Read Banggai YOSUA 14 Bible Online

YOSUA 14 - Banggai bible

YOSUA 14

¹Boobus koidan naiyamo kosalitano tentang bulaando kotano Kanaan tambikon talise ko Yordan Paisunobatango nainobos-obosan doi Israel miano. Komo ebes-ebese butadoo doi Israel miano doiyamo Imam Eleazar, Yosua Nun napau, tukon puli-puli kapalano doi bangsa Israel nabense-benseno lalomo.

² Bunomo lakon komo lapamo TEMENENO palentakene doi Musa, lipu-lipu tambikon talise ko Yordan Paisunobatango mo tinantukanggono tuuk doi siyo sembeleng kobangsa Israel benseno, sio nainobos-obos luwe undian.

³ Buta tambikon doi tolopot ko Yordan Paisunobatango lapamo Musa beekene doi lua sembeleng kobangsa benseno bailonggonoo. (Palaluu natinulis naimbaa baikon Yusuf nakatulunan tongobos lua kobenseno lalomo: Manasye nabenseno tukon Efraim nabenseno.) Mengenai Lewi nabenseno, akiyo kobuta Musa mobeekene doi yanila. Yanila tongo bineekon kokota-kota tuuk napodungolan, tukon kopadang-padango tuuk naposapi pialakon tukon napo domba.

⁵Bunomo doiyamo ko Israel miano naobos-obosano butadoo pokokonoi tukon ko TEMENENO napinalentakono doi Musa.

⁶ Doi meeng kooloyo komian moluwedoi Yehuda benseno lubat mopososuung Yosua doi Gilgal. Daano komeeng komian moluwedoi yanila doiyamo Kaleb Yefune napau Kenas miano, bantile, “Yosua! Ikoo toiyo oilamo ko TEMENENO nabantilan doi Musa, do Mian Bisadoo nabito-bito, doi Kades-Barnea mengenai ikoo tukon yaku.

⁷ Yaku daku umur sangkap kolono kotaun salataa Musa, do TEMENENO doo napeleleani, bintekene yaku luwedoi Kades-Barnea salaku mata-mata tuuk moondosuuke natano nia. Tukon yaku abali doi yana yaku mababa lapuran mo bisa.

⁸Komian-mian mo ampakon tukon yaku kubaiyo matakut ko Israel miano. Bai yaku tataap setia motaatiyo daku TEMENENO Mian Bisa.

⁹ Tukon tobikon doiya, Musa dandikene baikon kobuta yaku modadangemo pasti naikon bineekono doi yaku tukon daku pau-pau teali koonggami mai milik tuuk sidutu posidutukon.

¹⁰Budodoiya sangkap kolono lima kotaun salataa ko TEMENENO nabantilano dolanggedoo doi Musa. Doiya kona tealian salataa kobangsa Israel daano molausala doi padang lalomo. Tukon pokakana komo lapamo TEMENENO dandikene, ko TEMENENO kai lapamo loolainge yaku sampe yaku tataap tubo polong budodoiya. Kitayo, yaku budodoiya daku umur alu kolonomo lima kotaun,

¹¹bai daano bukuan pokakana salataa Musa nasumboliiyano yaku. Yaku daano mobukuan doi polobosian kai oilamo tolong dakulinakukon.

¹²Tobikon doiya beekenemo budodoiya kolipu nabunggokonan ko TEMENENO mo dandikenemo doi yaku doi tempo yaku tukon kumian mopolaing-laing yaku moabali babayo kolapuran. Doi tempodoo ikoo susuumu lengele, baikon indaa daano kobangsa raksasa mo sinombuikon bangsa Enak. Yanila dungol doi kota-kota babasal lalomo mo pinagal betoon. Ugaate ko TEMENENO naikon tulungiyo yaku, sampe yaku moola sikayo yanila, pokakana ko TEMENENO mo bantile.”

¹³Maka Yosua loingiyo Kaleb Yefune napau, maka beekenemo doi yana kokota Hebron tealimo nabuta.

¹⁴Polong budodoiya dokotadoo daano mobuno pokakana Kaleb Yefune napau nakatulunan koona napusaka, do Kenasoo miano, sabab yana setia tukon taat doi TEMENENO, Israel na Mian Bisa.

¹⁵Loolukon ko Hebron binantil kota Arba. (Arba doiyamo mian mobabasal doi antara kobangsa Enak.) Maka dotanodoo aman tuuno sabab akimo naginanggu doi polobosian koidan.