Read Banggai YOSUA 7 Bible Online

YOSUA 7 - Banggai bible

YOSUA 7

¹TEMENENO lapamo palentayo doi Israel miano baikon luwedoi sasaibino kolangge doi kota Yerikho komo sio naminanas kabus mau nameengkai aki namoola inala. Bai dopalentadoo aki nalinoingi. Meeng komala-malane kosambuno Akhan lupaiyo dopalentadoo, sampe ko TEMENENO nggimoliiyo tuuno doi Israel miano. (Akhan tamano kosambuno Karmi tukon konatauwa kosambuno Zabdi luwedoi Zerah namondopulian doi Yehuda nabenseno lalomo.)

²Doi tempodoo Yosua mobintokon moimoiya komian luwedoi Yerikho taus doi Ai, doiyamo meeng kokota taambikon tolopot ko Betel, loolani ko Bet-Awen. Domian-mianoo tinugaskanggon sulano naambakon ondosuuke dolipudoo. Sambuno lapa yanila lakukene dopalentadoo,

³yanila abalimo tukon pelenggenemo doi Yosua. Yanila bantile, “Aki napalaluu kita sasaibino moambakon lobosiyo ko Ai. Makapatu tolong uga-ugaate lua kai tolu koloon komian. Inai mokapatuwo sasaibino kosuludadu indaa sulano napoolobosi, sabab dokotadoo poipoisik.”

⁴Jadi komo ambakon lobosiyo dokotadoo tongokai tolu koloon komian, bai yanila linunggui.

⁵Ko Ai mian-miano lelenggene yanila luwedoi kota Ai tataapono babasal polong doi lipu bakalian mosoni, maka yanila mangakate uga-ugaate tolukolono noom komian luwedoi antara yanila doi bunggo eyaakono. Maka ko Israel miano teali batabata tukon matakut.

⁶Yosua tukon Israel miano nakatua-katua susa tuuno sampe yanila bea-beake konapo pakean, tukon posopokon kooloyo polong popook yanila sosuba doi TEMENENO na Peti Perjanjian salaano tukon mangabos abu doi olunoila salaku paloosan nasusaan konoano.

⁷Yosua bantile doi TEMENENO, “Mian Bisa daku TEMENENO! Tuuk oila ikoo mobabayo kami polong doi Yordan sembeleng nia? Oilakai tuuk ikoo mosalakanggene kami doi Amori miano? Sulano maimate? Tadukai mai dungolo indaa tolong, doi Yordan sembeleng!

⁸Oh TEMENENO! Komusu lungguiyomo ko Israel miano. Budodoiya oila komo sio kubantile?

⁹Ko Kanaan miano tukon sasaibino komian bailonggon nailipu nia naikon lengele kokaliangano dolanggedoo. Maka naikon lobosiyomo tukon akateyomo kami sasaibino! Maka oilamokai naikon daku linakukon tuuk mopalataanggene Komuinodotiiyan?”

¹⁰TEMENENO timbiliyo Yosua, “Banguno! Akiyo konatotuuk ikoo mosomba bunodoiya doi buta!

¹¹Ko Israel miano lapamo mokubai lalim. Yaku lapamo palentakene sulano yanila naloingiyo koperjanjian antara yanila tukon Yaku, bai yanila lupaiyomo! Kolangge-langge mo sio nalinusak yanila alayomo. Yanila ndikuke tukon posombulikenemo konapo barang-barang sulano naaki natotoy.

¹²Doiyamo kosababpo yanila aki namoola bataanggon mosasalaane komusuh. Namusu lungguiyo yanila sabab yanila susuungokai lapamo tinuwongikon koukuman sulano nainakate. Yaku akimo kulolainge komuyu koidan, kalu kobarang-barang mo aki namoola inaladoo akiyoon naminanas.

¹³Budodoiya banguno, Yosua! Koliyousio ko Israel miano tukon sumboliiyo yanila nabatotobomo sulano namangadap doiyaku. Palentayomo yanila sulano napo bato-batotobo namodowa, sabab Yaku TEMENENO Israel na Mian Bisa naikon bontiikene naiya doi yanila: ‘Eh Israel miano! Barang-barang mo lapamo kupalentakene doi komuyu sulano naminanas, kosoobos daano doi komuyu. Kalu akiyoon posakukene dobarang-barangoo, komuyu aki naikon pomoola bataanggon molawane komusuh!’

¹⁴Tobikon doiya, Yosua, pailukenemo doi yanila baikon namodowa dodowa yanila naikon pinalesamo memeeng kobenseno. Kalu Yaku motudo meeng kobenseno, sasaibino kopuli doi bensenodoo lalomo sio namaju sasamba kopuli. Tukon kalu Yaku motudo meeng kopuli, sasamba kokaluargaa doi mondopulianoo lalomo sio namaju sasamba kokaluargaa. Doibundu kalu Yaku motudo meeng kokaluargaa sasamba komian doi kaluargaadoo sio namaju memeeng komian.

¹⁵Maka komian motinudo tukon totoy mangabos barang-barang molinalanggonoo yana sio nasinua kabus posinggat-singgat tukon kona kaluargaa tukon sasaibino kona langge mokoonamo; sabab yanamo komo lupaiyo koperjanjian tukon kubaiyo kokulokisan babasal doi Israel miano tanga-tangano.”

¹⁶Modowakon, dowa-dowa soono, Yosua sumboliiyo ko Israel miano namaju doi muka, sasamba kobenseno, maka Yehuda nabenseno komo kanakon.

¹⁷Maka Yosua sumboliiyo Yehuda nabenseno momaju doi muka, sasamba komondopulian, tukon Zerah namondopulian komo kanakon. Doibundu Zerah namondopulian sinumbolii momaju doi muka, sasamba kokaluargaa, tukon Zabdi nakaluargaa komo kanakon.

¹⁸Sambuno lapa doiya Yosua bintekenemo Zabdi nakaluargaa momaju doi muka, memeeng komian; maka Akhan, Karmi napau, Zabdi natumbu komo kanakon.

¹⁹Yosua bantile doi Akhan, “Dakupau, akuiyomo tukon bantilemo banggadudul naimbaa doi TEMENENO salaano, Israel na Mian Bisa, oila komo lapamo ikoo lakukene. Pailukenemo doi yaku, inai moseekene.”

²⁰“Tutuu,” Akhan bantile, “Yaku lapamo mokubai dosa doi TEMENENO Israel na Mian Bisa. Naiyamo daku linakukon:

²¹Doi antara barang-barang kita molambasemo, yaku kitayo komeeng kojubah monondok tuuno, Babilonia nabuatan, tukon koidan suasa uga-ugaate lua kokilogram, tukon meeng komosoni batango sembeleng lobian kokilogram. Yaku yase tuuno dobarang-barangoo, maka yaku alayomo tukon yaku seekenemo doi buta lalomo doi kusandung; kosuasano daano doi bilit tuuno.”

²²Maka Yosua mosumbolii mian mosobit-sobit doi Akhan nasandung. Tokita barang-barang molinalanggonoo sasaibino daano indaa, yana seekenemo doi buta lalomo, tukon suasano daano doi bilit tuuno.

²³Yanila babayo dobarang-barangoo tukon yanila babakenemo doi Yosua tukon sasaibino ko Israel miano. Maka dobarang-barangoo inaboso doi TEMENENO salaano.

²⁴Doibundu Yosua tukon sasaibino ko Israel miano lakoyo Akhan, tukon binabamo yana doi Kasusahan Pepelako polaing-laing tukon sasaibino konapau-pau, konasapi piniala, domba, sandung tukon sasaibino kona lobo tukon suasa, jubah tukon mosoni yana mondikukemo.

²⁵Maka Yosua bantile doi Akhan, “Bulaando ikoo molubatene kosusaan doi kita? Budodoiya ko TEMENENO olubatene kosusaan doikoo!” Maka Akhan tukon sasaibino kona kaluargaa ko Israel miano sakule tukon batu polong pomatekon. Sasaibino konapo buat, tukon koidan kona barang-barang ndinikuk sinua kabus.

²⁶Sambuno lapa doiya yanila tombuniomo dolipudoo tukon badaang tuuno kobatu mo polong oloyo nia daanoon modaano indaa. Doiyamo kosababpo dolipudoo daano mosinombuikon Kasusahan Pepelako. Sambuno lapa doiya tademo ko TEMENENO nanggimalan.