Read Banggai YOSUA 18 Bible Online

YOSUA 18 - Banggai bible

YOSUA 18

¹Salataa yanila lungguiyomo kotano TEMENENO mo dandikenemo, sasaibino ko Israel miano pototongi doi Silo, maka yanila konoikenemo ko Sandung Nadaanoan ko TEMENENO.

²Daanoon kopitu ko bangsa benseno mo akiyoon namantalima buta obos.

³Jadi, Yosua bantile doi Israel miano, “Komuyu yase mototiili polong oila kotempono koidan, maka nasodo komuyu poampakon dungoliyo kolipu TEMENENO molapamo beekene, muturunan na Mian Bisa doi komuyu?

⁴Polilikemo kotolu komian moluwedoi sasamba kobeseno. Yaku naikon sumboliiyo yanila nadadange posaapon natano nia sulano napo tulise kolipu natolong-tolongan yanila mo yase alayo. Sambunolapa doiya, yanila sio napoabali doiyaku.

⁵Butadoo sio nainobos teali pitu koobos. Yehuda naikon tataap doi lipu tambikon doi lalom, tukon Yusuf doi nalipu doi lembet.

⁶Dolipu-lipudoo timbalango natolong-tolongan domo pitu koobos butadoo sio nakinubai, tukon sinalakanggong doiyaku. Sio kukubaiyo koundi tuuk doi toiyano oila ko Mian Bisa natinantukanggon motuuk doi komuyu.

⁷Tongo Lewi nabenseno aki naikon namantalima buta obos posinggat-singgat tukon komuyu, sabab konapoobos doiyamo yanila teali imam-imam tuuk leleaniyo ko TEMENENO. Tukon tentang Gad nabenseno, Ruben tukon soobos Manasye nabenseno, takainomo yanila lapamo motalimayo konapoobos taalikon doi tolopot ko Yordan Paisunobatango. Musa, TEMENENO napeleleani, lapamo mobeekene butadoo doi yanila.”

⁸Maka Yosua mebeemo pongotunggul-pongutunggul mobuno naiya doi mian-mianoo, “Ampakono podadange posaapon natano nia tukon kubaiyomo konatolongan-tolongan kogambaro; nalapa doiya maka polubat doiyaku. Maka naikon kukubaiyo koundi naimbaa doi Silo tuuk motoiyano oila ko TEMENENO natinantukanggon motuuk doi komuyu.” Salataa mantalima dootunggul-otungguloo moluwedoi Yosua, yanila ampakono modadange butadoo.

⁹Posaapon dolipudoo yanila dadangemo, maka tulisemo konatolongan-tolongan domo pitu koobos butadoo tukon daftarkanggene koidan kokota-kota mo daano doi lalomo. Doibundu yanila abali doi Yosua doi basandungan doi Silo.

¹⁰Maka Yosua mokubai undi tuuk mongotoiyan oila ko TEMENENO natinantukanggon tuuk doi yanila. Lapa doiya Yosua beekenemo kobuta obos doi sasamba ko bangsa Israel benseno mo akiyoon namalaat buta obos.

¹¹Bangobosan tumbeno doiyamo buta motuuk doi Benyamin puli-pulino nabenseno. Yanila naobosoo tangabos doi antara Yehuda nabenseno nabuta tukon buta katulunan Yusuf nabenseno.

¹²Tambikon doi lembet, konapobuta natolongan tambuun doi Yordan Paisunobatango, maka tolibo doi Yerikho eakono tambikon doi lembet boobuskoidan doi talise loloiyo kolipu doi nabunggulan polong potimbang kogurun Bet-Awen lipuno.

¹³Butadoo bataso napokalalatanan banggadudul koidan doi Lus peakono tambikon doi lalom (komo totoy bunopokakana ko Betel), maka obulus doi Atarot-Adar doi bunggul tambikon lalom ko Bet-Horon-Hilir.

¹⁴Luwedoi talise sembeleng dobunggulo, butadoo batasodoo natolongan bapatekon doi lalom badombalaakon doi Kiryat-Baal (doiyamo Kiryat-Yearim). Kiryat-Baal daanokai Yehuda nabenseno koona. Doiyamo kobuta bataso natolongan tambikon doi talise.

¹⁵Kobatas-bataso doi lalom sembeleng tambuun luwedoi Kiryat-Yearim bibilo banggadudul doi Me-Neftoah paisu-paisu matanono,

¹⁶maka obulus doi bungko uuno mo posasalaan tukon Hinom Pepelako doi lembet bunduno ko Refaim Pepelako. Nalapa doiya butadoo bataso natolongan doi lalom loloiyo ko Hinom Pepelako tambikon doi lalom sembeleng kobunggul ea-eaako doi tano Yebus, banggadudul badombalaakon doi En-Rogel,

¹⁷bapatekon doi lembet doi En-Semes, maka doi Gelilot doi Toliboan Adumin sembeleng. Sambuno lapa doiya butadoo bataso natolongan bulus doi Batu-Bohan (Bohan daanokai Ruben napau),

¹⁸maka loloiyo kobunggul ea-eaakono tambikon doi lembet sembeleng mo posasalaan tukon ko Yordan Pepelako, boobus koidan bulus doi pepelakodoo,

¹⁹loloiyo tambikon lembet ko Bet-Hogla bunggulo ea-eaakono tukon kona pupusan doi tambikon lembet ko Tobun Mate doi Yordan Paisunobatango natoduwaan. Doiyamo konatolongan doi lalom tambikon.

²⁰Yordan Paisunobatango bunopokakana napokalalatanan doi tolopot sembeleng. Bunomo doiya konatolongan-tolongan kobuta mo bineekon doi Benyamin puli-pulino nabenseno komo tuuk teali yanila koona.

²¹Benyamin nabenseno puli-pulino nakota-kota inala, sasaibino daano kosongulo lua kokota tukon desa-desano napoloolanikonan, doiyamo: Yerikho, Bet-Hogla, Emek-Kezis, Bet-Araba, Zemaraim, Betel, Haawim, Para, Ofra, Kefar-Haamonai, Ofni tukon Geba.

²⁵Koidan songulo sangkap kokota bailon nia tukon desa-desano doi napokoolanikonan: Gibeon, Rama, Beerot, Mizpa, Kefira, Moza, Rekem, Yirpeel, Tarala, Zela, Elef, Yebus (doiyamo ko Yerusalem), Gibea tukon Kiryat-Yearim. Doiyamo kobuta-buta mo bineekon doi Benyamin nabenseno puli-pulino tuuk teali yanila koona.