Read Banggai YOSUA 1 Bible Online

YOSUA 1 - Banggai bible

YOSUA 1

¹Sambuno lapa konamatean Musa, TEMENENO napeleleanidoo, TEMENENO basilingan doi Musa nawakil, doiyamo Yosua Nun napau.

²TEMENENO bantile, “Musa Kupeleleani matemo. Maka diabudodoo tadumokai ikoo tukon sasaibino ko Israel miano nabato-batotobo sulano napintosiiyo ko Yordan Paisunobatango, tukon usokiyomo kotano Yaku mobeekene doi yanila.

³ Yaku lapamo bontiikene doi Musa baikon sasamba kowilayah kopo dinadang lapamo kubeekene doi komuyu, Yosua, tukon sasaibino Dakumian.

⁴Komulipu naikon tobuko bebelan luwedoi padang lalomo doi lalom polong doi Libanon Bunggulo doi lembet tukon luwedoi Efrat Paisunobatango mo babasaloo doi tolopot banggadudul tousokon kobangsa Het natano polong doi Tobun Tanga taalikon doi talise.

⁵ Maumeeng komiankai akiyo naikon komo moola lungguiyo ikoo, Yosua, polong mupomatekon. Sabab Yaku naikon sidutu loolainge ikoo pokakana doi loolukonoo Kuloolaingano Musa. Yaku aki naikon Kuotinggalon.

⁶ Siokai muanggayo tukon barani, sabab ikoo naikon katuaiyo nabangsa nia doi tempo napodungoliyano kolipu yaku mo dandikenemo doi tumbunoila.

⁷Tongo, siokai mututuu anggayo tukon barani. Ikoo sio mudagaiyo sulano ikoo muanggayo sasaibino koukum mo bineekon doi komuyu luwedoi Musa kupeleleanidoo, inai motomilinggene mau natongo soisikai, maka ikoo naikon teali monondok.

⁸Dokubuku hukumoo sio nasidutu ikoo bacakanggene doi Kumian. Palajariyomo dobukudoo oloyo tukon popook, sulano nasidutu ikoo lakukene sasaibino komo totulis doi lalomo. Kalu ikoo lakukene sasaibino doiya, komutuboan naikon sanaang tukon monondok.

⁹Neneeke, Yaku lapamo palentakene doikoo sulano mututuu anggayo tukon barani! Inaikai momatakut kai mbeeng komu samangat, sabab Yaku TEMENENO mu Mian Bisa loolainge ikoo doiyaandomo tolong komu ampakonan.”

¹⁰Maka Yosua palentayomo ko Israel miano nakatua-katua

¹¹sulano naboilingiyo sasaibino ko Israel miano nabasandungan tukon beekene napalenta nia, “Posadiayo komandu, sabab baino tolu kooloyo koidan komuyu sio popintosiiyomo ko Yordan Paisunobatango sulano podungoliyo kotano TEMENENO mu Mian Bisa mo beekenemo doi komuyu.”

¹² Doi Ruben nabenseno, Gad nabenseno, tukon sembeleng Manasye nabenseno, Yosua bantile,

¹³“Poneneeke! Musa TEMENENO doo napeleleani lapamo bantile doi komuyu baikon kobuta mo taalikon doi tolopot ko Yordan Paisunobatango nia TEMENENO mu Mian Bisa beekenemo komuyu sulano nateali mulipu.

¹⁴Sasaibino kopau muboloki tukon muiyayon piniala moola nadungol naimbaa, bai sasaibino kosuludadu-suludadu sio nabatotobo poolobosi tukon loolukoniyo ko Israel miano bailonggon mopintosiiyo ko Yordan Paisunobatango.

¹⁵Komuyu sio potulungiyo yanila polong yanila nadungoliyano kobuta taalikon doi talise ko Yordan Paisunobatango nia ko TEMENENO mu Mian Bisa mobeekenemo doi yanila. Sambunolapa ko TEMENENO beekene kokaamanan doi posaapon kobangsa Israel maka nasodo komuyu moola abali doi mutano susuumu doi taalikon tolopot nai Yordan nia, Musa TEMENENO napeleleanidoo mobeekenemo doi komuyu.”

¹⁶Maka Ruben nabenseno, Gad tukon sembeleng Manasye nabensenodoo timbiliyo, “Oila tolong komu pinalentakon doi kami, kami naikon lakukene, tukon doiyaandomokai komu sumboliiyano kami moampakon, kami naikon taus.

¹⁷Kami naikon taatiyo doikoo, bunopokakana kami koidan sidutu taat doi Musa. Boliisi ko TEMENENO mu Mian Bisa naloolainge ikoo pokakana Yana naloolaingano Musa!

¹⁸Sasamba komian mo aki naiyase somba doi mukakuasaan, kai aki naloingiyo komupalenta, naikon inukum mate. Siokai mututuu anggayo tukon barani!”