Read Banggai YOHANES 7 Bible Online

YOHANES 7 - Banggai bible

YOHANES 7

¹Sambuno buno doiya Yesus ampakono doi yayaa doi Galilea. Yana aki nayase doi kabupaten Yudea sabab kopamarenta Yahudi natetel akateyo Yana.

² Doiya kosinggatoo adukono lolani ko Oloyo Babasal Sandung Loon.

³Maka Yesus utus-utuso bantile doi Yana, “Tinggalemo naiya lipu nia tukon ampakon doi Yudea, sulano Mupololaing-pololaing nggoola kitayo Mulimang.

⁴Akiyo komian mo nggoola seekene kona kinubai, kalu yana yase natololongol. Kalu Ikoo kubaiyo kolangge-langge pokakana doiya, sasaibino kolipu sio natoiyo!” (

⁵Sabab Nautus-utus susuungo aki naanggayo doi Yana.)

⁶“Akiyoon nalaate kotempono doi Yaku,” Yesus bantile doi yanila, “bai tuuk doi komuyu samba-samba kotempo moola.

⁷Nadunia nia aki namoola mosikitene komuyu. Bai Yaku takainomo dunia mosikitene, sabab sidutu Yaku bantile doi dunia nia baikon kona kokubai kulokis.

⁸Poampakono komuyu susuumuyu doi lameanoo. Yaku aki kuampakon sabab akiyoon nalaate kotempono.”

⁹Bunomo doiya Yesus nabantilano doi utus-utuso, tukon Yana ndoongo doi Galilea.

¹⁰Sambuno Nautus-utus taus doi lameanoo, Yesus aki nabiyok-biyok ampakon susuungo komian akiyo komo toiyo.

¹¹Polapakon do lameanoo, kopamarenta Yahudi unggoliiyo Yana tukon masa-mansadaikene, “Inaando Yana?”

¹²Badaang komian tambuuno polisaukene tentang Yana. Daano komo bantile, “Yana mian monondok.” Daano koidan komo bantile, “Aki! Yana tolongo atapayo komian badaang natuboan.”

¹³Bai akiyo komeeng komian mobarani basilingan longolikene kaliangano Yana sabab yanila matakutene kopamarenta Yahudi.

¹⁴Doi lameanoo tanga-tangano, Yesus usok doi Temeneno Na Bonua, maka Yana tambuun bangotunggul.

¹⁵Kopamarenta Yahudi masainding tuuno tukon bantile, “Bulaando naiya mian nia mobadaang kolangge tinoi bai aki nasikolah?”

¹⁶Yesus timbiliyo, “Naiya kuinotunggulkon nia bolikon kuotunggul, bai Yana naotunggul bitekene Yaku.

¹⁷Mian mo yase loloiyo ko Mian Bisa namongiasan, naikon toiyo oilakai Kuotunggul luwedoi Mian Bisa kabai doi Yaku susuunggu.

¹⁸Mian mo mebee otunggul susuungo tolongo mounggolii nangginaalan kobutongo susuungo. Bai komian mo mounggolii tanggaan moluwedoi Mian Bisa mo sumboliiyo Yana, doiya mian jujur, aki nabakala-kala.

¹⁹Baanggon Musa lapamo beekene Mian Bisa Naparenta-parenta doi komuyu? Bai doi komuyudoo komo aki potulutiyo do parenta-parentadoo. Bulaando komuyu moyase akateyo Yaku?”

²⁰Mian badaangoo timbiliyo, “Ikoo tando! Indee komo yase akateyo Ikoo?”

²¹Yesus timbiliyo, “Tolongo meeng kolimang Yaku mokubaiyo doi oloyo Kopituno, komuyu masaingdingo.

²² Musa beena komuyu aturan sulano pobasunat — mau do basunatanoo kona bisaan aki naluwe doi Musa, bai doi pombumbu loolukoo akiyoon nadaano Musa. Tobikon doiya, mau doi oloyo Tadean komuyu sunate komian.

²³ Kalu komuyu kubaiyo doiya sulano naaki posalayo Musa naaturan doi basunatanoo, bulaando komuyu monggimoliiyo Yaku sabab Yaku mootuboiyo ko mian-mian momasakit doi oloyo Tadean?

²⁴Inai poukume komian tolongo lobo mo tokita, bai sio natuuk doi naadilan.”

²⁵Boobus doiya daano bubula ko Yerusalem miano bantile, “Bolikon kai naiya domianoo mo inumbolii sulano nainakate?

²⁶Pokitayo Yana basalita tukon bebas doi mian badaang salaano, tukon akiyo komian mo bantile inde-indee doi Yana! Kai konda pamarenta-pamarenta daanomo komo toiyo Yanamo naiya ko Tomundo Pasalamat?

²⁷Bai kalu do Tomundodoo Pasalamat lubat, akiyo komeeng komian motoiyo yaando kona lenggetan! Banggokai kita toiyo doiyaa kona lenggetan namian nia.”

²⁸Doibundu Yesus daano mongotunggul doi Temeneno Na Bonua lalomo, Yana nggeleamon tukon alalo mo babasal, “Jadi komuyu toiyo indee Yaku nia, tukon doiyaa Kulenggetan? Yaku aki kulubat tukon Kumongiasan susuunggu. Yana bintekene Yaku mo daano kona haak mobintekene Yaku, tukon Yana nggoola inangga. Bai komuyu aki potingoniiyo Yana.

²⁹Yaku tingoniiyo Yana, sabab Yaku luwedoi Yana, tukon Yanamo komo bintekene Yaku.”

³⁰Doiya kosinggatoo yanila yase lakoyo Yesus, bai akiyo komo barani taaniyo Yana, sabab akiyoon nalaate kotempono.

³¹Badaang doi mian-mianoo tambuuno maangga doi Yana, tukon bantile, “Kalu Tomundo Pasalamatoo lubat, oilakai lobian badaang komo minasaindinggon monggoola Yana kubaiyo tukon doi mian nia?”

³²Parisi miano ndongoliiyo bulaando do mianoo badaang napolisaukanano kaliangano Yesus. Tobikon doiya yanila pomeenggon tukon imam-imam kapalano, yanila sumboliiyo komoimoiya kopototooli Temeneno Na Bonua sulano yanila ampakon molakoyo Yesus.

³³Yesus bantile doi mian badaangoo doi Temeneno Na Bonua lalomo, “Tolongo budodoiya Yaku daano polaing komuyu. Nalapa doiya Yaku naikon abalimo doi mo bintekenedoo Yaku.

³⁴Komuyu naikon unggoliiyo Yaku, bai aki popososuunggene Yaku; sabab komuyu aki nanggoola lubat doi lipu naando Kudaanoan.”

³⁵Maka pamarenta Yahudi bantil doi meeng tukon doi bailon, “Mian nia yase ampakon doiyaa tobikon kita aki nda pososuunggene Yana? Oilakai Yana yase ampakon doi Yahudi miano mo dungol doi lipu bailon doi Yunani miano, tukon mongotunggul Yunani miano?

³⁶Indee komakisuuto tukon nabantilan baikon kita unggoliiyo Yana bai aki nanggoola pososuunggene Yana tukon baikon kita aki nda nggoola lubat doi lipu nadaanoan Yana?”

³⁷ Doi oloyo napupusan do lameanoo, doiyamo oloyo mo palaluu tuuno, Yesus kokondong doi Temeneno Na Bonua lalomo tukon bantile, “Mian mo molou sio nalubat doi Yaku sulano namonginum.

³⁸ Doi mian mo anggayo Yaku, totulis doi Kitab Moliyous, ‘Doi noano lalomo lombamo kopaisu mo mebee tuboan.’ ” (

³⁹Yesus basilinganggene kaliangano ko Mian Bisa Na Roh, naikon doi mianoo mobadaang motalimayo tukon anggayo Yana. Sabab doiya kosinggatoo Mian Bisa Na Roh akiyoon nabineekon; sabab Yesus akiyoon nakinabasal tukon doi namatean.)

⁴⁰Badaang komian mondongolii oila komo Yesus nabinantil, tukon doi yaniladoo daano komo bantile, “Naiya mian nia doiyamo Nabidoo!”

⁴¹Kobailon bantile, “Naiyamo ko Tomundo Pasalamat!” Bai daano komo bantile, “Eh, bulaando ko Tomundo Pasalamat molubat doi Galilea?

⁴² Doi Kitab Moliyous lalomo totulis baikon Tomundo Pasalamat daano katurunan Daud tukon naikon lubat doi Betlehem, doiyamo Daud nalipu.”

⁴³Doibundu tambuuno komian badaang ponggeelekikene doi Yesus.

⁴⁴Daano komo yase lakoyo Yana, bai akiyo komeeng komian monggoola taaniyo.

⁴⁵Sambuno dopadagaidoo Temeneno Na Bonua mo sinumbolii ampakon lakoyo Yesus lubato koidan, imam-imam kapalano tukon Parisi mianodoo sadaiyo doi yanila, “Bulaando komuyu moaki pobabayo Yana doisumai?”

⁴⁶Padagai-padagaidoo timbiliyo, “Eh, akiyoon nadaano komeeng komian mobasilingan pokakana Yana!”

⁴⁷“Oilakai mau komuyu koidan lapamo Yana atapayo?” Parisi mianodoo bantile.

⁴⁸“Kai daano doi nda pamarenta-pamarenta kabai Parisi miano mo anggayo Yana?

⁴⁹Bai mian badaang nia, yanila aki natingoniiyo Musa naukum, tukon mau nabulaandomo koidan bai yanila lapamo kinutuk.”

⁵⁰ Daano komeeng komian doi Parisi mianodoo doiyamo Nikodemus mo biasa lubat doi Yesus. Nikodemus bantil doi mian Parisi bailong,

⁵¹“Manurut Ukum, meeng komian aki namoola inukum kalu akiyoon kona palakala linongol tukon kokubai akiyoon napinalesa.”

⁵²“Kai mau ikoo doi Galilea?” yanila timbiliyo, “Palesayo ko Kitab Moliyous! Ikoo naikon kitayo baikon akiyo konabi mo luwedoi Galilea!” [

⁵³Sambuno buno doiya, sasaibino komian mule doi nabonua.