Read Banggai YOHANES 6 Bible Online

YOHANES 6 - Banggai bible

YOHANES 6

¹Bubula kotempo doibundu Yesus ampakon doi Danau Galilea sembeleng, mo sinombuikon Danau Tiberias.

²Sambuno polong indaa, badaang komian momalaing Yana sabab yanila lapamo mongkita komo minasaindinggon Yana mo kubaiyo tukon aline ko mian-mian momasakit.

³Yesus tolibo doi bunggul bungkokono, maka osulang idoo tukon Napololaing-pololaing.

⁴Doiya kosinggatoo loolanimo ko Oloyo Babasal Paskah Yahudi.

⁵Sambuno Yesus kitayo potikunggon, Yana kitayo komian potutuundu molubat doi Yana. Maka Yana bantil doi Filipus, “Inaando konda malaatan bangolian kinaan, sulano sasaibino namian nia namoola kaan?” (

⁶Yesus lapamo toiyo indee naikon kona kinubai, bai Yana bantile buno doiya sabab Yana ujio Filipus.)

⁷Filipus timbiliyo, “Roti koolino lua kosakato kolupia aki naikon nasukup doi mian-mian nia, mau nabaino ponggidikon.”

⁸Yesus napololaing bailon, doiyamo Andreas, Simon Petrus utuso bantile,

⁹“Dimbaa daano kopau-pau malane tukon lima koroti tukon lua koikan. Bai bulaando kona tealian tuuk doi mian mobadaang nia?”

¹⁰“Sumboliiyo ndaiya mian-mianoo naosulang,” Yesus bantile. Doi lipudoo daano badaang kobulung, maka dopai mian-mianoo osulango doi bulungoo — uga-ugaate daano lima koloon komian mala-malane.

¹¹Doibundu Yesus alayo do rotidoo, maka libakene konasukuur doi Mian Bisa. Lapamo doiya Yana ebe-ebesemo do rotidoo doi mian badaang. Boobus Yana ebe-ebese do ikanoo tukon yanila kaan polong biya-biyai.

¹²Sambuno lapa kaan sasaibino yanila bobosul, Yesus bantil doi Napololaing-pololaing, “Popototongikene do kinaano labino; inai nadaano komo tangaison.”

¹³Maka yanila pototongikene songulo lua kobois momoono kolabino do kinaano lima koroti komo kinaan doi mianoo badaang.

¹⁴Sambuno mian badaangoo kitayo komo minasaindinggon Yesus mo kubaiyo, yanila bantile, “Bisa, naiyamo ko Nabi mo minoinikon molubat doi dunia!”

¹⁵Yesus toiyo yanila yase lubat sulano pakisaayo Yana teali napo tomundo. Tobikon doiya Yana ampakono dampas doi lipu mobabungkukon.

¹⁶Salataa kooloyo adukon kaput, Yesus napololaing-pololaing ampakono doi paisu.

¹⁷Maka yanila lakit doi duanganoo pintosiiyo do paisudoo kona tujuiyo doi Kapernaum. Kooloyo kalipookano bai Yesus akiyoon nalubotiiyo yanila.

¹⁸Sambuno buno doiya do paisudoo tambuuno babokolan sabab mombuul makansang.

¹⁹Sambuno yanila talabut ugaate limamo kai noomo kokilo kona kodoon, yanila kitayo Yesus lubat doi napo duangan tukon ampakon doi paisu bungkukono. Yanila matakut tuuno.

²⁰Bai Yesus bantil doi yanila, “Inai pomatakut, naiya Yaku!”

²¹Maka sanaang yanila noano talimayo Yana doi duanganoo, tukon doiya kosinggatoo dona poduangan polong doi napo lipu pinakituu.

²²Modoakon kooloyo mian badaangoo mo daano dungol doi paisudoo sembeleng, toiyo budodoiya tolongo meeng koduangan indaa. Yanila toiyo Yesus napololaing-pololaing lapamo taus tukon do duanganoo, bai Yesus aki namalaing.

²³Doibundu moimoiya koduangan doi Tiberias lubat doi lipudoo tukon balabu lolani do mianoo badaang namakaanan roti lapamo Temeneno mopolonggon sukuur.

²⁴Sambuno mian badaang kitayo baikon Yesus mau koidan Napololaing-pololaing akiyo idoo, yanila lakito doi duangan-duanganoo tukon ampakono doi Kapernaum umboliiyo Yesus.

²⁵Sambuno mianoila pososuung tukon Yesus doi paisu sembeleng, yanila mansadai doi Yana, “Tama Guru, indee kosinggatoo Tama napolongan naimbaa?”

²⁶Yesus timbiliyo, “Bisa, komuyu mounggoliiyo Yaku bolikon komuyu mangalatikene komakisuuto komo minasaindinggon Yaku mo kubaiyo, bai tolongo komuyu molapamo kaan polong bobosul.

²⁷Inai pobalimang sulano pomalaat kinaan mo moola kabus tukon boowan. Pobalimango sulano pomalaat kinaan mo aki naboowan tukon mo beena tuboan mobisa tukon posidutukon. Kinaanoo naikon Manusia na Pau komo beekene doi komuyu, sabab Yana lapamo Tama Mian Bisa odduke.”

²⁸Maka yanila mansadai doi Yana, “Indee komai kinubai sulano mai kubaiyo ko Mian Bisa namongiasan?”

²⁹Yesus timbiliyo, “Naiyamo ko Mian Bisa nainiyas doi komuyu: poanggayomo Yana Mian Bisa mo sumboliiyo.”

³⁰“Kalu buno doiya,” yanila bantile, “indee kotandano mo moola Tama beekene sulano mai kitayo tukon anggayo doi Tama? Oila naikon Tama nakinubai?

³¹ Kotumbunggami makaan manna doi padang lalomo, pokakana mototulis doi Kitab Moliyous lalomo, ‘Yana beena yanila kinaan roti doi surgaa.’ ”

³²Maka Yesus bantile doi yanila, “Poanggayomo: Bolikon Musa, bai Tamanggumo komo beena doi komuyu roti mo bisa doi surgaa.

³³Sabab roti Mian Bisa nabineekon doiyamo Yana mo obulus doi surgaa tukon mebee tuboan kobanggapi doi dunia.”

³⁴“Tama,” yanila bantile, “beena kami do rotidoo sidutu.”

³⁵“Yakumo koroti beena tuboan,” Yesus bantile doi yanila. “Mian mo lubat doi Yaku akimo namalaal koidan posidutukon. Tukon mian mo maangga doi Yaku akimo namolou koidan polong posidutukon.”

³⁶“Bai buno kubantilano doi komuyu, mau komuyu molapamo kitayo Yaku, komuyu aki pomaangga.

³⁷Sasaibino komian Tamanggu mo beekene doi Yaku yanila lubat doi Yaku. Yaku aki kutolake indee komo lubat doi Yaku.

³⁸Sabab Yaku obulus doi surgaa, bolikon sulano Kukubaiyo Kumongiasan susuunggu, bai Yana namongiasan sumboliiyo Yaku.

³⁹Naiyamo Yana namongiasan mo sumboliiyo Yaku: sulano doi sasaibino komian mo bineekon doi Yaku, akiyo komeeng molapus; bai sulano Yaku kuotuboiyo yanila doi Oloyo Nakiamatan.

⁴⁰Bisa naiyamo ko Tamang-Ku namongiasan: Sulano sasaibino komian mo kitayo Paudoo tukon anggayo Yana malaat tuboan mobisa tukon posidutukon, tukon Yaku otuboiyo koidan doi Oloyo Nakiamatan.”

⁴¹Yahudi mianoo daango tambuunemo nanggimoliiyano Yesus, sabab Yana bantile: “Yaku roti mo obulus doi surgaa.”

⁴²Yanila bantile, “Baanggon niiya Yesus, Yusuf napau? Kami tingoniiyo kotamano tinano! Bulaando Yana bantile baikon Yana obulus doi surgaa?”

⁴³Maka Yesus bantile doi yanila, “Inai ponggimal.

⁴⁴Akiyo komeeng komian momoola lubat doi Yaku, kalu Tamanggu mo sumboliiyo Yaku, aki nababayo yana doi Yaku; tukon indee komo lubat naikon Yaku otuboiyo doi Oloyo Nakiamatan.

⁴⁵ Doi Nabi-nabi na Buku lalomo daano mototulis buno naiya, ‘Sasaibino komian naikon Mian Bisa otunggule.’ Jadi sasaibino komian mo molongol doi Tama tukon monggiotunggulkon doi Yana, lubat doi Yaku.

⁴⁶Doiya aki nabisa baikon daano komian mo lapamo kitayo Tama. Tolongo Yana komo lubato doi Mian Bisa, komo lapamo kitayo Tama.

⁴⁷Potoiyo: Mian mo maangga, malaat tuboan mobisa tukon posidutukon.

⁴⁸Yakumo koroti mo mebee tuboan.

⁴⁹Pombumbu makaan manna doi padang lalomo tukon yanila mate koidan.

⁵⁰Bai aki nabuno doiya do rotidoo mo obulus doi surgaa; mian mo makaan do rotidoo aki namate.

⁵¹Yakumo koroti mo obulus doi surgaa — roti mo beena tuboan. Mian mo makaan naiya roti nia malaat tuboan posidutukon. Roti naikon Yaku mo beekene motuuk doi banggapi nai dunia nia doiyamo sailong-Ku.”

⁵²Yanila lengele doiya, mian badaang Yahudi ponggeeleki meeng tukon meeng. “Bulaando naiya mian nia monggoola beekene kosailo doi kita sulano nda kaane?” yanila bantile.

⁵³Maka Yesus bantile doi yanila, “Poanggayomo: Kalu komuyu aki pomakaan Manusiadoo Napau sailo tukon monginum sauno, komuyu bisa-bisa aki potubo.

⁵⁴Mian mo makaan sailonggu tukon monginum saunggu malaat tuboan mobisa tukon posidutukon tukon Yaku otuboiyo yana doi Oloyo Nakiamatan.

⁵⁵Sabab kosailonggu bisa-bisa kinaan, tukon kosaunggu bisa-bisa ininum.

⁵⁶Mian mo makaan sailong-Ku tukon moinum saung-Ku, pomeenggon tuuno tukon Yaku, Yaku tukon yana.

⁵⁷Tama mo tubodoo, sumboliiyo Yaku tukon Yaku tubo doi Tama. Bunomo lakon mian mo makaan sailong-Ku naikon yana tubo doi Yaku.

⁵⁸Naiyamo koroti mo obulus doi surgaa: bolikon roti mo buno tumbumuyu nakinaan. Sabab kaane do rotidoo, yanila mate koidan. Bai mian mo makaan roti nia yana malaat tuboan posidutukon.”

⁵⁹Sasaibino doiya Yesus bantile tempo Yesus mongotunggul doi bonua kaledaan doi Kapernaum.

⁶⁰Sambuno lapa molongol Yesus nabantilan-bantilan, badaang doi Kupololaing bantile, “Otunggul nia todudul babalat. Indee komo nggoola talimayo!”

⁶¹Yesus toiyo doi Kupololaing-pololaing nggimal doiya halloo. Maka Yana bantile, “Oilakai komuyu alatio sala doiya bantilan-bantilanoo?

⁶²Bulaando kona tealian naikon kalu komuyu kitayo Manusia na Pau abali liba doi Nadungolan tumbeno?

⁶³Komo kubaiyo kobanggapi tubo doiyamo Mian Bisa Na Roh. Banggapi nabukuanan akiyo kotakoso. Bantilan-bantilan nia Yaku mo bantile doi komuyu doiya Mian Bisa Na Roh nabantilan tukon bantilan-bantilan mo mebee tuboan.

⁶⁴Mau nadaano koidan doi komuyu mo aki namaangga.” (Yesus toiyomo doi tumbe-tumbeno inde-indee komo aki namaangga, tukon indee komo kulokisanggene Yana.)

⁶⁵Maka Yesus bantile koidan, “Doiyamo kokaliangano Yaku bontiikene doi komuyu baikon akiyo komeeng komian monggoola lubat doi Yaku, kalu Tama aki nameleosene.”

⁶⁶Tambuuno doiya kosinggatoo badaang Kona pololaing motinggale Yana, tukon akimo nayase momalaing koidan.

⁶⁷Maka Yesus mansadai doi songulo luadoo Kona pololaing, “Oilakai komuyu naikon tinggale Yaku?”

⁶⁸ “Temeneno,” Simon Petrus bantile doi Yana, “doi indee miano naikon komai tausan? Bantilan Temeneno momebee tuboan mobisa tukon posidutukon.

⁶⁹Kami lapamo anggayo tukon tutuu baikon Temeneno bito-bito momoliyous doi Mian Bisa.”

⁷⁰Yesus timbiliyo, “Bolikon kai Yaku komo piliyo komuyu mosongulo lua nia? Mau nadaano komeeng doi komuyu nia moteali ibiliis!”

⁷¹Yesus naminakisuuti doiyamo Yudas Simon Iskariot napau. Sabab mau Yudas meeng komian pololaingo Yesus, bai yanamo komo kulokisanggene Yesus.