Read Banggai RASUL-RASUL SALITANO 5 Bible Online

RASUL-RASUL SALITANO 5 - Banggai bible

RASUL-RASUL SALITANO 5

¹Bai daano komeeng komala-malane kosambuno Ananias. Yana tukon kona boloki kosambuno Sapira, mabalukon koidan soobos kobuta yanila koona.

²Doy kopongolinodoo kosoobos yana taane tuuk butongo susuungo tukon kobailonggon yana salakanggene doi rasul-rasul. Yana lakukanggene doiya tukon potoikono kona boloki.

³Maka Petrus bantile doi yana, “Ananias, bulaando ikoo mosodiiyo ko Ibiliis nakuasaiyo konoamu, polong ikoo bakala-kala doi Mian Bisa Na Roh, tukon aki mubiyok-biyok ikoo taane tuuk butomu susuumu kosoobos do doydoo moluwedoi babalukanan butadoo?

⁴Do butadoo doiya koomu moakiyoon ikoo mubalukene. Tukon sambuno lapamo do butadoo binalukon, kodoyno daanoon koomu koidan. Jadi bulaando modaano komu makisuut doi noamu lalomo sulano mukubaiyo komo buno doiya? Bolikon banggapi komu kinaakalai bai Mian Bisa!”

⁵Sambuno Ananias lengele do bantilan-bantilanoo, yana tolubang, polaing mate. Sasaibino komian mo lengele tentang doiya kadadianoo teali matakut.

⁶Maka kotabo-tabo lubat balune Ananias bajano, tukon yanila babayo doi tonggulung sulano natinading.

⁷Uga-ugaate tolu kojam koidan kona boloki usoko. Yana aki natoiyo oila komo sodo lapa nateali.

⁸Petrus bantile doi yana, “Soba bontiikene doi yaku; Oilakai do butadoo ikoo tukon mulangkai mobalukenedoo, tolongo buno naiya koolino?” “Bisa, doiyamo koolino,” Ananias naboloki napotimbili.

⁹Maka Petrus bantile doi yana, “Bulaando ikoo tukon mulangkai mopomeenggon sulano posobaiyo ko Temeneno Na Roh? Mulengele! Komian mo tadine komu langkai lapamo abalimo. Yanila naikon babayo ikoo koidan doi tonggulung.”

¹⁰Tempodoo koidan Ananias nabolokidoo tolubang tukon mate doi Petrus salaano. Tukon tempo mian do tabo-tabodoo usok, yanila pososuunggene yana lapamo mate. Maka yanila babayo kobajano doi tonggulung tukon yanila tadine doi nalangkai kibulo bibilo.

¹¹Maka sasaibino komian manganggadoo tukon komian bailonggon mo lengele tentang do kajadianoo yanila tealimo matakut.

¹²Tobikon rasul-rasul nabaleleanian maka badaango komominasaindinggon tukon langge-langge modeikon lobo teali doi antara masarakat. Tukon pomeenggon noa sasaibino komian momangangga bakombul doi Salomo na Gandaria doi Temeneno Na Bonua.

¹³Tukon mian bailon akiyo komo barani lubat pototongi tukon do mianoo manganggamo. Bai do mianoo manganggamo inodotii tuuno doi masarakat.

¹⁴Tukon pololokon malumbit pololokon tosuungi badaang komian mo mangangga doi Temeneno — mau mala-malane mau kai boine.

¹⁵Tobikon dokaadaannoo motealimo buno doiya, tobikon komian moseselon inabos doi namooloan bungkukono kai doi nabalayon, maka nakinanggi doi loloon, sulano yanila mau nabaino soisik moola kanakon Petrus momokouno, kalu Petrus alon idoo.

¹⁶Potutuundu ko mian-mian molubat doi kampung-kampung Yerusalem naponggaupan. Yanila babayo komian mo seselon tukon mian mo inusoki ibiliis. Tukon dopai mianoo sasaibino tinangalinggon.

¹⁷Doibundu imam babasal tukon sasaibino kona pololaing-pololaing, doiyamo motongusokon Saduki miano, tambuuno mangala tindakan, sabab yanila masakito konoano.

¹⁸Rasul-rasuloo linako, maka binaba tukon inusokon doi talunggu lalomo.

¹⁹Bai dopopokoo meeng ko Temeneno namalaekat bukayo kotalunggu tataapono, maka babayo do rasul-rasuloo tobuat. Malaekatoo bantile doi rasul-rasuloo,

²⁰“Poampakono pokokondong doi Temeneno Na Bonua tukon popailukene komian kotuboan tentang mo boolu nia.”

²¹Maka do rasul-rasuloo yanila loingiyo do malaekatoo nateteba. Dowa-dowa tuuno yanila ampakono doi Temeneno Na Bonua tukon mulaimo yanila bangotunggul idoo. Daano buno doiya imam babasal tukon napololaing-pololaing lubat, maka kubaiyo kolapat babasal tukon pamarenta Yahudi. Doibundu yanila mosumbolii mian moampakon ndokiiyo dopai rasul-rasuloo doi talunggu lalomo sulano nabinaba mangadap doi yanila.

²²Bai sambuno dopai mian-mianoo mo sinumbolii polong doi talunggudoo, yanila akimo napolaate do rasul-rasuloo idoo. Jadi yanila abalimo, maka yanila lapurkanggene doi pangadilan.

²³“Doi tempo kami polong doi talunggudoo,” yanila bantile doi lapatoo lalomo, “kami laate kotalunggu tataapono daano motosupat mono-monondok, tukon kopadagai daanoon modagaiyo kotataapon. Bai salataa kami bukayo do tataaponoo, kami aki mai laate mau nabaino meeng komian doi talunggudoo lalomo.”

²⁴Salataa dosuludadudoo padagai Temeneno Na Bonua tukon imam-imam kapalano lengele do lapuranoo, yanila pusinggenemo do rasul-rasuloo tentang tukon matakut naikon oila komo moola teali.

²⁵Doibundu lubat komeeng komalane mobabayo kobilita nia, “Polengele! Dopai mianoo Tuan-tuan mo taane doi talunggudoo budodoiya daanoon mobangotunggul doi mian badaang doi Temeneno Na Bonua!”

²⁶Maka do suludadudoo padagai Temeneno Na Bonua pososinggat kona padagai-padagai ampakono mondokiiyo do rasul-rasuloo koidan. Bai yanila aki napakisaayo do rasul-rasuloo, sabab yanila matakutene domianoo mobadaang; inai-inaikene dopai mianoo mobadaang naaki napoo sakule yanila tukon batu.

²⁷Rasul-rasuloo binaba usok mangadap doi pangadilan. Maka imam babasal palesayo yanila.

²⁸ Yana bantile, “Lapamo kami pantane komuyu tukon momoonas sulano komuyu akimo pobangotunggul doi Mianoo. Bai budodoiya soba pokitayo oila kopo kinubaidoo! Komuyu sialkanggene kopoo otunggul doi kampung-kampung sasaibino doi Yerusalem miano, tukon komuyu tuduwe baikon kami komo mangaanikene kona matean do Mianoo.”

²⁹Petrus tukon dorasul-rasuloo bailon timbiliyo, “Kami sio mai tulutiyo ko Mian Bisa tukon bolikon tulutiyo komanusia.

³⁰Yesus, komuyu mo sempanggene, lapamo inotuboi koidan doi namatean doi tumbunggita na Mian Bisa.

³¹Tukon ko Mian Bisa lapamo beena doi Yana kadudukan tukon kakuasaan mo tatandak teali Katua tukon Pasalamat; sulano kobangsa Israel binee todanan mobadodoloon doi napolalim-lalim tukon malaat kaampunan.

³²Kamimo Nasakisii-sakisii tentang sasaibinodoo — kami tukon koidan Mian Bisa Na Roh mo Mian Bisa beekene doi mian-mian mo tulutiyo Naparenta.”

³³Salataa koanggota-anggota Pangadilan Agama ndongoliiyo doiya, yanila nggimal tuuno, tukon yanila pomeenggon moakateyo do rasul-rasuloo.

³⁴Bai doi antara anggota-anggota pangadilan daano komeeng ko Parisi miano kosambuno Gamaliel. Yana guru agama mo inangga tuuno doi sasaibino komian. Yana kokondong maka mobintokon mian mobabayo tobuat loolukon do rasul-rasuloo.

³⁵Doibundu yana bantile doi Pangadilan Agama, “Utus-utus Israel miano! Popikikene namono-monondok tentang oila komo Utus-utus naikon lakukanggene motuuk doi mian nia.

³⁶Sabab loolukon biasa sumbut Teudas, mo anggape kobutongo mian babasal, tobikon uga-ugaate sangkap kosakato komian momalaing yana. Bai yana inakate tukon sasaibino kona pololaing-pololaing pobabandakono, tukon kona kagiatan lapus.

³⁷Lapa doiya, doiya kosinggatoo daano konatinulis, sumbut koidan Yudas, Galilea miano. Tobikon napengaruh, badaang koidan komian mo malaing yana. Bai yana koidan inakate, tukon sasaibino kona pololaing-pololaing pobabandakono.

³⁸Jadi budodoiya tukon naiya kadadian nia, daku otunggul buno naiya: inai pokubaiyo oioila naiya mian nia, posodiiyomo yanila. Sabab kalu otunggul tukon kagiatan yanila nia luwedoi banggapi, maka otunggul tukon do kagiatanoo naikon lapus.

³⁹Bai kalu doiya lubat luwedoi Mian Bisa, maka Utus-utus aki naikon namoola kalayo yanila. Bai naikon totingonii baikon Utus-utus tutumbokiiyo ko Mian Bisa.” Gamaliel naotungguloo tinalima doi pangadilan.

⁴⁰Maka do rasul-rasuloo inuang, maka inumbas, doibundu pinantan momongotunggul koidan tentang Yesus. Lapamo doiya, maka nasodo yanila sinodii.

⁴¹Rasul-rasuloo tinggalemo do Pangadilan Agama tukon laba-laba sabab ko Mian Bisa lapamo toiyo yanila sio namalaat pototulai sabab Yesus.

⁴²Tukon samba-samba kooloyo doi Temeneno Na Bonua tukon doi mian nabonua, yanila banggadudul bangotunggul tukon babulitakanggene ko Bilita Monondok tentang Yesus baikon Yanamo ko Tomundo Pasalamat domo pinaladandikonoo.