Read Banggai YOSUA 20 Bible Online

YOSUA 20 - Banggai bible

YOSUA 20

¹ Doibundu TEMENENO sumboliiyo Yosua

²konabantilano bunonaiya doi Israel miano, “Yaku lapamo palentakene Musa sulano yana napailukene doi komuyu kokota-kota somboan kaliangano, doiyamo kota-kota inaando komian namoolaan obulenggene kobutongo sulano namalaat somboan. Diabudodoo piliyomo dokota-kotadoo.

³Komian mo akateyo komian bailon tukon aki nasangaja, moola nabulen doi kotadoo sulano naluput luwedoi mian moiyase soboliyo konanggimalan doi yana.

⁴Yana moola obulen doi antara meeng dokotadoo, tukon ampakon doi tampat pangadilan doi kotadoo tataapono maka nootulikene doi katua-katua idoo oila komo lapamo teali. Dokatua-katuadoo naikon pataikene yana mousokiyo dokotadoo, tukon beena doi yana lipu nadungolan.

⁵Kalu domianoo moiyase soboliyo konanggimalan lelenggene yana polong idoo, dokotadoo tumbuno aki namoola salakanggene domianoo. Yanila sio napolindungiyo, sabab yana mangakate mian tukon aki nasangaja tukon bolikon momosikitene.

⁶Yana moola dungol doi kotadoo polong yana nalapa inadili doi mian badaang salaano, tukon polong doi mian mo taaniyo Imam Babasal doi lounudoo matemo. Sambunolapa doiya makanasodo domianoo namoola mule doi kampung luwedoi nabulengganano kobutongo.”

⁷Maka doi lipu talise ko Yordan Paisunobatango ko Israel miano tantukene nakota-kota nia salaku kota somboan: Kedes, doi Naftali nalipu bunggokon doi Galilea, Sikhem doi Efraim nalipu mobunggokon, tukon Hebron doi Yehuda nalipu mobunggokon.

⁸Doi lipu tambikon tolopot ko Yordan Paisunobatango doi padang pasir seanono mo tatandak doi tolopot sembeleng ko Yerikho, yanila tantukene nakota-kota nia salaku kota somboan: Kota Bezel doi Ruben nalipu, kota Ramot doi Gilead doi Gad nalipu, tukon kota Golan doi Basan, Manasye nalipu.

⁹Doiyamo sasaibino kokota-kota somboan komo tinantukanggon mo tuuk doi sasaibino ko Israel miano tukon motuuk doi sasamba komian molulubaton mopodungoli tukon yanila. Sasamba komian mo akateyo komian bailon tukon aki nasangaja, moola malaat somboan doi kota-kotadoo luwedoi mian moiyase lelenggene moiyase soboliyo konanggimalan doi yana; yana aki namoola inakate kalu akiyoon nainulus doi mian badaang salaano.