Read Banggai YOSUA 3 Bible Online

YOSUA 3 - Banggai bible

YOSUA 3

¹Modowakon kooloyono, Yosua tukon sasaibino ko Israel miano banguno dowa-dowa soono, maka yanila otinggalemo konapo lipu basandungan doi Sitim, tukon ambakono doi Yordan Paisunobatango. Indaa yanila basandungo polong totiiliyo kotempono sulano napopintas.

²Sambunolapa toliis tolu kooloyo, kokatua-katua boilingiyomo doi sasaibino kobasandungan,

³tukon beena napalenta nia doi Israel miano, “Kalubaikon komuyu kitayo koimam-imam motanggunge ko TEMENENO mu Mian Bisa na Peti Perjanjian, siokai komuyu koidan polengget otinggale nalipu basandungan nia. Potuunduwomo do Petidoo,

⁴bai inai poambakon todudul loolani tukon do Petidoo; tuunduwo doi bundu tukon kona odoonan meeng kokilometer. Tukon bunodoiya komuyu naikon toiyomo kololoon mo sio pololoiyo, sabab komuyu akiyoon pobiasa nailipu nia.”

⁵Yosua bantile doi Israel miano, “Siokai pokoliyousiyo kobutomuyu, sabab namodowa ko TEMENENO naikon kubaiyomo kolangge minasaindinggon doi komuyu tanga-tangano.”

⁶Maka Yosua palentayo koimam-imam sulano nabingkate do Peti Perjanjianoo maka nalengget loolukoniyo ko Israel miano. Yanilakai laksanakanggene Yosua napalenta.

⁷TEMENENO bantile doi Yosua, “Tambuuno naoloyonia ikoo naikon Kutealikene mian babasal sampe sasaibino ko Israel miano odotiiyo ikoo tukon toiyo baikon Yaku loolainge ikoo buno Yaku moloolaingemo Musa.

⁸Budodoiya palentayomo koimam-imam komo tanggunge do Peti Perjanjianoo sulano kalu yanila polongo doi paisubatango, yanila usok doi paisubatangodoo lalomo tukon kokondong doi loolanian kobibilo.”

⁹Maka Yosua uange ko Israel miano, tukon bantile, “Mai pondongoliiyo oila ko TEMENENO mu Mian Bisa napinalentakon doi komuyu.

¹⁰Kalubaikon komuyu naikon maju, TEMENENO pasti siikayo ko Kanaan miano, Het, Hewi, Feris, Girgasi, Amori tukon Yebus. Tukon doi tempo ko TEMENENO sasaibino kodunia na Peti Perjanjian pinintasono doi Yordan loolukoniyio komuyu, komuyu naikon kitayo baikon ko Mian Bisa mo tubo daano doi komuyu tanga-tangano.

¹²Budodoiya siokai pomolilik songulo lua komian — meeng komian luwedoi sasamba ko Israel nabenseno.

¹³Totiiliyo kalubaikon koimam-imam mo tanggunge ko TEMENENO na Peti Perjanjian banggaulanggenemo koaino doi paisu lalomo doi Yordan Paisunobatango, kopaisuno soloko naikon tade; kopaisu mo lomba luwedoi uuno naikon topopot doi meeng kotampat.”

¹⁴Doi tempodoo daano tempo bapadakan, tukon doiya kotempono ko Yordan Paisunobatango paisuno biasa tokumbe. Salataa ko Israel miano otinggalemo konapo basandungan sulano napopintosiiyo ko Yordan Paisunobatango, koimam-imam ambakon loolukon tukon babayo ko Peti Perjanjian. Tukon doi tempono doimam-imamoo nabanggaulangganano koaino doi paisubatango paisuno lalomo,

¹⁶doi tempodoo koidan dopaisudoo soloko tade. Dodoon doi tambikon kopaisubatango uuno, kopaisuno topototongikon doi Adam, meeng kokota mo tangabos doi kota Sartan sembeleng. Kopaisu mo lomba taalikon doi Tobun Mate tade tuuno, sampe ko Israel miano moola napintas doi buta motuuloo bunggono posasalaan kokota Yerikho. Koimam-imam mo tanggunge do Peti Perjanjianoo tataap tongokkondong doi paisubatango tanga-tangano polong sasaibino ko Israel miano polong doi sembeleng.