Read Banggai YOSUA 6 Bible Online

YOSUA 6 - Banggai bible

YOSUA 6

¹Doi kota Yerikho kotataapon-tataapon mobabasal dinagaimo mono-monondok tukon tinataapikono momoonggol sulano ko Israel miano aki namoola usok. Akiyo komeeng kai komian mo minoolakon nausok kai motobuat doi kotadoo.

²TEMENENO bantile doi Yosua, “Budodoiya Yaku salakanggene ko Yerikho doikoo tukon tomundono tukon sasaibino kosuludaduno mobarani-baranidoo.

³Ikoo tukon musuludadu sio nabaris boilingiyo dokotadoo meeng kooloyo idan tukon konakalumbit noom kooloyo.

⁴Pitu komian koimam, suwe-suwele mababa torompet, sio naambakon doi Peti Perjanjianoo salaano. Doi oloyo kopituno, ikoo tukon musuludadu sio naboilingiyo dokotadoo pitu luungon modaanoon koimam-imam mopuuke konatorompet.

⁵Doibundu doimam-imamoo sio napuuke konatorompet tukon alalo mo bulusan. Kalu komuyu lengelemo doalaloo mo bulusan, sasaibino kosuludadu sio nakokuweis tukon kakabukuan, maka dokotadoo pagalo mominesel naikon tolubang. Maka komuyu sasaibino sio pobanggadudul mousokiyo dokotadoo.”

⁶Maka Yosua uange koimam-imam tukon bantile, “Pobinggatemo do Peti Perjanjianoo; pitu komian luwedoi komuyudoo sio naambakon doi salaano tukon mababa torompet.”

⁷Maka Yosua sumboliiyo kona suludadu mobaris boilingiyo dokotadoo, linoolukoni luwe barisan pangawalo doimuka moambakon loolukoniyo ko TEMENENO na Peti Perjanjian.

⁸Luwe Yosua napalenta, lenggeto kobarisan pangawalo loolukoniyo koimam-imam popuuk torompet, koimam-imam motanggunge ko Peti Perjanjian, doibundu tuundu koidan komeeng kopadagai barisan. Daanoon yanila moambakon, kotorompet banggadudul momeenggon pinuuk.

¹⁰Sasaibino kosuludadu lapamo pinalentakon sulano naaki nakokuweis tukon aki namabantil meeng kobantilankai kalu Yosua akiyoon namebee tanda-tanda.

¹¹Bunomodoiyakai Yosua nasumboliiyano konasuludadu mobabayo ko Peti Perjanjian moboilingiyo dokotadoo idan luunggon, doibundu abali doi basandungan, tukon bamoolokono idoo.

¹²Modowakon, dowa-dowa soono, Yosua banguno maka tuuk koluano luunggon koimam-imam tukon suludadu babariso moboilingiyo dokotadoo doi napotuunduan kobarisan lalomo pokakana doi oloyono moakiyoon nalaate; kotumbe-tumbeno padagai barisan doi muka, doibundu pitu koimam popuuk torompet, tinuundu doi imam-imam mo tanggunge ko Peti Perjanjian, tukon doi napupusan padagai barisan doi bundu. Daanoon mobunodoiya kotorompet banggadudul momeenggon mopinuuk.

¹⁴Doi oloyo koluanodoo yanila boilingiyo kota idan luunggon doibundu yanila abalimo doi basandungan. Bunomo doiya konapo lakukanano sasamba kooloyo tukon noom kooloyo kona kalumbit.

¹⁵Doi oloyo kopituno yanila banguno dowa-dowa salataa kooloyo matano sodo nasumbut, maka yanila bariso pitu luunggon moboilingiyo kota Yerikhodoo tukon kokubai mopokakana. Tongo doi oloyo kopitunodoo tolong, konapo boilingiyano dokotadoo pitu luunggon.

¹⁶Doi napitu luunggonan sambuno koimam-imam puuke konatorompet, Yosua mebee tanda-tanda doi sasaibino kopasukan sulano nakokuweis. Yosua bantile, “TEMENENO lapamo salakanggene nakota nia doi komuyu!

¹⁷Sasaibino kota tukon sasaibino koantoko sio naminanas kabus salaku sosubakon motuuk doi TEMENENO. Tongo Rahab boinedoo motombololowaon tukon puli-pulino tolong komo moola nabinatadikon tubo, sabab yana lapamo tulungiyo konda mata-mata.

¹⁸Aki naminoolakon momangala meeng kolanggekai moluwedoi sasaibino komo sio naminanas. Kalu komuyu mangalamo ko Israel nabasandungan naikon malaat silaka tukon balaa.

¹⁹Sasaibino kobarang suasa, mosoni, tembaga tukon besi sio nainalaasanggon tuuk doi TEMENENO, tukon inabos doi TEMENENO nabangabosan buat lalomo.”

²⁰ Maka koimam-imam puukemo konatorompet. Tukon salataa ko Israel miano lengelemo dotorompetoo alalo, yanila kokuweis buku-bukuan, maka tolubango kokota Yerikho pagalo minesel. Sasaibino ko Israel nasuludadu banggadudul liba, tukon usokiyomo dokotadoo maka yanila lambasemo.

²¹Sasaibino komo doi kota lalomo, motua mongula, malane boine, inakate tukon sabel. Sasaibino koiyayon piniala sapi, domba tukon keledai inakate.

²²Doi mian moluadoo molapamo teali mata-mata, Yosua bantile, “Poampakono doi boinedoo motombololowaon nabonua, tukon babayomo yana natobuat polaing-laing tukon konakaluargaa buno komo lapamo komuyu dandikene doiyana.”

²³Maka domata-matadoo molua ampakono, tukon babayo tobuatenggene Rahab polaing tukon tamano tinano, utus-utuso, tukon konapuli-puli bailonggon. Sasaibino Rahab nakalualgaadoo tukon konaata-ata binaba tobuat doilipu moaman loolani ko Israel miano nabasandungan.

²⁴Doibundu ko Israel nasuludadu suayomo kabus posaapon dokotadoo tukon sasaibino kolanggeno komo daano doi lalomo, alaasene ko barang-barang mosoni, suasa, tembaga tukon besi. Dobarang-barangoo yanila alayo tukon babayomo doi TEMENENO nabangabosan buat.

²⁵ Bai Rahab boinedoo motombololowaon tukon sasaibino kopuli-pulino Yosua sodiiyo tubo, sabab yana lapamo tulungiyo domata-matadoo molua Yosua mosumboliiyo doi Yerikho. (Polong doi oloyo nia Rahab nakatulunan daanoon doi Israel.)

²⁶ Doi tempodoo Yosua tobuatenggene napapatan nia, “Indeekai komo kakaate mokekendenge koidan nakota Yerikho nia, naikon kanakon TEMENENO nabalaa. Indee komo kubaiyomo kopondasino naikon lapus konapau langgongo; tukon indee komo konoikene kotataapon-tataapono babasal naikon lapus konapau piyoto.”

²⁷TEMENENO lolainge Yosua, tukon Yosua sambuno teali tololongol doi posaapon doi tanodoo.