Read Banggai YOHANES 9 Bible Online

YOHANES 9 - Banggai bible

YOHANES 9

¹Singgatoo Yesus ampakon, Yana kitayo komeeng komian mopiit salataamo doi nasinuungan.

²Pololaing-pololaing Yesus mansadai doi Yesus, “Tama Guru, bulaando naiya mian nia mosinuung piit? Oilakai yana susuungo nalalim kabai tamano tinano daano kona lalim?”

³Yesus timbiliyo, “Yana piit bolikon nalalim susuungo kabai lalim doi naorangtua, bai sulano komian nanggoola kitayo ko Mian Bisa nakuasa mobalimang doi butongo lalomo.

⁴Kalu akiyoon nakaput, kita sio nda limange Yana nalimang mo sumboliiyo Yaku. Popook naikon lubato, akiyo komeeng komian monggoola balimang.

⁵ Kalu Yaku daanoon doi dunia, Yakumo komadialan dunia.”

⁶Sambuno Yana bantile buno doiya, Yesus batupekon doi buta, tukon pokobuikene dona tupedoo tukon buta. Boobus Yana itosiikene doi mianoo mopiit matano,

⁷maka bantile doi yana, “Ampakono kumosiyo kodudusomu doi Kolam Siloam.” (Siloam koalatino ‘Binotokon’.) Maka do mianoo ampakon kumosiyo koduduso. Sambuno yana abali, yana nggoolamo mokita.

⁸Kona pokolanikonan-pokolanikonan tukon mian badaang mo akiyoon doiya kitayomo mobakabi-kabi, sasaibino bantile, “Bolikon kai yana nia domianoo mo tolongo osulang maka nabakabi-kabi?”

⁹Daano komo bantile, “Takainomo yana.” Bai daano kobailon mo bantile, “Bolikon, yana tongo posialung do mianoo.” Bai do mianoo susuungo bantile, “Yakumo nia.”

¹⁰“Bulaando kona tealian ikoo moola monggita?” yanila bantile doi yana.

¹¹Yana timbiliyo, “Mian mo sinombuikon Yesusdoo komo mongkubai lapetak kidik, maka solitikene doi matanggu tukon bantile, ‘Ampakono kumosiyo kodudusomu doi Kolam Siloam.’ Maka yaku ampakono. Tukon sambuno yaku kumosiyo kodudusonggu, yaku nggoolamo mongkita.”

¹²“Inaando do mianoo?” yanila mansadai. Yana timbiliyo, “Aki kutoiyo.”

¹³Oloyodoo daano oloyo Tadean tempono Yesus pokobuikene kobuta tukon natupe kona kubaiyano do mianoo mopiit teali mongkita. Maka do mianoo budodoo mopiit binaba doi Parisi mian-miano.

¹⁵Mau yanila mansadaikene doi yana bulaando ikoo monggoola mongkita. Yana timbiliyo, “Yana abese kolapetak doi matanggu, maka yaku kumosiyo tukon yaku nggoolamo mongkita.”

¹⁶Moimoiya ko Parisi mianodoo bantile, “Aki nabisa mian mo kubaiyo nia kona luwean doi Mian Bisa, sabab Yana aki naodotiiyo kooloyo Tadean.” Bai komian bailon bantile, “Bulaando kona tealian mian mo daano kona lalim monggoola kubaiyo komo minasaindinggon-minasaindinggon pokakana naiya?” Maka tealimo koponggeelekiyan doi yaniladoo napikilan.

¹⁷Maka Parisidoo miano mansadai koidan doi mianoo, “Oila komu palaat kaliangano yana mo kubaiyo ikoo teali mongkita?” “Yana nabi,” do mianoo nabantilano.

¹⁸Bai kopamarenta Yahudi aki napoyase anggayo baikon do mianoo tau-tausono piit tukon budodoiya nggoolamo mongkita. Tobikon doiya yanila uange koorang tua,

¹⁹tukon mansadaikene, “Kai bisa naiya mupau ikoo mo bantile sinuung piit? Bulaando yana nggoolamo mongkita diabudodoo?”

²⁰Do miano tinano tamano timbiliyo, “Takainomo naiya pau nia mai pau; tukon doi nasinuungan tausono piit.

²¹Bai bulaando kona tealian yana monggoolamo mongkita diabudodoo, kami aki mai toiyo. Tukon indee komo kubaiyo yana teali mongkita, mau doiya aki mai toiyo. Posadaiyomo doi yana, yana babasalo; yana nggoolamo timbiliyo susuungo.”

²²Tinano tamano do mianoo bantile buno doiya sabab yanila matakutene kopamarenta Yahudi; sabab yaniladoo lapamo pomeenggon, baikon indee miano komo akuiyo Yesus doiyamo ko Tomundo Pasalamat, akimo nanggoola usok doi bonua kaledaan.

²³Doiyamo kosababpo do mianoo tinano tamano bantile, “Yana babasalo; posadaiyomo doi yana.”

²⁴Maka yanila uange koidan do mianoo mo piit, tukon bantile doi yana, “Batotopimo baikon naikon bantile komo bisa. Kami toiyo do mianoo mian baladosa.”

²⁵“Kai Yana daano kona lalim kai kiyo,” do mianoo timbiliyo, “yaku aki kutoiyo. Bai meeng kolangge yaku motoiyo; loolukon yaku piit, budodoiya yaku mongkitamo.”

²⁶Maka yanila bantile koidan doi yana, “Yana mongkubai oila doikoo? Bulaando Kona kubaiyano ikoo moteali mongkita?”

²⁷Miano timbiliyo, “Lapamo yaku salitayo doi komuyu, bai komuyu aki poyase mondongolii. Bulaando komuyu yase mondongolii koidan? Ugaate mau komuyu yase teali Napololaing-pololaing koidan?”

²⁸Maka yanila totosiiyo yana tukon bantile, “Ikoomo Kona pololaing; kami bolikon! Kami pololaing Musa.

²⁹Kami toiyo baikon ko Mian Bisa lapamo posalitai Musa. Bai do mianoo, kami aki mai toiyo inaando Kona luwean.”

³⁰Do mianoo timbiliyo, “Heran tuuno baikon komuyu moaki potoiyo inaando Kona luwean, bai kai Yana lapamo kubaiyo yaku nggoola mongkita.

³¹Kita toiyo baikon ko Mian Bisa aki namolongol mian modaano kona lalim, bai tolongo mian mo odotiiyo ko Mian Bisa, tukon kubaiyo Kona mongiasan.

³²Salataamo dunia nadaanoan akiyoon nasidutu tololongol daano komian mo kubaiyo komian sinuung piit moteali mongkita.

³³Kalu do mianoo bolikon doi Mian Bisa, Yana naikon aki nanggoola mongkubai oioila.”

³⁴Yanila timbiliyo, “Oila? Ikoo moono tukon lalim salataa musinuungan, ikoo yase otunggule kami?” Maka doiya kotempono yana akimo napinataikon usok doi kaledaan.

³⁵Yesus lengele baikon yanila siikayo do mianoo doi bonua kaledaan. Yana unggoliiyo do mianoo maka bantile doi yana, “Oilakai ikoo anggayo do Manusiadoo na Pau?”

³⁶Mianoo timbiliyo, “Indee Yana, Tuan? Tulung botiikanaku sulano yaku anggayo Yana.”

³⁷“Ikoo lapamo kitayo Yana,” Yesus timbiliyo, “Yanamo diabudodoo modaano pobasalitai tukon ikoo.”

³⁸“Yaku anggayo, Temeneno,” mianoo bantile, maka sosuba doi Yesus salaano.

³⁹Yesus bantile, “Yaku lubat doi dunia nia motindokiiyo; sulano mian mo piit nggoola mongkita, tukon mian monggoola mongkita teali piit.”

⁴⁰Moimoiya ko Parisi miano mo daano idoo lengele Yesus mobantile buno doiya, maka yanila mansadai doi Yana, “Komu makisuut kami nia piit koidan?”

⁴¹Yesus timbiliyo, “Andeno komuyu piit, komuyu akiyo kopoo lalim. Bai sabab komuyu bantile, ‘Kami mongkita,’ koalatino komuyu daano kopo lalim.”