Read Banggai YOSUA 2 Bible Online

YOSUA 2 - Banggai bible

YOSUA 2

¹ Lapadoiya luwedoi basandungan doi Sitim, Yosua mosumbolii lua komata-mata doi Kanaan. Looluakon domianoo pinalentakon sulano naondosuuke kotano Kanaan tukon baso-basookon, konapo sinolidiki tuuno Yerikho kotano. Maka yanila ambakono doi kotadoo, tukon bamoolokon doi meeng koboine tombololowaon nabonua, kosambuno Rahab.

²Tomundo doi kota Yerikho lengele baikon doi popookoo daano ko Israel miano mo lubat moondosuuke kokota Yerikho.

³Maka tomundo mosumbolii mian doi Rahab sulano napelenggene napalenta nia, “Tobuatenggenemo komian-mian mobamoolokon doi bonua-bonuadoo. Yanila daanokai mata-mata mo lubat sulano naondosuuke posaapon kolipu Yerikho!”

⁴“Takainomo daano komian molubat doi kubonua,” Rahab timbiliyo, “bai yaku aki kutoiyo yaando konapo luwean. Yanila tauso diabudodoo salataa doi tempo natambuunan kalipookan moakiyoon kokota tataapono babasal natinataapikon. Tukon yaku aki kusadaiyo yaando konapo tausan, bai kalu yanila mosoisobit linolonggon, ugaate daano momoola linaat.” (Baanggokai Rahab lapamo seekene domata-matadoo molua doi bangatambunan alos adeno doi nabonua lotengo.)

⁷Maka lenggeto dotomundodoo nabito-bito mootinggale kokota. Salataa yanila daanomo doi tonggulung, kokota tataapono tinataapikono. Yanila umboliiyo domata-matadoo molua polong doi lipu pintosiiyano ko Yordan Paisunobatango.

⁸Dopopookoo moakiyoon loluakon do Israel miano namata-matadoo namoolo, Rahab ampakon doi loteng,

⁹tukon bantile doi yanila, “Yaku toiyo TEMENENO lapamo beekene natano nia doi komuyu. Sasaibino komian naimbaa matakutene doi komuyu.

¹⁰ Kami lapamo lengele kobilitano tentang bulaando ko TEMENENO nakubaiyano mooti kotobun Galagah doi salaamuyu, salataa komuyu otinggale ko Mesir. Kami lapamo lengele kobilita kaliangano bulaando kopoakateano ko Sihon tukon Og, looluakon do bangsa Amoridoo natomundo doi taalikon tolopot ko Yordan Paisunobatango.

¹¹Sambuno kami lengele dosalita-salitadoo, kami tealimo matakut tuuno. Sasaibino komai mian-mian lapus konabaranian sabab komuyu. TEMENENO mu Mian Bisa tutuu Mian Bisa Mobabasal Konakuasa doi timbu tukon doi dunia.

¹²Yaku moinikene komuyu poiyase batotopi tukon sambuno baikon komuyu naikon lakukanggene daku kalualgaa tukon monondok buno komo lapamo yaku lakukene doi komuyu. Popaladandimokai baikon kotamanggu tinonggu, utus-utusonggu, tukon sasaibino kopulinggu aki naikon poakateyo, baikon naikon komuyu lindungiyo. Tukon tuuk doiya beenamokai meeng kopaloosan baikon komuyu moola yaku anggayo!”

¹⁴Maka domianoo molua timbiliyo, “Kami paladandi baikon kalunaikon ko TEMENENO salakanggenemo natano nia doi kami, kami naikon kubaiyo komuyu tukon monondok, asal ikoo naaki mubasalitakene doi indeemo komianokai tentang kami. Maukai TEMENENO nakutuke kami kalu kami aki maitapaatiyo dodandidoo.”

¹⁵Sabab Rahab nabonua binangun doi kota pagalo mominesel, maka Rahab obulusene domianoo molua tukon alos lelekene doi lolombong.

¹⁶“Poambakono doi lipu mobunggukon,” Rahab bontiikene doi yanila, “Sulano komian tomundo mosumboliiyo aki namoola lakoyo komuyu. Pobasookono idoo tolu kooloyo konakalumbit polong yanila naabalimo, maka nasodo pobanggadudukene kopo ambakonan.”

¹⁷Domata-matadoo molua bantile doi Rahab, “Mondoko, kami naikon tapaatiyo kodandi mo lapamo ikoo kabiyo luwedoi kami.

¹⁸Tongo naiyamo komo sio mulakukene. Kalu kami lobosiyo komutano naikon, siokai naalos memela nia mukeetene doi lolombong nia tampat muobulusanano kami. Tama tinamu, utus-utusomu, sasaibino kotamamu pulino siokai mupototongikene doi mubonua nia.

¹⁹Kalu daano komeeng komian luwedoi yanila motobuat luwedoi bonua nia tukon mate tangakate, konamateanoo daanokai nasala susuungo; kami aki mai tanggung jawab luwedoi langgedoo. Bai kalu daano komo malaat silaka nai bonua nia lalomo, kamimokai komo bertanggung jawab.

²⁰Kobalino, kalu komuyu popitoikene tentang kami doi memeeng komian, maka kami akimo koidan mai tokooton doi dandi molapamo ikoo kabiyo luwedoi kami.”

²¹Rahab satujuiyo dolanggedoo maka batadikenemo yanila ambakon. Doibundu yana boboikenemo doalos memeladoo doi nalolombong.

²²Maka ampakono looluakon domata-matadoo doi lipu mo bunggukon tukon sapito indaa. Tolu kooloyo konakalumbit tomundo nabito-bito umboliiyo yanila doiyayaa doi posaapon dolipudoo, bai aki napososuunggene yanila. Doibundu dobito-bito mulemo doi Yerikho.

²³Maka do Israel namata-matadoo molua obulus luwedoi bunggul tukon pintosiiyo kopaisubatango, doibundu abalimo doi Yosua. Sasaibino konapo tinoy, yanila pelenggene doi yana.

²⁴Doibundu yanila bantile, “Pasti ko TEMENENO beekene posaapon dotanodoo doi kita, sasaibino komian indaa matakutene doi kita.”