Read Banggai YOSUA 24 Bible Online

YOSUA 24 - Banggai bible

YOSUA 24

¹Yosua pototongikene sasaibino ko bangsa Israel benseno doi Sikhem, maka nasumboliiyo sasaibino kopau-paulangkai, katua-katua hakim tukon sasaibino kosuludadu kapalano nalubat momangadap. Maka yanilakai lubato momangadap doi Mian Bisa.

² Doibundu Yosua bantilemo doi yanila sasaibino, “Polengelemo ko TEMENENO, Israel na Mian Bisa nabinantil doi komuyu, ‘Doi loolukonoo kopoombumbu mo dungol doi Efrat Paisunobatango sembeleng, tukon sosubaiyo ko pilogot-pilogot. Daano komeeng komian moluwedoi yanila doiyamo Terah, Abraham tamano tukon Nahor.

³ Maka Yaku alayo Abraham, tamamuyu natulunanoo, moluwedoi tanodoo doi Efrat sembeleng, tukon Yaku sumboliiyo yana modadange posaapon ko tano Kanaan. Yaku beenamo doi yana kokatulunan mobadaang. Tumbe-tumbe Yaku beekenemo Ishak doi yana,

⁴ maka doi Ishak Yaku beenamo lua kopau, doiyamo Yakub tukon Esau. Yaku beekenemo doi Esau ko Edom bunggulo nateali napoobuta, bai Yakub tamamuyu natulunanoo, biyol doi Mesir tukon sasaibino konalabuk-labuk.

⁵ Doibundu Yaku sumboliiyomo Musa tukon Harun, tukon maparentakene naolubatene kobalaa mobabasal doi Mesir, maka Kutobuatenemo komuyu luwe indaa.

⁶ Yaku babayomo dotumbumuyudoo tobuat luwedoi Mesir, maka ko Mesir miano lelenggene yanila tukon roda poolobosian tukon suludadu mo lakit doi adalan. Tukon salataa dotumbumuyudoo polong doi Tobun Gelagah,

⁷yanila mangkabimo tulung doiya-Ku. Maka kolipu napokalalatanan yanila tukon do Mesiroo miano Yaku kubaiyo nateali kalipookan, tukon Yaku tombukiyomo doi Mesiroo miano tukon paisu tobun polong yanila sasaibino tombulo. Komuyu toiyomo sasaibino oilamo Daku linakukanggon doi Mesir miano. Malumbit tuuno kopoodungolan doi padang bone.

⁸ Maka Yaku babayomo komuyu doi Amori miano natano mo dungol taalikon doi tolopot ko Yordan Paisunobatango. Yanila lobosiyo komuyu, bai Yaku kubaiyo komuyu menaang doi yanila. Komuyu lambase konapoolipu, tukon Yaku akabusemo yanila.

⁹ Maka ko Moab tomundono, doiyamo Balak Zipor napau, lawane komuyu. Yana mosumbolii mian moampakon doi Bileam Beor napau tukon kabiyo sulano Bileam nabatotopikene komuyu.

¹⁰Bai aki Kuloingiyo Bileam namongiasan, maka yana tongo balakaatiyo komuyu. Bunomo doiya Daku salamatanano komuyu luwedoi Balak.

¹¹ Diabudodoo komuyu pintosiiyomo ko Yordan Paisunobatango tukon polong doi Yerikho. Ko Yerikho lobosiyo komuyu, bunomo koidan ko Amori miano, Feris miano, Kanaan, Het, Girgazi, Hewi tukon Yebus miano. Bai Yaku beekene doi komuyu kokamanaangan luwedoi yanila sasaibino.

¹² Doi tempo poampakonan molobosiyo yanila, Yaku kubaiyo yanila teali sadang tukon matakut, sampe lua do Amoridoo tomundono obulen luwedoi komuyu. Bolikon mubakoko tukon koidan bolikon mupanah komo tealikene komuyu manaang.

¹³ Tano Yaku mo beekene doi komuyu, komuyu talimayo tukon aki posusah tuuno. Tukon kota-kota Yaku mo beekene doi komuyu bolikon komuyu komo kekendenge. Bai diabudodoo komuyumokai komo dungol indaa, tukon komuyumokai koidan komo rasakanggene koanggur saono tukon na zaitun saono, padahal bolikon komuyu komo sakakene doiya.’ ”

¹⁴“Jadi, budodoiya,” Yosua bantile koikoidan, “odotiiyokai ko TEMENENO. Bakaledamokai doiya-Na tukon tootubo konoamu tukon koidan taatio. Saakenekai ko temeneno-temeneno bailon tumbumuyu nasinosubai loolukoo doi Mesopotamia tukon Mesir. Pobakaledamokai tongo doi TEMENENO.

¹⁵Kalu andeno komuyu aki poiyase bakaleda doi TEMENENO, pomangalamokai kaputusan oloyo nia koidan doi indee kopo iyasano bakaleda: doi temeneno-temeneno bailon tumbumuyu mo sosubaiyo doi Mesopotamia loolukoo kai doi Amori miano natemeneno-temeneno komuyu modungoliyo konalipu budodoiya. Bai kami — bai yaku tukon pulinggu — naikon bakaleda tongo doi TEMENENO.”

¹⁶Maka do Israeldoo miano timbiliyo, “Kami tutuu aki naikon mootinggale ko TEMENENO tuuk mobakaleda doi temeneno-temeneno bailon!

¹⁷Konda TEMENENO Mian Bisakai komo olupute sasaibino konda tauwa tukon kita susuunggita doi nda inataiyan doi Mesir. Kita lapamo kitayo komominasaindinggon-minasaindinggon TEMENENO mo kubaiyo. Sidutu TEMENENO totooliyo kita doi sasaibino konda ampakonan, loloiyo kolipu-lipu mosangalaasan.

¹⁸Tukon doi tempo ndausokiyano nalipu nia, ko TEMENENO siikayo sasaibino ko Amori miano mo dungol naimbaa. Jadi, kami yase bakaleda doi TEMENENO, sabab Yanamokai konda Mian Bisa.”

¹⁹Maka Yosua bantile, “Bai komuyu ugaatene aki naikon posanggup mobakaleda doi TEMENENO, sabab Yana Mian Bisa momoliyous, Mo Meeng Tuuno. Yana aki naiyase nadaano kona pokakanaan. Kalu komuyu otinggale Yana tukon bakaleda doi temeneno-temeneno bailon, Yana aki naikon naompuniyo komu lalim. Kobalino, Yana naikon lobosiyo tukon ukume komuyu. Yana naikon akateyo kabus komuyu, maukai loolukoo Yana monondok doi komuyu.”

²¹Maka ko Isreal mianodoo timbane, “Aki! Kami aki naikon mai bakaleda doi temeneno-temeneno bailon. Kami naikon bakaleda tongo doi TEMENENO!”

²²Maka Yosua bantile, “Jadi, komuyu susuumuyukai kosakisiino baikon komuyu lapamo putusiyo tuuk mobakaleda tongo doi TEMENENO.” “Bisa” yanila timbiliyo, “Kami susuunggami kosakisiino.”

²³“Kalu bunodoiya, aisenemokai kobangsa-bangsa bailon natemeneno-temeneno mo daano doi komuyudoo,” Yosua bantile, “tukon paladandimokai baikon komuyu naikon loingiyo ko TEMENENO, Israel na Mian Bisa.”

²⁴Maka domian-mianoo bantile doi Yosua, “Kami naikon bakaleda tongo doi TEMENENO, nda Mian Bisa. Kami naikon taatio Konapalenta-palenta.”

²⁵Maka doi oloyodoo doi Sikhem Yosua kubaiyo koperjanjian tukon Israel miano; tukon idoo yana beekene doi yanila kohukum-hukum tukon aturan-aturan mo sio napoo loingiyo.

²⁶Sasaibino kohukum tukon aturan-aturanoo yana tulise doi Mian Bisa Nabuku Hukum lalomo. Doibundu yana alayo komeeng kobatu mo babasal maka naekkendenge doi kayung batango mo babasal suukano doi tampat mo tangalaas tuuk doi TEMENENO.

²⁷Lapa doiya bantilokai Yosua doi sasaibino domianoo, “Nabatu nia teali nda sakisii. Sasaibino ko TEMENENO nabantilan-bantilan binotiikon doi kita, lapamo binantil doi batu nia. Jadi, nabatu niakai komo naikon teali sakisii doi komuyu, tuuk motondoikene komuyu sulano naaki potumbokiiyo komu Mian Bisa.”

²⁸Doibundu Yosua sumboliiyo domian-mianoo mule; maka yanila sasaibino abali doi napotano suwe-suwele.

²⁹Lapadoiya Yosua Nun napau do TEMENENO doo napeleleani, mate kona umur sakat songulo kotaun.

³⁰ Yana tinadin doi natano susuungo doi Timnat-Serah doi Efraim bunggulo taalikon doi lembet ko Gaas Bunggulo.

³¹Doi nadaanoan Yosua motubo, ko Israel miano bakaleda doi TEMENENO. Tukon salataa yana mate yanila koidan tataap bakaleda doi TEMENENO kalu doi yanila daanoon kokatua-katua molapamo sakisiiyo susuungo sasaibino kolangge TEMENENO mo lakukene tuuk doi Israel miano.

³² Yusuf bajano Israel miano mokanggiyo luwedoi Mesir, tinadin doi Sikhem doi tano molapamo Yakub oliyo sakat kodoy suasa luwedoi Hemor nalabuk-labuk, Sikhem tamano. Butadoo inolusikon doi Yusuf natulunan.

³³Lapa doiya Eleazar Harun napau koidan mate, tukon tinadin doi Gibea, doiyamo kota mo tangabos doi Efraim bunggulo lipuno. Dokotadoo lapamo bineekon doi Pinehas, Eleazar napau.