Read Banggai YOSUA 17 Bible Online

YOSUA 17 - Banggai bible

YOSUA 17

¹Soobos kolipu tambikon doi talise ko Yordan Paisunobatango bineekono doi soobos Manasye nakatulunan puli-pulino, Yusuf napau langgongo. Makhir, Gileat tamano, daanokai Manasye napau langgongo. Sabab yana meeng kopejuang, maka Gilead tukon Basan lipuno mo tangabos taambikon doi tolopot ko Yordan Paisunobatango bineekono doi yana.

²Kolipu tambikon talise ko Yordan Paisunobatango bineekono doi puli-puli bailonggon mo luwedoi Manasye nakatulunan, doiyamo kopuli: Abiezel, Helek, Asriel, Sekhem, Hefer tukon Semida; doiya sasaibino katulunan mala-malane moluwedoi Manasye Yusuf napau. Yanilamokai komo balakaikene kobonua tumbuno.

³Zelafehat, Hefer napau, Gilead natumbu (Gilead daanokai Makhir napau, Manasye natumbu), aki namalaat pau malaneno, tongo pau boineno, doiyamo: Makhla, Noa, Hogla, Milka, Tirza.

⁴ Yanila ampakon doi Imam Eleazar, Yosua Nun napau tukon sasaibino kokatua-katua, maka bantile, “Ko TEMENENO bantilemo doi Musa baikon kami koidan sio nasuwe-suwele malaat buta pokakana koutus-utusonggami mala-malaneno.” Tobikon doiya, pokokonoy tukon TEMENENO napalenta, Zelafehat napau-pau boinenodoo bineemo buta suwe-suwele posinggat-singgat tukon utus-utusoila mo mala-malaneno.

⁵Jadi, bolikon tongo katulunan mala-malane mo luwedoi Manasye komo malaat buta obos, bai koidan nakatulunan mo boine. Doiyamo kosababpo bulaando Manasye nabenseno binee songulo koobos, sangalaasan Gilead nabuta tukon Basan tambikon doi tolopot ko Yordan Paisunobatango. Gilead nabuta bineekono doi Manasye nakatulunan bailonggon.

⁷Kobuta batas-bataso natolongan Manasye nabenseno nalipu tambuun luwedoi Asyer doi Mikhmetat doi tambikon tolopot ko Sikhem. Luwe idoo butadoo bataso bulus doi lembet polong doi En-Tapuah miano nalipu.

⁸Tapuah lipuno daanokai Manasye nabenseno koona, bai kokota Tapuah, doi napokalalatanan, daano Efraim nakatulunan koona.

⁹Koikoidan kobuta bataso natolongan Manasye nalipudoo bulus polong doi Kana Paisunobatango pauno. Kokota-kota tambikon doi lalom dopaisubatangodoo pauno doiyamo Efraim koona, maukai natangabos doi Manasye nalipu lalomo. Buta bataso natolongan Manasye nalipudoo koikoidan loloiyo kololoon tambikon doi lembet doi paisubatangodoo pauno, maka napupus doi Tobun Tanga.

¹⁰Bunomo doiya Efraim nadaanoan tambikon doi lalom, tukon Manasye doi lembet, tukon ko Tobun Tanga daanokai yanila napokalalatanan tambikon doi talise. Doi tambikon tobun, Manasyedoo nalipu konapokalalatanggonan tukon Asyer nalipu, tukon tambikon doi tolopot taalikon tobun, pokalalatanggon tukon Isakhar nalipu.

¹¹Doi Isakhar nalipu lalomo tukon doi Asyeroo daano kobuta-buta Manasye koona, doiyamo: Bet-Sean tukon Yibleam tukon desa-desa napoloolanikonan. Koidan: Dor (kota mo tangabos doi tobun bibilo), En-Dor, Taanakh, Megido tukon desa-desa doi napoloolanikonan.

¹² Bai Manasye nabenseno aki namoola siikayo dokota-kotadoo tumbuno; doiyamo kosababpo ko Kanaan miano daano motataap dungol idoo.

¹³Bahkan oloyo doi bundu sambuno ko Israel miano tealimo lobian konabukuanan, yanila aki nasiikayo ko Kanaan miano; yanila tongo pakisaayo domian-mianoo nabalimang tuuk doi yanila.

¹⁴Yusuf nakatulunan bantile doi Yosua, “Bulaando kami tongo binee meeng koobos kobuta tolong, padahal kami badaanggami tuuno, sabab ko TEMENENO lapamo balakaatiyo kami?”

¹⁵Yosua timbiliyo, “Sabab komuyu todudul badaang, tukon Efraim nalipu doi lipuno todudul soisik motuuk doi komuyu, poampakono doi Feris tukon Refaim miano nalipu. Pobukayomo kolipu-lipu mo boolu doi napobokulung-bokulungoo.”

¹⁶Yusuf nakatulunanoo timbiliyo, “Kolipu doi bokulungoo aki nasukup konaloasan motuuk doi kami, sabeakai kobangsa Kanaan mo dungol doi lipu sea-seanono mototooli kereta-kereta polobosian moluwedoi besi — mau yanila mo dungol doi Bet-Sean tukon desa-desa doi napoloolanikonan, maukai yanila mo dungol doi Yizreel Pepelako.”

¹⁷Maka Yosua bantile doi Efraim tukon Manasye nabenseno tambikon doi talisedoo, “Bisa, komuyu badaang tuuno tukon bukuan, tukon pantas nabinee lobian doi meeng koobos kobuta.

¹⁸Poalayomo kolipu doi nabunggulan, sabab maukai dolipudoo daanoon mobokulunggon, komuyu moola mobukayo dolipudoo tukon komuyu alayomo sasaibino. Tukon tentang do Kanaanoo mian-miano, komuyu moola posiikayo yanila, maukai yanila napobukuan tukon nadaano konapo roda-roda polobosian mo luwedoi besi.”