Read Banggai YOSUA 5 Bible Online

YOSUA 5 - Banggai bible

YOSUA 5

¹Sasaibino kotomundo Amori doi talise sembeleng ko Yordan Paisunobatango tukon sasaibino kotomundo Kanaan doi Tobun Tanga napoloolanikonan lengele baikon ko Yordan Paisunobatango lapamo TEMENENO kotuuliyo doi tempo ko Israel miano napintosiiyano dopaisubatangodoo. Maka yanila teali matakut tukon lolondong sabab Israel miano.

²Doi tempodoo TEMENENO bantile doi Yosua, “Mokubaimo piso moluwedoi batu, maka kubaiyomokai koidan kobakolobokiyan basunatan motuuk doi Israel miano.”

³Maka Yosua laksanakanggene ko TEMENENO napalenta, tukon sunate ko Israel miano doi lipu mosinombuikon Bunggo Basunatan.

⁴ Doi tempo ko Israel miano natobuatan luwedoi Mesir, sasaibino komala-malane lapamo sinunat. Bai salataa yanila lausala doi padang bone sangkap kolono kotaun konakalumbit, konapopau momala-malaneno akiyoonkai nadaano komeeng komo sinunat. Tukon doi napupusan kotempo sangkap kolono kotaunoo, komala-malane mosalataa tobuat luwedoi Mesir konaumur mo moolamo nausok suludadu, sasaibino matemo, sabab aki naloingiyo ko TEMENENO napalenta. Maka pokokonoy tukon ko TEMENENO natotopi, yanila aki napinataikon kitayo kotano mo monondok tukon molumbangoo mo Dinandikon doi tumbunoila.

⁷Doiyamo kosababpo sampe sasaibino konapo malaneno akiyoon nasinunat. Komala-malane motubo doibundu doiyamo Yosua nasinunat.

⁸Sambuno lapa yanila sasaibino lapamolapa sinunat, yanila dungolo doi basandungan polong tangalino konapo pakol.

⁹TEMENENO bantile doi Yosua, “Oloyo nia kopotinotulaiyan salaku ata-ata doi Mesir lapamo Kualapuse.” Doiyamo kosababpo dolipudoo sinombuikon Gilgal polong doi loonu nia.

¹⁰ Daanoon yanila mobasandung doi Gilgal doi seanono loolani ko Yerikho, ko Israel miano lamekene ko Paskah doi kinobian kooloyono tanggal kosongulono sangkap doi bituwonoo.

¹¹Modowakon, tuuk kotumbeno luunggon yanila namakaanan kolipu Kanaan hasilo, doiyamo: roti mo akiyo koragino tukon gandum mopinanggang.

¹² Doi oloyodoo koidan komanna akimo koidan natuwong luwedoi timbu, tukon ko Israel miano tademo momakaan manna. Tambuuno doiya konapo makaanan tano Kanaan hasilo.

¹³Doi meeng kotempo Yosua daano doi naloolanian ko Yerikho. Sosinggoton yana kitayo komeeng komala-malane mokokondong doi salaano tukon nasabel. Yosua loolaniyo domianoo, tukon sadaiyo, “Ikoo nia tulando kai musu?”

¹⁴“Bolikon tulando, tukon koidan bolikon musu,” domianoo napotimbili. “Yaku lubat naimbaa salaku TEMENENO natalenga.” Salataa Yosua lengele dobantilanoo yana soisobiton somba mososubaiyo domianoo. Yosua bantile, “Yaku nia Tuan napeleleani, Oila komo moola yaku lakukene tuuk doi Tuan?”

¹⁵Do TEMENENO doo natalenga timbiliyo, “Bukayo komu sapatu; kobuta mukokondonganoo daanokai buta moliyous.” Sambuno bunodoiya maka Yosua bukayomo konasapatu.