Read Banggai YOSUA 22 Bible Online

YOSUA 22 - Banggai bible

YOSUA 22

¹Doibundu Yosua uange komian moluwedoi Ruben nabenseno, Gad tukon soobos Manasye nabenseno komo taalikon doi tolopot ko Yordan Paisunobatango,

² maka nabantile doi yanila, “Komuyu lapamo lakukanggene sasaibino kolangge Musa mo palentakene doi komuyu, TEMENENO napeleleanidoo. Tukon komuyu koidan lapamo taatiyo sasaibino dakupalenta.

³Polong naiya aki nabiasa komuyu mobatadikene koutus-utusomu, ko Israel miano bailonggon, mokakaate susuungo. Komuyu lapamo taatiyo ko TEMENENO Mian Bisa napalenta-palenta tukon tutuu tuuno.

⁴Maka pokokonoy tukon Konadandi, ko TEMENENO Mian Bisa lapamo mobeekene kokaamanan doi utus-utusomu, Israel miano bailonggon. Jadi, budodoiya abalimo doi mulipu susuumu taalikon doi tolopot sembeleng ko Yordan Paisunobatangodoo Musa mo beekene doi komuyu doi loolukonoo.

⁵Tukon dagaiyomo sulano potaatiyo kohukum Musa mopalentakene doi komuyu, doiyamo: Mamaasikene ko TEMENENO mu Mian Bisa, loingiyomo konamongiasan, taatiyomo konapalenta-palenta, setiamo doi yana, tukon salakanggene kobutomu doi yana tukon tootubo konoamu tukon sasaibino komutuboan.”

⁶Doibundu Yosua pataikenemo tukon sodiiyomo yanila moabali doi nalipu tukon beekene nateteba nia, “Komuyu diabudodoo kaasa tukon komuyu abali tukon mababa badaang koiyayon piniala, suasa, mosoni, besi tukon pakean. Poebes-ebesemo koidan kopoo langge linambas doi mian-mian mopokakana komu bangsa.” Maka Ruben nabenseno, Gad, tukon Manasye nabenseno mo daano taalikon tolopot doi Yordanoo mootinggalemo ko Israel miano bailonggon, maka luwemo doi Silo doi Kanaan badombalaakon doi napobuta susuungo doi Gilead lipuno. Yanila dungoliyo do butadoo luwedoi TEMENENO napalenta lolo doi Musa. (Sembeleng Manasye nabenseno lapamo mantalima luwedoi Musa, kobuta taalikon doi tolopot ko Yordan Paisunobatango, tukon sembeleng Manasye nabenseno bailonggon mantalimamo luwedoi Yosua kobuta taalikon talise ko Yordan Paisunobatango posinggat-singgat tukon bense-benseno bailonggon.)

⁷

⁸

⁹

¹⁰Salataa Ruben nabenseno, Gad, tukon Manasye nabenseno taalikon doi tolopot ko Yordanoo polong doi Gelilot — daano taalikon doi talise ko Yordan Paisunobatango — yanila kekendenge komeeng kobalaan mobabasal tukon tambongan doi naloolaniano ko paisubatango.

¹¹Ko Israel miano bailonggon lengele kotulano mopomeenggon bangsa yanila bantile, “Komian-mian Ruben nabenseno, Gad tukon Manasye nabenseno taalikon doi tolopot ko Yordan lapamo kekendenge komeeng kobalabaan doi Gelilot poloolanikon ko Yordan Paisunobatango doi taalikon konda lipu!” Maka yanila sasaibino pototongi doi Silo yase molobosiyo ko Israel bense-benseno mo taalikon doi tolopot ko Yordan Paisunobatangodoo.

¹²

¹³Maka Pinehas, Imam Eleazar napau, ko Israel miano sumboliiyo naampakon doi Ruben nabenseno, Gad, tukon Manasye nabenseno mo daano doi Gilead lipuno doi taalikon tolopot ko Yordan.

¹⁴Posinggat-singgat tukon Pinehas lengget koidan kosongulo ko bangsa Israel napau langkai, — komeeng komian luwedoi sasamba kobenseno modaano taalikon doi talise ko Yordan Paisunobatango, yaniladoo suwe-suwele daanokai bonua tumbuno langkaino doi napomondopulian lalomo.

¹⁵Maka yanila polongo doi Ruben nabenseno natampat, Gad tukon Manasye nabenseno doi Gilead.

¹⁶ Maka luwe sasaibino ko TEMENENO namian sambuno, yanila bantile doi mian moluwedoi Ruben nabenseno, Gad, tukon Manasye nabensenodoo, “Bulaando komuyu molakukanggene kolangge molokis nia motuuk doi Israel miano na Mian Bisa? Tukon komuyu kekendengemo komubalabaan susuumu, komuyu tumba-tumbake ko TEMENENO! Komuyu akimo koidan potulutiyo Konapalenta-palenta!

¹⁷ Oilakai moaki poneneeke konda dosa doi Peor? Doi tempodoo ko TEMENENO ukume kita tukon meeng kobalaa, maukai nai kitania Namian susuungo! Polong diabudodoo daano kita motoupiyo kobalino. Oilakai doiya akiyoon nasukup koidan?

¹⁸Tukon budodoiya, oilakai komuyu yase mototonggulunge ko TEMENENO koidan? Kalu naoloyo nia komuyu tumba-tumbake ko TEMENENO, namodowa yana naikon nggimoliiyo doi sasaibino ko Israel miano.

¹⁹Kalu komulipu nia lokis tukon aki napantas sulano natinealikon tampat kaledaan doi TEMENENO, biyolokai doisumai doi TEMENENO nalipu, indaa daano ko TEMENENO Na Sandung. Kabiyomo kosoobos komai lipu, bai inaimo motumba-tumbake ko TEMENENO kai motumba-tumbake kami tukon suungiyo komeeng kobalabaan bailon, sabeakai daanomo ko TEMENENO nda Mian Bisa nabalabaan.

²⁰ Neneeke, Akhan Zerah napau moaki naiyase tulutiyo ko TEMENENO napalenta tentang langge-langge mo sio nainakamanas kabus, tukon oila kobalino? Sasaibino ko Israel miano inukum! Komo baladosa tongo Akhan, bai komo mate aki natongo susuungo tolong!”

²¹Maka Ruben nabenseno miano, Gad tukon Manasye taalikon doi tolopotoo timbiliyo,

²²“Komo Babasal konakuasa doiyamo TEMENENO! Komo babasal konakuasa doiyamo TEMENENO! Yana toiyo bulaando kami molakukanggene nalangge nia, tukon kami yase sulano mau komuyukai potoiyo! Kalu andeno kami lakukanggene dolanggedoo tukon maksuut tumba-tumbake ko TEMENENO kai tobikon kami akimo mai anggayo koidan doi yana, sodiiyomo mai mate diabudodoo koidan!

²³TEMENENO susuungo komo ukume kami, kalu andeno kami maksuutiyo motumba-tumbake ko TEMENENO tukon kami susuunggami mongokokondong balabaan tuuk mososubakonan sosubakon mosinua kai sosubakon gandum kai sosubakon posobatan doi bungkono.

²⁴Bolikono doiya komai makasuut, utus-utus! Kami kekendenge dobalabaanoo, sabab kami sasaaki naikon doibundu kooloyo kopo tulunan naikon bantile komai katulunan, ‘Komuyu akiyo kopopotaamiyan oioila tukon TEMENENO, Israel na Mian Bisa!

²⁵Kitayo, yana abese mo ko Yordan Paisunobatango nia doi kita nia tanga-tangano sulano napoalaasene kami tukon komuyu Ruben namian tukon Gad. Tutuu komuyu akiyo konapotaamian oioila tukon TEMENENO.’ Maka oilamokai naikon komo teali koidan? Tantumo kopo katulunan naikon komo kubaiyo komai katulunan motade bakaleda doi TEMENENO.

²⁶Jadi, kami mongokokondong kobalabaan, bolikon tuuk doi sosubakon mosinua kai tuuk doi mai basosubakonan-basosubakonan,

²⁷bai tuuk teali paloosan doi kita suwe-suwele, tukon doi nda katulunan oloyo doibundu, bai bisa naikami nia mo bakaleda doi TEMENENO doi Nasandung Nadaanoan tukon mababa sosubakon mosinua, pososubakon-pososubakon tukon sosubakon posobotan. Tukon doibundu kopokatulunan aki naikon nabantile baikon komai katulunan akiyo konapotaamian oioila tukon ko TEMENENO.

²⁸Jadi, komai makisuut doiyamo: Kalu andeno kopokatulunan bantile bunodoiya, maka komai katulunan moola bantile, ‘Kitayomo dobalabaanoo! Komai mbumbu mongokkondong meeng kobalabaan mobunopokakana ko TEMENENO nabalabaan, bolikon tuuk doi sosubakon mosinua kai tuuk basosubakonan, bai tuuk moteali paloosan doi kita suwe-suwele.’

²⁹Poanggayomo, kami aki mai yase motumbokiiyo ko TEMENENO kai tade mokakaate doi yana tukon momosuungi balabaan bailon tuuk doi sosubakon mosinua kai sosubakon gandum kai moteali sosubakon, sabeakai ko TEMENENO nda Mian Bisa daanomokai kona balabaan doi TEMENENO Nasandung Nadaanoan salaano.”

³⁰Sasaibino komo tinarangkanggon komian-mian moluwedoi Ruben nabenseno, Gad tukon Manasye nabenseno taalikon doi tolopotoo Imam Pinehas lengelemo tukon songulo kopaulangkai doi Israel moluwedoi taalikon talise ko Yordan Paisunobatango. Maka yanila mangalatikenemo dokataranganoo.

³¹Maka Pinehas bantile, Imam Eleazar, doi Ruben nabenseno miano, Gad tukon Manasye doi tolopot, “Diabudodoo kami toiyo ko TEMENENO loolainge kita, sabab komuyu aki potumbokiiyo yana; komuyu lapamo salamatene ko Israel miano luwedoi TEMENENO naukuman.”

³²Salataa lapa doiya lenggeto Pinehas tukon sasaibino kopau-pau langkaino doi Israeldoo. Yanila otinggalemo Ruben namian-mian tukon Gadtoo doi Gilead, maka naabali doi Kanaan, doibundu yanila popitoikenemo dopalakaladoo doi Israel miano.

³³Maka ko Israel mianokai mangalatikenemo dolanggedoo, sampe yanila ngganggaale ko Mian Bisa. Yanila akimo koidan napobasalita tentang konapo tetel tuuk molobosiyo Ruben namian-mian tukon Gad, tukon tuuk moakamanase konalipu.

³⁴Doibundu Ruben nabenseno tukon doi Gadtoo yanila bantile, “Nabalabaan nia teali sakisii tuuk doi kita sasaibino baikon ko TEMENENO doiyamo Mian Bisa.” Maka yanila sombuikenemo dobalabaanoo “Sakisii”.