Read Banggai YOSUA 4 Bible Online

YOSUA 4 - Banggai bible

YOSUA 4

¹Sambunolapa sasaibino dobangsadoo daanomo doi sembeleng, TEMENENO bantile doi Yosua,

²“Moliliko kosongulo lua komian, meeng komian doi sasamba kobenseno.

³Palentakenemo yanila sulano namangala songulo lua kobatu luwedoi Yordan Paisunobatango tanga-tangano, kana doi lipu koimam-imam nakokondongan. Sumboliiyomo yanila natanggunge dobatu-batudoo polong doi potampat basandungan doi tempo popook naikon.”

⁴Maka Yosua uangemo domo songulodoo lua komian mo toliliko,

⁵maka bantile, “Poampakono doi Yordan Paisunobatango tangano, doi TEMENENO mu Mian Bisa na Peti Perjanjian salaano. Suwe-suwele sio namobinggat meeng kobatu luwe idoo — koaito songulo lua kobatu pokokonoy tukon koaito kobenseno doi bangsa Israel lalomo.

⁶Dobatu-batudoo naikon nonookikene nabangsa nia doi oila komo lapamo TEMENENO lakukene. Oloyo doibundu kalu komu labuk-labuk mansadai oila komaanano nabatu-batu nia doikoo,

⁷siokai popailukene doi yanila baikon ko Yordan Paisunobatango paisuno tade salataa ko TEMENENO na Peti Perjanjian pinintason doi paisubatangodoo. Dobatu-batudoo sidutu nonookikene kobangsa Israel oila komo teali naimbaa.”

⁸Domo songulo luado komian kubaiyo mo Yosua napalenta. Pokokonoy tukon TEMENENO napotudoikon doi Yosua, yanila mangala songulo lua kobatu luwedoi Yordan tanga-tangano — koaito pokokonoy tukon koaito kobense-benseno doi bangsa Israel lalomo — maka nababayo doi napo tampat basandungan.

⁹Doi Yordan tanga-tanganodoo koidan, Yosua susune kosongulo lua kobatu tepat doi tampat nakokondongan koimam-imam mo tanggunge do Peti Perjanjianoo. (Dobatu-batudoo daanoon modaano idoo polong budoonia.)

¹⁰Koimam-imam tataap kokondong doi Yordan tanga-tangano polong domian-mianoo lapamolapa molaukene sasaibino ko TEMENENO napinalentakon doi yanila lolo doi Yosua. Doiya pokokonoy tukon potudoikon-potudoikon moluwe doi Musa doi Yosua. Tukon mosobit ko Israel miano napintosiiyano ko Yordan Paisunobatango.

¹¹Salataa sasaibino polongo doi sembeleng, koimam-imam motanggunge do Peti Paladadianoo ambakono doi yanila salaano.

¹²Pokokonoy tukon komo pinalentakon luwedoi Musa, kosuludadu-suludadu moluwe doi Ruben nabenseno, Gad tukon sembeleng Manasye nabenseno lapamo loolukon mopintosiiyo kopaisubatango.

¹³Sasaibino 40.000 komala-malane modaano konasinapan tukon batotobo sulano napoolobosi. Doi TEMENENO salaano, yanila pintas tujuiyo keseanono mesea doi loolanian ko Yerikho.

¹⁴Doi oloyodoo ko TEMENENO lakukene kolangge-langge mo kubaiyo ko bangsa Israel moodotiiyo Yosua salaku mian babasal. Pomatekon konatuboan yanila odotiiyo yana pokakana yanila naodotiiyano Musa.

¹⁵Doibundu ko TEMENENO sumboliiyo Yosua

¹⁶napalentayo koimam-imam motanggunge ko Peti Perjanjianoo sulano natobuat luwedoi Yordan.

¹⁷Yosua lakukene oila ko TEMENENO napinalentakon doi yana.

¹⁸Salataa doimam-imamoo polongo doi paisudoo bibilo, dopaisubatangodoo paisuno tambuuno molomba koidan tukon tokumbe buno doi tumbeno.

¹⁹Ko Israel miano polong doi Yordan sembeleng doi tanggal kosongulono bituwon komeengo, tukon yanila basandungo doi Gilgal taalikon doi tolopot ko Yerikho.

²⁰Idoo Yosua mosusun kosungulo lua kobatu mo inala luwedoi Yordan lalomo.

²¹Maka Yosua bantile doi Israel miano, “Oloyo doi bundu kalubaikon komupau-pau mansadaikene tentang komaanano luwedoi batu-batunia,

²²bontiikenemo doi yanila baikon ko Israel miano napintosiiyano ko Yordan Paisunobatango nia doi buta momotuul bunggono.

²³Basalitakene doi yanila baikon ko TEMENENO mu Mian Bisa kotuuliyo ko Yordan Paisunobatango paisuno tuuk doi komuyu polong komuyu sasaibino napolong doi sembeleng, buno pokakana yana mokotuuliyo ko Tobun Gelagah tuuk doikami,

²⁴sulano sasaibino komian doi dunia natoiyo bulaando konababasalan ko TEMENENO Nakuasa. Tukon kalu bunodoiya komuyu naikon odotiiyo ko TEMENENO mu Mian bisa polong sidutu-posidutukon.”