Read Banggai YOSUA 23 Bible Online

YOSUA 23 - Banggai bible

YOSUA 23

¹Malumbit tuuno salataa ko TEMENENO nabeekanano kokaamanan doi Israel miano; tukon dotempodoo akimo napongginabut. Doiya kosinggato Yosua motuamo tuuno.

²Maka yana uangemo sasaibino ko Israel miano, tukon sasaibino kopau-paulangkai, sasaibino kokatua-katua, kohakim-hakim, tukon sasaibino kosuludadu-suludadu kapalano maka nabantile, “Yaku diabudodoo motuamo.

³Komuyu lapamo kitayo sasaibino ko TEMENENO Mian Bisa nalangge nakinubai motuuk doi sasaibino kobangsa naimbania tuuk doi komuyu. Komo kakaate tuuk doi komuyu doiyamo TEMENENO mu Mian Bisa susuungo.

⁴Kobangsa-bangsa nabuta mo daano mototinggal, bunomo koidan sasaibino kobangsa nabuta mo lapamo yaku lungguiyo, doiyamo buta motopopong taalikon doi tolopot ko Yordan Paisunobatango banggadudul doi talise polong doi Tobun Tanga, sasaibino doiya lapamo yaku obosikene doi komuyu sulano nateali koomuyu.

⁵TEMENENO mu Mian Bisa naikon akalayo dobangsa-bangsadoo, komuyu ampakon molobosiyo yanila. Komuyu naikon alayomo konapotano, buno komo lapamo TEMENENO mu Mian Bisa dandikene doi komuyu.

⁶Tobikon doiya, podagaiyo sulano potaatiyo tukon ambakenggene sasaibino komo totulis doi Musa na Buku Hukum lalomo. Inaimo polumbaiyo komengkai moluwedoi Nahukum-hukumoo.

⁷Tukon doibundu komuyu aki naikon poposombuli tukon bangsa-bangsa mo daano mopodungoli komuyu. Komuyu aki naikon pobantile konapodewa-dewa sambuno kai batotopi luwedoi sambudoo.

⁸Komuyu baikon sio potataap setia doi TEMENENO, buno komo lapamo komuyu lakukene polong diabudodoo.

⁹Bangsa-bangsa mo babasal tukon mo bukuan lapamo TEMENENO siikayo tuuk doi komuyu; akiyo komeeng komiankai moluwedoi yanila komo moola bataanggon, molawane komuyu.

¹⁰ Sasamba komian doi komuyudoo moola lungguiyo doi lolloono komian, sabab doiyamo ko TEMENENO mu Mian Bisa kai komo polobosi tuuk doi komuyu, pokakana komo lapamo Yana dandikene.

¹¹Tobikon doiya neneekekai koseangano ko TEMENENO mu Mian Bisa.

¹²Kalu komuyu aki posetia tukon komuyu posombuli kobangsa-bangsa mo daano podungoli doi komuyudoo, tukon komuyu powala tukon yanila,

¹³neneeke, pasti ko TEMENENO Mian Bisa aki naikon nasiikayo dobangsa-bangsadoo koidan, tuuk doi komuyu. Kobalino, yanila naikon silaka tuuno tuuk doi komuyu, sabab yanila naikon teali buno talong kai pokakana kopalako motuuk doi komuyu. Yanilakai naikon kubaiyo komuyu mosakisaa tuuno; sabab yanila naikon teali pokakana kopongumbas kai pokakana kosonit doi matamu lalomo. Komuyu naikon banggadudul sakisaa polong akiyo komeeng komiankai doi antara komuyu komo totinggal doi tano nia momonondok. TEMENENO mu Mian Bisa mobeekene doi komuyu.

¹⁴Diabudodoo laatemo kotempono daku matean. Komuyu sasaibino, suwe-suwele toiyo tuuno baikon ko TEMENENO mu Mian Bisa lapamo beekene doi komuyu sasaibino komo monondok molapamo Yana dandikene. Sasamba Konadandi lapamo tapaatiyo, akiyo komeeng kai komo aki.

¹⁵Bai pokakana Konatapatiyano Konadandi doi komuyu, bunomokai koidan Yana pasti naikon molaksanakanggene sasamba Konanggimalan motuuk doi komuyu.

¹⁶Kalunaikon komuyu lupaiyo ko TEMENENO Mian Bisa naperjanjian molapamo palentakene doi komuyu sulano potaatiyo, tukon komuyu ampakon mobakaleda doi temeneno-temeneno bailon tukon komuyu sosubaiyo dotemeneno-temenenodoo bailon, maka ko TEMENENO naikon nggimal, tukon ukume komuyu. Doi tempo lalomo momosobit komuyu sasaibino naikon inalapus luwedoi tano nia mo monondok, TEMENENO mo beekenemo doi komuyu.”