Read Banggai YOSUA 10 Bible Online

YOSUA 10 - Banggai bible

YOSUA 10

¹Adoni-Zedek, tomundo Yerusalem, lengele baikon Yosua lapamo lambase tukon manasemo tuuno kokota Ai, tukon akateyomo kotomundono pokakana komo lapamo nalakukanggene motuuk doi Yerikho tukon tomundono. Yana lengele koidan baikon ko Gibeon miano lapamo mokubai perjanjian poosobatan tukon ko Israel miano tukon podungolimo yanila.

²Ko Yerusalem tumbuno matakut tuuno, sabab ko Gibeon daanokai kota mo babasal; pokakana konakabasal tukon kokota-kota mo daano kotomundono, tukon lobiyoniiyo konababasalan ko Ai. Komian-mianokai pejuang-pejuang mo pandoy polobosi.

³Tobikon doiya Adoni-Zedek mosumbolii mian doi Tomundo Hoham doi Hebron, tomundo Piream doi Yarmut, tomundo Yafia doi lakhis, tukon tomundo Debir doi Eglon tukon kanggiyo nateteba nia,

⁴“Maimo potomboniiyo yaku molobosiyo ko Gibeon, sabab komian-miano lapamo mokubai perjanjian posobatan tukon Yosua tukon Israel miano.”

⁵Maka do tomundo Amoridoo molima doiyamo tomundo Yerusalem, Hebron, Yarmut, Lakhis tukon Eglon pototongi, maka tukon sasaibino yanila nasuludadu, yanila tikumemo tukon lobosiyomo ko Gibeon.

⁶Ko Gibeon miano kapatuwo nabilita nia doi Yosua doi basandungan doi Gilgal, “Inai mosodiikene kami basusuunganggon, Tuan! Lubatokai mosobit mutomboniiyo kami, sabab luwedoi sasaibino ko tomundo Amori nasuludadu doi lipu mobunggul-bunggul lapamo pototongi molawane kami!”

⁷Maka Yosua tukon sasaibino kosuludadu, tongusokon konapasukan-pasukan mo monondok tuuno, lengget luwedoi Gilgal tuuk mopolobosi.

⁸TEMENENO bantile doi Yosua, “Inai matakutene doi yanila. Kokamanaangan lapamo kubeekene doikoo, tobikon doiya akiyo komeeng komiankai luwedoi yanila momoola bataanggon molawane ikoo.”

⁹Sasamba kopopook Yosua tukon konapasukan palabiyok luwedoi Gilgal taus doi Gibeon, maka lobosiyo ko Amori miano tukon sosinggot.

¹⁰Ko TEMENENO kubaiyo ko Amori miano teali pusing salataa kitayo ko suludadu Israel. Badaang ko Amori miano mo inakate doi Gibeon, tukon komo daanoon motubo linolonggon obulisiyo kobunggul pepelako doi Bet-Horon polong konaodoonan doi Azeka tukon Makeda doi lalom sembeleng.

¹¹Doi tempo ko Amori miano modaanoon moobulusiyo dobunggul pepelakodoo sabab dambasene kobutongo luwedoi Israel nasuludadu, ko TEMENENO otuwenge koudan es mo babasal moluwedoi timbu doi yanila popupuson kololoon polong doi Azeka. Komo mate motinikal do udan esoo dodoon lobian badaang luwe komo inakate doi Israel miano.

¹²Doi oloyodoo salataa ko TEMENENO beekenemo komanaangan doi Israel miano tuuk doi Amori miano, Yosua basilingan doi TEMENENO. Tukon doi Israel miano salaano, Yosua bantile, “Eh kooloyo matano! Tademokai doi Gibeon bunggono. Tukon ikoo kobituwon! Inaimokai mobiyol luwedoi Ayalon Pepelako bunggono.”

¹³ Maka tademo kooloyo matano tukon kobituwon akimo nabiyol polong ko Israel lapamo lapa lungguiyo konamusu-musu. Nakadadian nia totulis doi Yasar na Buku lalomo. Meeng kooloyo mosopok kooloyo tade doi timbu tanga-tangano, tukon malumbit tuuno maka nasosoop.

¹⁴Aki nabiasa moteali tukon koidan aki naikon nateali komeeng kooloyo mopokakana dooloyodoo, baikon ko TEMENENO loingiyo kobanggapi namongiasan. TEMENENO polobosi ala doi Israel!

¹⁵Sambunolapa dopolobosianoo, Yosua polaing-laing konasuludadu abalimo doi basandungan doi Gilgal.

¹⁶Bai kolima dotomundo Amoridoo luput tukon basookon doi meeng koleeng lalomo doi Makeda.

¹⁷Komian kitayo yanila, tukon pailukenemo konapolipu basookonan doi Yosua.

¹⁸“Nggolingikene kobatu-batu babasal doi leengoo babano, tukon beena padagai idoo,” Yosua nabantilano,

¹⁹“bai komuyu inai potade idoo. Polelenggenemo banggadudul, tukon polobosiyomo yanila luwedoi tonggulungoila; inai batadikene yanila nausok doi napokota-kota! TEMENENOo mu Mian Bisa lapamo beekene kokamanaangan doi komuyu luwe yanila.”

²⁰Yosua tukon ko Israel miano akateyo ko Amori mian-mianodoo, bai daano koidan doi antara yanila komo bulen doinapoo kota moumbolii soopan, sampe aki natangakate.

²¹Doibundu sasaibino Yosua nasuludadu abalimo tukon salamat doi Yosua doi basandungan doi Makeda. Akiyo komeeng komiankai doi tanodoo komo barani mabantil oioila tuuk motantange ko Israel miano.

²²Sambunolapa doiya Yosua bantilemo, “Budodoiya bukayomo doleengoo babano tukon babayomo doisumai dotomundodoo molima.”

²³Doleengokai binukamo, maka kotomundo-tomundo Yerusalem, Hebron, Yarmut, Lakhis tukon Eglon tinobuatonggon doi leengo,

²⁴tukon binabamo doi Yosua. Maka Yosua uange sasaibino ko Israel miano napototongi, doibundu maparentakene sulano kosuludadu-suludadu kapalano momalaing polobosi tukon yana lubat momopiik dotomundo-tomundodoo bulungo batango, koperwira-perwiradokai lubat tukon mopiik dotomundo-tomundodoo bulungo batango.

²⁵Sambunolapa doiya, Yosua bantilemo doi sasaibino kosuludadu kapalano, “Inai mobata-bata tukon momatakut. Siokai komuyu poyakin tukon barani, sabab bunonaiyamo ko TEMENENO naikon konalakukangganano sasaibino komumusu.”

²⁶Maka Yosua akateyomo dotomundo-tomundodoo tukon isene yanila doi lima kosudong. Kobajanoila binatadikono idoo polong kinobian.

²⁷Doi tempo nasosoopan kooloyo matano, luwe Yosua napalenta, dobajan-bajanoo inobulusono maka nasinakukon doi leeng lalomo dotomundo-tomundodoo mopakeyo napobasookonan budodoo. Doibundu dobatu babasal-babasaloo inaboso doi leengoo babano. Polong budodoiya dobatu-batudoo daano idoo.

²⁸Doi oloyodoo Yosua lobosiyo ko Makeda, tukon lungguiyomo dokotadoo polong tomundono. Sasaibino dokotadoo tumbuno inakatemo; akiyo komeeng komiankai mosinodiinggon tubo. Yosua lakukanggene kotomundo Makeda buno pokakana kona lakukangganano kotomundo Yerikho.

²⁹Sambunolapa doiya, Yosua tukon konasuludadu palabiyoko banggadudul luwedoi Makeda taus doi Libna tukon lobosiyo ko Libna.

³⁰TEMENENO beena koidan namanaangan doi Israel miano luwedoi kota nia tukon kotomundono. Akiyo komeeng komiankai komo sinobiikon tubo; sasaibino komian doi kotadoo lalomo inakatemo. Yosua lakukanggene dokotadoo tomundono pokakana kona lakukangganano kotomundo Yerikho.

³¹Doibundu Yosua tukon konasuludadu maju luwedoi Libna taus doi Lakhis. Yanila tikume dokotadoo maka napolobosiyo.

³²TEMENENO beekenemo doi Israel miano komanaangan luwedoi Lakhis doi polobosian lalomo doi oloyodoo koluano. Oila konapo kinubai doi Libna, yanila lakukanggene koidan Lakhis; akiyo komeeng komiankai komo sinodiinggon tubo, sasaibino inakatemo.

³³Horam, Gezer tomundono lubat motomboniiyo ko Lakhis, bai Yosua lungguiyo yana tukon konasuludadu; akiyo komeeng komiankai komo totinggal, sasaibino mate.

³⁴Boobus koidan, Yosua tukon konasuludadu ampakon doi Lakhis taus doi Eglon maka tikumemo tukon lobosiyomo dokotadoo.

³⁵Doi oloyodoo koidan yanila lambasemo ko Eglon, tukon akateyomo sasaibino komian idoo pokakana konapo linakukanggon doi Lakhis.

³⁶Luwedoi Eglon, Yosua tukon konasuludadu tolibomo doi bunggul tukon ambakono doi kota Hebron, maka yanila lobosiyo

³⁷tukon lambasemo dokotadoo. Kotomundono tukon sasamba komian doikotadoo tukon doi kota-kota bailon doi napoloolanikonan idoo sasaibino inakate. Yosua manasemo kabus sasaibino dokotadoo buno konapo linakukanggon doi kota Eglon. Akiyo komeeng komiankai komo sinodiinggon natubo idoo.

³⁸Sambunolapa doiya, Yosua tukon konasuludadu abalimo tukon lobosiyomo ko Debir.

³⁹Dokotadoo tukon kotomundono tukon sasaibino kokota bailonggon doi napoloolanikonan idoo Yosua lambasemo. Sasaibino komian idoo inakatemo. Yosua kubaiyomo ko Debir tukon kotomundono buno yana nakubaiyano ko Hebron tukon ko Libna maka kotomundono.

⁴⁰Posaapon dotanodoo Yosua kuasaiyomo. Yana lungguiyomo kotomundo-tomundo doi lipu bunggulo, doi bunggul bunggono pepe-pepelako doi tolopot sembeleng, doi bunggul-bunggul uuno doi talise sembeleng, tukon doi padang-padang tambikon lalomo. Akiyo komeeng komiankai komo sinobiinggon natubo; sasaibino inakatemo. Doiya pokokonoy tukon palenta moluwedoi TEMENENO, Israel na Mian Bisa.

⁴¹Yosua lungguiyo kolipu-lipu moluwedoi Kades-Barnea doi lalom sembeleng polong doi Gaza doi napoloolanikonan doi lipu tobun bibilo, tongusokon sasaibino ko Gosyen lipuno, banggadudul polong doi Gibeon doi lembet.

⁴²Tongo idan luunggon doi polobosiano lalomo, Yosua lungguiyo sasaibino dotomundo-tomundodoo tukon lambasemo sasaibino konapo lipu-lipu kinuasai, sabab TEMENENO, Israel na Mian Bisa, polobosi tuuk doi Israel.

⁴³Sambunolapa doiya, Yosua abalimo tukon konasuludadu doi basandungan doi Gilgal.