pomalaat tuboan posidutukon.

⁴¹Yaku aki kumounggolii taanggaan doi banggapi.

⁴²Yaku tingoniiyo komuyu. Yaku toiyo komuyu akipo mamaasikene ko Mian Bisa doi noamuyu lalomo.

⁴³Yaku lubat tukon kuasa Tamanggu, bai komuyu aki potalimayo Yaku. Bai kalu mian bailon lubat tukon nakuasa susuungo, komuyu yase talimayo yana.

⁴⁴Bulaando komuyu nggoola anggayo, kalu komuyu mounggolii tanggaalan doi tulamuyu, tukon aki ponggoola mounggolii tanggaalan doi Mian Bisa mo Meeng?

⁴⁵Inai poaanggene Yaku asalakene komuyu doi Tamanggu salaano. Tolongo komo asalakene komuyu doiyamo Musa, yanamo kopo minoinikon.

⁴⁶Ande-andeno komuyu anggayo doi Musa, komuyu naikon anggayo Yaku sabab kaliangano Yakumo yana tulise.

⁴⁷Bai kalu komuyu aki poanggayo indee Musa natinulis, bulaando kopoo moolaan maangga oila Daku binantil?”