Read Banggai YOHANES 8 Bible Online

YOHANES 8 - Banggai bible

YOHANES 8

²Modoakon kooloyo dowa-dowasoono Yana ampakon koidan doi Temeneno Na Bonua, badaang komian molubat doi Yana. Yesus osulang, tukon tambuuno mongotunggul doi yanila.

³Daano Yana mobangotunggul, guru-guru agama tukon mian-mian Parisi babayo doi Yana meeng koboine mo linaat balolowa. Yanila sumboliiyo boinedoo kokondong doi tanga-tanga,

⁴maka yanila bantile doi Yesus, “Tama Guru, boine nia linaat daano balolowa.

⁵ Doi Musa na Ukum lalomo daano koaturan baikon koboine mobuno naiya sio nasinokuli batu pomatekon. Budodoiya bulaandomo Tama napopikikon?”

⁶Yanila mansadai buno doiya tuuk Natimbiliyo sulano yanila nggoola asalakene Yana. Bai Yesus tolongo tootuku, tukon batulis doi buta tukon lima-No saano.

⁷Sambuno yanila dadase, Yana benggete koolu-No tukon bantile doi yanila, “Mian mo akiyo kona lalim doi komuyu, sobiyomo Yana mo sakule tumbe tukon batu doi boinedoo.”

⁸Lapa doiya Yesus tootuku koidan tukon batulis koidan doi buta.

⁹Sambuno yanila ndongoliiyo Yesus mobantile buno doiya, ampakono yanila mootinggale do lipudoo, meeng tukon meeng tambuun doi momotuwa. Doibundu baino Yesus susuungo komo dungol idoo tukon boinedoo mo daano kokondong doi natampat.

¹⁰Maka Yesus benggete kooluno tukon bantil doi boinedoo, “Inaandomo yanila sasaibino? Akiyo komo daano ukume ikoo?”

¹¹“Akiyo, Tama,” boinedoo timbiliyo. “Monondok,” Yesus bantile, “Yaku koidan aki kuukume ikoo. Budodoiya ampakono, inaimo balolowa koidan.”]

¹² Yesus basilingan koidan doi mian badaang, konabantilano, “Yakumo komadialan dunia. Mian mo loloiyo Yaku aki naampakon doi kalipookan lalomo, bai malaat tuboan madialan.”

¹³ “Budodoiya Ikoo mebee bantilan doi butomu susuumu,” Parisi mianodoo bantile doi Yana, “Komubantilanoo aki natutuu.”

¹⁴Yesus timbiliyo, “Mau kai Kumebee bantilan doi butong-Ku susuunggu, Kubantilanoo tutuu; sabab Yaku toiyo Kulubatan tukon Kuampakonan. Komuyu aki potoiyo inaando Kulubatan tukon Kuampakonan.

¹⁵Komuyu tindokiiyo komian tolongo banggapi naakal; Yaku aki kutindokiiyo mau meeng komian.

¹⁶Bai kalu andeno Yaku tindokiiyo komian, Kuputusan adil, sabab Yaku aki nabaino susuunggu; Tama mo bintekene Yaku daano pomeenggon Yaku.

¹⁷Doi Musa na Ukum lalomo totulis buno naiya: Kobantilan mo bisa doiyamo bantilan doi lua komian.

¹⁸Komo beena bantilan doi butongo daano lua — Yaku tukon Tama mo bintekene Yaku.”

¹⁹“Tama-Mu inaando?” yanila bantile. Yesus timbiliyo, “Komuyu aki potingoniiyo Yaku mau Tamang-Ku. Ande-andeno komuyu tingoniiyo Yaku, tantu komuyu tingoniiyo ko Tamang-Ku koidan.”

²⁰Sasaibino doiya Yesus bantile tempo Yana daano mobangotunggul doi Temeneno Na Bonua lalomo loolani kopeti sosubakon natangabosan. Bai akiyo komeeng komian mo lakoyo Yana, sabab akiyoon nalaate kotempono.

²¹Yesus bantil koidan doi yanila, “Yaku naikon ampakono, tukon komuyu naikon unggoliiyo Yaku, bai komuyu sio pomate doi polalim lalomo. Doi lipu Kutausan, komuyu aki ponggoola lubat.”

²²Maka pamarenta Yahudi bantile, “Ugaate Yana akateyo kobutongo, sabab Yana bantile, ‘Doi lipu Kutausan, komuyu aki ponggoola lubat.’ ”

²³Maka Yesus bantil doi yanila, “Komuyu lubat doi bilit; bai Yaku lubat doi babo. Komuyu doi dunia nia; Yaku bolikon doi dunia.

²⁴Doiyamo kosababpo Yaku bantile doi komuyu, baikon komuyu mate doi polalim-lalim lalomo. Tukon bisakai komuyu mate doi polalim-lalim lalomo, kalu aki poanggayo baikon ‘Yakumo Yana komo sinombuikon YAKU DAANO’.”

²⁵“Ikoo indee miano kona tutuuwan?” yanila sadaiyo. Yesus timbiliyo, “Indee kona tuukan Yaku mobasalita koidan tukon komuyu!

²⁶Daano badaang kolangge motuuk doi komuyu Yaku mo yase bantile tukon tindokiiyo. Bai Yana mo bintekene Yaku nggoola inangga. Tukon Yaku popitoikene doi dunia oila komo Yaku lengele doi Yana.”

²⁷Yanila aki naalatio baikon Yana daano posalitai doi yanila tentang Tama.

²⁸Tobikon doiya Yesus bantile doi yanila, “Sio kalu komuyu lapamo katandake do Manusiadoo na Pau, komuyu naikon toiyo baikon ‘Yakumo naiya komo sinombuikon YAKU DAANO’, tukon komuyu naikon toiyo baikon akiyo komeeng Kukinubai motuuk doi butong-Ku susuunggu. Yaku tolongo bantile oila komo inotunggukon Tama doi Yaku.

²⁹Tukon Yanamo bintekene Yaku daano pomeenggon Yaku. Yana aki nabaino sodiiyo Yaku susuunggu, sabab Yaku sidutu kubaiyo oila komo sanaanggene Konoano.”

³⁰Sambuno lapa Yesus bantile sasaibinodoo, badaang komian moanggayo Yana.

³¹Doibundu Yesus bantil doi Yahudi miano mo lapamo maangga doi Yana, “Kalu komuyu tubo loingiyo Kuotunggul komuyu bisa-bisa Kupololaing,

³²maka komuyu tingoniiyo ko Mian Bisa mo bisa, tobikon doiya komuyu inosodiimo.”

³³ “Kami nia Abraham natulunan,” yanila bantile. “Akiyoon nadaano kami komo teali indeemo naata! Oila Komu makisuut tukon mobantile, ‘Komuyu naikon inosodiimo’?”

³⁴“Bisa tuuno Kubantilan nia,” Yesus bantile doi yanila. “Mian mo mongkubai lalim, doiya lalim naata.

³⁵Tukon meeng koata aki namalaat dungolan mo tataap doi pulino, bai kopau malaat dungolan moposidutukon doi pulino.

³⁶Tobikon doiya, kalu Paudoo osodiiyo komuyu, komuyu bisa-bisa tongosodii.

³⁷Takainomo Yaku toiyo komuyu Abraham natulunan. Mau komuyu yase akateyo Yaku, sabab komuyu aki potalimayo Kuotunggul.

³⁸Oila Kukinita doi Tamanggu, doiyamo Kubinantil. Bai komuyu kubaiyo oila tamamuyu nainotunggukon doi komuyu.”

³⁹Yanila timbiliyo, “Kotamanggami doiyamo Abraham.” “Ande-andeno komuyu bisa-bisa Abraham napau,” Yesus bantile, “tantu komuyu kubaiyo indee Abraham nakinubai.

⁴⁰Yaku pelenggene doi komuyu kolobo mobisa Yaku mondongoliiyo doi Mian Bisa, bai komuyu tolongo yase akateyo Yaku. Abraham aki namokubai komo buno doiya!

⁴¹Komuyu kubaiyo oila kotamamuyu nakinubai susuungo.” Yanila timbiliyo, “Kami bolikon pau-pau lolowa. Kotamanggami tolongo meeng, doiyamo Mian Bisa momeeng.”

⁴²Maka Yesus bantile doi yanila, “Ande-andeno Mian Bisadoo Tamamuyu, komuyu mamaasikene Yaku, sabab Yaku luwedoi Mian Bisa. Yaku aki kulubat tolongo Kumongiasan susuunggu, bai Yanamo komo bintekene Yaku.

⁴³Oila kosababpo komuyu mo aki pomangalatikene oila Kubinantil? Sabab komuyu aki ponggola loingiyo Kuotunggul.

⁴⁴Ibiliis kotamamu, tukon komuyu yase loloiyo kotamamuyu namongiasan. Doi tumbe-tumbeno Ibiliisoo pangakate. Yana aki nasidutu daano doi namonondokan, sabab akiyo komonondokan doi yana. Kalu yana bakala-kala doiya bisa, sabab bunomo doiya kona kokubai. Yanamo kokala tukon kokala naluwean.

⁴⁵Bai Yaku bantile komonondokan, tukon tobikon doiya komuyu aki poanggayo Yaku.

⁴⁶Indee komiano doi komuyu nokon monggoola tudoikene baikon daano Daku lalim? Kalu Yaku bantile komo monondok, bulaando komuyu moaki poanggayo Yaku?

⁴⁷Mian moluwedoi Mian Bisa, molongol Mian Bisa nabantilan. Bai komuyu bolikon doi Mian Bisa, tobikon doiya komuyu aki poyase molongol.”

⁴⁸Yahudi mianodoo timbiliyo Yesus, “Aki kai nakala komai bantilan baikon Ikoo Samaria miano mo inusoki setan?”

⁴⁹Yesus timbiliyo, “Yaku aki kuinusoki setan. Yaku odotiiyo ko Tamanggu, bai komuyu totulaiyo Yaku.

⁵⁰Yaku aki kumounggolii pongodotiian motuuk doi Yaku. Daano komeeng komo kakaatenggene Kutongodotiian tukon Yanamo komo mongukum.

⁵¹Bisa tuuno Kubantilan nia, mian mo loloiyo Kubantilan, posidutukon aki namate.”

⁵²Maka Yahudidoo miano bantile doi Yesus, “Budodoiya kami toiyo Ikoo nia bisa-bisa moinusoki setan! Abraham lapamo mate, bunomo lakon sasaibino konabi. Bai Ikoo bantile, ‘Mian mo loloiyo Kubantilan, posidutukon aki namate.’

⁵³Kalu Abraham susuungo lapamo mate, tukon sasaibino koidan konabi lapamo mate, Ikoo nia indee? Bulaando Ikoo molobian babasal tukon tamanggami Abraham!”

⁵⁴Yesus timbiliyo, “Andeno Yaku mounggolii tongodotiian motuuk doi butong-Ku susuunggu, pongodotiianoo akiyo kotakoso. Komo odotiiyo Yaku doiyamo Tamang-Ku komuyu mo aanggene po Mian Bisa,

⁵⁵banggokai komuyu aki potingoniiyo Yana. Bai Yaku tingoniiyo Yana. Andeno Yaku bantile baikon Yaku aki kutingoniiyo Yana, maka Yaku meeng komian mokala-kala, pokakana buno komuyu. Yaku tingoniiyo Yana, tukon loloiyo Konabantilan.

⁵⁶Kotamamu Abraham sanaang tuuno baikon yana naikon kitayo Kutempo. Yana lapamo kitayo tukon yana sanaang!”

⁵⁷Maka Yahudi miano bantil doi Yesus, “Komu umur akiyoon napolong lima kolono kotaun, tukon lapamo Ikoo kitayo Abraham?”

⁵⁸Yesus timbiliyo, “Bisa Yaku bantile doi komuyu: akiyoon Abraham nasinuung, Yaku daanomo.”

⁵⁹Maka Yahudi mianodoo mangala batu sulano napoo sakule; bai Yesus basookon, maka Yana taus tinggalemo ko Temeneno Na Bonua.