Read Banggai YOSUA 13 Bible Online

YOSUA 13 - Banggai bible

YOSUA 13

¹Budodoiya Yosua motuamo tuuno. TEMENENO bantile doi Yosua, “Ikoo motuamo, Yosua! Bai daano badaang kolipu mo sio nalinambas.

²Posaapon ko Filistin nalipu tukon Gesur,

³tukon posaapon ko wilayah Awi doi lalom salaano. (Kolipu moluwedoi Sikhor Paisunobatango doi napokalalatanan ko Mesir polong doi napokalalatanan ko Ekron doi lembet sembeleng, sasaibino doiya tongusokon bangsa Kanaan nalipu tukon kotomundo-tomundo Filistin dungol doi Gaza, Asdod, Askelon, Gad tukon Ekron.)

⁴Koidan sio nalinambas: posaapon kolipu Kanaan tukon Meara (bangsa Sidon koona), polong doi Afek doi napokalalatanan kobangsa Amori nalipu;

⁵koikoidan kobangsa Gebal nalipu, tukon posaapon ko Libanon lipuno doi tambikon tolopot, luwedoi Baal-Gad tambikon doi lalom ko Hermon Bunggulo, banggadudul polong doi loloon mo suutiyo doi Hamat.

⁶ Tongusokon koidan posaapon ko Sidon miano nalipu, modungol doi lipu nabunggulan doi napokalalatanan ko Libanon bunggulo-bunggulo tukon Misrefot-Maim.” “Sasaibino dobangsa-bangsadoo naikon sio kusiikayo, doi tempo ko Israel miano nalobosiyano yanila,” ko TEMENENO nabantilano koidan doi Yosua, “Butadoo sio muobosikene ko Israel miano tukon tealimo napo buta, buno komo lapamo Kuparentakene doikoo.

⁷Jadi, budodoiya ebes-ebesemo butadoo doi sio kobangsa Israel benseno lalomo, tukon doi sembeleng moluwe doi Manasye nabenseno, sulano doiya nateali napobuta.”

⁸ Ruben tukon Gad nabenseno tukon sembeleng Manasye nabenseno lapamo mantalima buta obos moluwedoi Musa, do TEMENENO doo napeleleani; doiyamo buta doi tolopot sembeleng ko Yordan Paisunobatango.

⁹Konapo lipu tongusokon ko Aroel (doi Arnon Paisunobatango Pepelako bibilo), tukon kota doi pepelakodoo tanga-tangano. Koidan sasaibino kolipu seanono motatandak moluwedoi Medeba polong doi Dibon

¹⁰tukon polong doi napokalalatanan ko Amon lipuno, tongusokon sasaibino kota mobiasa Sihon kuasaiyo, tomundo Amori, mo tongoduduk doi Hesybon.

¹¹Koidan tongusokon ko Gilead lipuno, lipu napololanikonan ko Gesur tukon Maakha, tukon posaapon ko Hermon Bunggulo, tukon posaapon ko Basan lipuno polong doi Salkha.

¹²Konapolipu talalaing koidan ko Tomundo Og nalipu kinuasai, Refaim miano doi bundu momaparenta doi Asytarot tukon Edrei. Musa lapamo lungguiyo dobangsa-bangsadoo tukon yana siikayo tobuat luwedoi napo daerah.

¹³Bai ko Gesur tumbuno tukon Maakha ko Israel miano aki nasiikayo; yanila daano modungol doi Israel.

¹⁴ Lewi nabenseno aki namantalima buta obos moluwedoi Musa, sabab ko TEMENENO lapamo bontiikene doi Musa baikon ko Lewi nabenseno naobos doiyamo sosubakon-sosubakon mosinua doi balabaan motuuk doi Israel na TEMENENO Mian Bisa.

¹⁵Kosoobos moluwedoi buta TEMENENO mo paladandikenemo doi Israel mianodoo lapamo Musa beekene doi puli-puli lalomo Ruben nabenseno tuuk nateali koonila nabuta.

¹⁶Yanila nawilayahdoo tongusokon ko Aroer (doi Arnon Paisunobatango Pepelako bibilo) tukon kota doi pepelakodoo tanga-tangano polong posaapon koseanono mo tatandak doi napoloolanikonan ko Medeba;

¹⁷koidan Hesybon tukon sasaibino kokota doi seanonodoo mo tatandak, doiyamo: Dibon, Bamot-Baal, Bet-Baal-Meon,

¹⁸Yehas, Kedemot, Mefaat,

¹⁹Kiryataim, Sibma, Zeret-Hasahar mo tangabos doi bunggo bunggono doi pepelakodoo,

²⁰Bet-Peor, ko Bunggul Pisga eya-eyaako, tukon Bet-Yesimot.

²¹Koikoidan tongusokon kokota doi seanonodoo motatandak, tukon sasaibino ko Sihon nalipu kinuasai, bangsa Amori natomundo, mo doi looluk tongoduduk doi Hesybon. Yana tukon penguasa-penguasa Midian, doiyamo Ewi, Rekhem, Zur, Hur, tukon Reba, lapamo Musa lungguiyo. Sasaibino dopenguasadoo biasamo palentayo dolipudoo tuuk doi Tomundo Sihon.

²²Doi antara mian kobangsa Israel moakateyo talaat koidan Bileam Beor napau, dotolotanggaloo.

²³Ko Yordan Paisunobatango doiyamo Ruben nabenseno nalipu bataso tambikon doi talise. Doiyamo kota-kota tukon desa-desa mo bineekon doi Ruben nabenseno puli-pulino lalomo tuuk moteali napobuta.

²⁴Kosoobos luwedoi buta TEMENENO mo dandikenemo doi Israel mianodoo koidan lapamo Musa beekene doi Gad nabenseno puli-pulino sulano nateali koonila.

²⁵Konalipu tongusokon ko Yaezer tukon sasaibino kota doi Gilead tukon sembeleng luwedoi bangsa Amon nalipu polong potimbang ko Aroer doi tambikon tolopot ko Raba,

²⁶lipu moluwedoi Hesybon polong doi Ramat-Mizpa tukon Betonim, tukon lipu moluwedoi Mahanaim polong doi napokalalatanan ko Lodebal, sasaibino doiya tongusokon koidan kolipu motuuk doi Gad nabenseno.

²⁷Doi Yordan Pepelako, Gad nabensenodoo nalipu tongusokon ko Bet-Haram, Bet-Nimra, Sukot, tukon Safon, doiyamo Tomundo Sihon nalipu kinuasai labino doi Hesybon. Pokalalatanan tambikon talise Gad nabenseno nawilayahdoo doiyamo Yordan Paisunobatango polong potimbang ko Danau Galilea doi lembet sembeleng.

²⁸Doiyamo kota-kota tukon desa-desa mo bineekon doi Gad nabenseno puli-pulino sulano nateali napobuta.

²⁹Kosoobos moluwedoi buta TEMENENO mojanjikenemo doi Israel mianodoo koidan lapamo Musa beekene doi sembeleng luwedoi Manasye nabenseno sulano nateali yanila koona.

³⁰Konapo lipu natolongan polong doi Mahanaim, tongusokon posaapon ko Basan — doiyamo posaapon Og nalipu kinuasai, tomundo Basan, tukon koidan konoom kolono Yair nakampung-kampung doi Basan.

³¹Koikoidan tongusokon koidan kosembeleng Gilead lipuno, tukon Asytarot tukon Edrei, doiyamo looluakon kobatomudoan. Tomundo Og doi Basan nalipu kinuasai. Posaapon dolipudoo bineekono kosembeleng luwedoi Manakhir nakatulunan puli-pulino, Manasye napau.

³²Bunomo doiya Musa naobosano kobuta doi Yerikho tambikon tolopot, doi Yordan Paisunobatango sembeleng, tempo yana nadaanoan doi Moab seanono.

³³ Bai Lewi nabenseno aki namalaat buta mau nasoisik moluwedoi Musa. Musa bantile doi yanila baikon koobos mobineekon doi yanila doiyamo sosubakon-sosubakon mosinosubakon doi Israel na TEMENENO Mian Bisa.