Read Banggai YOSUA 11 Bible Online

YOSUA 11 - Banggai bible

YOSUA 11

¹Salataa ko Tomundo Yabin moluwedoi Hazor ndongoliiyo tentang Israel namanaangan-manaangan; yana mongutus mian doi Tomundo Yobab luwedoi kota Madon, doi kota Simron tomundo-tomundono tukon Akhsaf,

²doi tomundo-tomundo doi bunggul-bunggul lembet sembeleng, doi Yordan Pepelako tambikon lalom ko Galilea, doi lipu mobunggul-bunggulo uuno, tukon lipu tobun bibilo moloolani ko Dor.

³Yosua koidan mongutus mian doi Kanaan miano doi talise sembeleng tukon doi tolopot sembeleng ko Yordan, doi Amori miano, Het, Feris, tukon Yebus miano doi lipu nabunggokonan, polong Hewi miano doi Hermon Bunggulo uuno doi lipu Mizpa.

⁴Maka pakalubato dotomundo-tomundo doo tukon sasaibino konapo suludadu mobadaang tuuno buno bone doi tobun bibilo. Konapo adalan tukon roda polobosian badaang tuuno.

⁵Sasaibino dotomundo-tomundodoo pototongi tukon polaing-laing molubat momokubai benteng doi naloolanian ko Merom Paisunobatango pauno sulano nalobosiyo ko Israel.

⁶Ko TEMENENO bantile doi Yosua, “Inai matakutene doi yanila. Doi tempo mo buno naiya namodowa, yanila sasaibino yaku akateyomo sabab Israel. Konapo adalan sio kuelemate, tukon konapo roda-roda polobosian sio musuayo.”

⁷Maka Yosua tukon sasaibino konasuludadu lobosiyo domusudoo doi natongosinggangan naloolanian ko Merom Paisunobatango pauno.

⁸Tukon ko TEMENENO kubaiyo ko Israel miano namanaangan doi yanila. Ko Israel miano lobosiyo tukon lelenggene yanila polong konaodoonan doi Misrefot-Maim tukon doi Sidon taalikon lembet, tukon pokakana konaodoonan ko Mizpa Pepelako tambikon doi tolopot. Kopolobosian banggadudul momoonas polong akiyo komeeng komiankai moluwedoi musuh komo totinggal — sasaibino mate.

⁹Yosua lakukanggene komotuuk doi yanila pokokonoi tukon oila komo lapamo TEMENENO palentakene: yana elemate konapo adalan tukon suayo konapo roda-roda polobosian.

¹⁰Sambuno lapa doiya Yosua abali, maka lebuute ko Hasol komo doi tempodoo daanokai komo bukuan doi antara sasaibino kobatomundoan idoo. Dokotadoo sinuwa, polong tomundo tukon sasaibino kotumbuno inakate; akiyo komeeng komiankai mobinatadikon natubo.

¹²Sasaibino dokota-kotadoo Yosua lambase, tukon kotomundo-tomundono linako tukon inakate pokokonoi tukon Musa napalenta, do TEMENENO doo napeleleani.

¹³Bai kokota-kota mokinokondong doi kota-kota lapono bunggono, akiyo komeengkai ko Israel miano nasinua, alaasene Hazor Yosua susuungo mosuayo.

¹⁴Sasaibino dokota-kotadoo tumbuno inakate; akiyo komeeng komiankai mosinobii tubo. Bai sasaibino konabarang-barang modaano koolino tukon konaiyayon piniala ko Israel miano alayomo teali koonila.

¹⁵Sasaibino ko TEMENENO napinalentakon doi Musa, napeleleani, lapamo Musa pelenggene doi Yosua, tukon Yosua, laksanakanggenemo, akiyo komeengkai komo aki nalaksanakanggene.

¹⁶Yosua lambase posaapon dotanodoo lipu doi nabunggokonan, lipu doi bunggul uuno, mau komo doi lembet maukai komo doi lalom, koidan posaapon kowilayah Gosyen tukon lipu mokindolon doi tambikon lalom ko Gosyen, tukon Yordan Pepelako.

¹⁷Dolipudoo nabebelanan tambuun luwedoi Bunggo Mandaluk doi lalom sembeleng loolani ko Edom, polong doi lembet pokakana konaodoonan ko Baal-Gad doi Libanon Pepelako tambikon lalom ko Hermon Bunggulo. Malumbit tuuno Yosua napolobosian tukon kotomundo-tomundo doi lipudoo, bai konapupusan yana lakoyo tukon akateyo yanila sasaibino.

¹⁹Luwedoi sasaibino kokota-kota doi posaapon dolipudoo, akiyo komeengkai kokota komo mokubai perjanjian posobatan tukon Israel, alaasene Gibeon, bangsa Hewi nakota. Sasaibino kota bailon linungguimo doi polobosian lalomo.

²⁰ TEMENENO kubaiyo yanila kakatikase konoano tuuk napolobosian tukon Israel miano, sulano yanila nasinilaka tukon inakate sasaibino akiyo koampun pokokonoi tukon ko TEMENENO napalenta doi Musa.

²¹Doi lounu nia koidan Yosua ampakon moosilakayo kobangsa Enak, doiyamo bangsa mobarani modungol doi lipu mobunggokon — doi Hebron, Debir, Anab, tukon doi posaapon kolipu mobunggokon doi Yehuda tukon Israel. Yanila sasaibino Yosua komo akateyo, tukon konapo kota-kota inakamanas kabus.

²²Akiyo komeeng komiankai moluwedoi bangsa Enakoo komo totinggal doi Israel lipuno, tongo doi Gaza, Gad, tukon Asdod komodaano.

²³Posaapon dolipudoo Yosua lambasemo pokokonoy tukon TEMENENO napalenta doi Musa, maka nabineekon doi bangsa Israel teali koonila nalangge. Dotanodoo inobos-obos, tukon sasamba kobenseno malaat meeng koobos. Kobangsa Israel kai tademo mopolobosi tukon konapo tano amano tuuno.