Read Banggai YOSUA 12 Bible Online

YOSUA 12 - Banggai bible

YOSUA 12

¹ Lipu motaambikon doi tolopot sembeleng ko Yordan luwedoi Arnon Paisunobatango pepelako banggadudul liba doi Yordan Pepelako polong pokakana konaodoonan ko Hermon Bunggulo doi lembet sembeleng, lapamo linambas tukon Israel miano dungoliyomo. Daano kolua kotomundo yanila molungguiyomo.

²Komeeng komian kosambuno Sihon, tomundo Amori konadungolan doi Hesybon. Konalipu konuasai talalaing ko Gilead lipuno sembeleng: doiyamo luwedoi Aroer (doi Arnon Pepelako bibilo) tukon kota doi pepelakodoo tanga-tangano polong pokakana konaodoonan ko Yabok Paisunobatango doi napokalalatanan kobangsa Amon nalipu;

³koidan talalaing ko lipu Yordan Pepelako tambikon tolopot, luwedoi Danau Galilea tambikon lalom polong doi Bet-Yesimot (doi tambikon tolopot ko Tobun Mate), banggadudul doi Bunggulo Pisga aino.

⁴Kotomundo bailon kobangsa Israel molungguiyo doiyamo Tomundo Og luwedoi tano Basan, mo tongoduduk doi Asytarot tukon Edrei. Yana daano meeng komian mo totinggal moluwedoi bangsa Refaim.

⁵Konalipu kinuasai talalaing ko Hermon Bunggulo, Salkha, tukon posaapon ko Basan polong pokakana konaodoonan kolipu Gesur tukon Maakha; koidan talalaing ko Gilead lipuno sembeleng pokakana konaodoonan ko Tomundo Sihon nalipu kinuasai doi kota Hesybon.

⁶ Doiyamo dotomundodoo molua Musa molungguiyo polaing-laing ko bangsa Israel. Dotomundo-tomundodoo nabuta bineekono Musa, do TEMENENO doo napeleleani, doi Ruben nabenseno, Gad tukon Manasye nabenseno sembeleng, tuuk teali yanila namilik.

⁷Tomundo-tomundo Yosua molungguiyo polaing-laing kobangsa Israel doiyamo sasaibino kotomundo-tomundo doi lipu tambikon talise ko Yordan Paisunobatango luwedoi Baal-Gad doi Libanon Pepelako banggadudul polong doi Bunggo Mandaluk tambikon doi lalom loolani ko Edom. Dolipudoo Yosua ebes-ebesemo doi bangsa Israel bense-benseno tuuk moteali napobuta.

⁸Dolipudoo talalaing kolipu bunggul-bunggulo, lipu doi bunggo uuno doi talise sembeleng, Yordan Pepelako tukon lipu bungkokon uuno, lipu eya-eyaakono doi tolopot sembeleng, tukon lipu padang lalomo doi lalom sembeleng. Dolipu-lipudoo daanokai bekas lipu tampat nadungolan kobangsa Het, Amori, Kanaan, Feris, Hewi tukon Yebus.

⁹Kotomundo-tomundo molinunggui, sasaibino konakadaang tolu kolono meeng komian: doiyamo tomundo-tomundo moluwedoi kota-kota nia: Yerikho, Ai (loolani ko Betel), Yerusalem, Hebron, Yarmut, Lakhis, Eglon, Gezer, Debir, Geder, Horma, Arad, Libna, Adulam, Makeda, Betel, Tapuah, Hefer, Afek, Lasaron, Madon, Hasor, Simron-Meron, Akhsaf, Taanakh, Megido, Kedes, Yokneam (doi Karmel), Dor (doi tobun bibilo), Goyim (doi Galilea) tukon Tirza.