Read Banggai YOSUA 8 Bible Online

YOSUA 8 - Banggai bible

YOSUA 8

¹TEMENENO bantile doi Yosua, “Pototongikenemo sasaibino komu suludadu, tukon ambakono polaing yanila doi Ai. Inai mobata-bata tukon inai matakut! Yaku naikon beekene doikoo kokamanaangan doi tomundo Ai. Konarayat, konakota, tukon konalipu naikon ikoo lambasemo.

²Ai tukon tomundono sio mulakukene buno pokakana kona lakukangganano ko Yerikho tukon tomundono loolukon. Bai naiya nia kona barang-barang tukon kona iyayon piniala moola poalayo teali polobo. Pobato-batotobomo sulano polobosiyo dokotadoo doi natongodinggalaan luwedoi tonggulungo.”

³Maka Yosua bato-batotobomo sulano naambakon doi Ai polaing-laing tukon sasaibino kosuludadu. Yana molilik 30.000 komian kotalenga momondok, maka utuse yanila doi tempo popook,

⁴tukon beekene napalenta nia doi yanila, “Pobasookono indaa kotadoo sembeleng, bai inai motodudul odoon, tukon pobatotobomo tuuk polobosiyo.

⁵Yaku tukon daku anak buah naikon koolaniyo dokotadoo. Kalu naikon ko Ai miano tobuat sulano nalaane kami, kami naikon abali tukon bulen pokakana doi loolukoo.

⁶Yanila naikon lelenggene kami banggadudul polong odoon luwedoi kotadoo, tukon sangkayo baikon kami obulenggene kobutonggami pokakana doi loolukoo.

⁷Doi tempodoo doiyamo kopotobuatan luwedoi pobasookonan, tukon pousokiyomo dokotadoo. Ko TEMENENO mu Mian Bisa salakanggenemo dokotadoo doi komuyu.

⁸Sambuno lapa komuyu lambase, suayomo dokotadoo, pokokonoy ko TEMENENO napinalentakon. Doiyamo komutugas.”

⁹Doibundu Yosua sumboliiyo yanila, tukon yanila ambakon mobasookon doi talise sembeleng ko Ai antara Ai tukon Betel, maka pototiili idoo. Bai Yosua bamoolokon doi Israel miano nabasandungan.

¹⁰Dowa-dowa tuuno Yosua banguno tukon palentayomo konapasukan sulano napototongi. Doibundu yana tukon Israel miano nakatua-katua babayomo dopasukanoo doi Ai.

¹¹Dopasukanoo polaing-laing tukon Yosua ambakon badombalaakon kota Ai tataapono babasal tuuno, maka basandung doi lembet sembeleng idoo talaat komeeng kopepelako antara yanila tukon dokotadoo.

¹²Adukon 5.000 lobian komian molapamo sinumbolii basookon doi talise sembeleng doi kotadoo, napokalalatan koAi tukon Betel.

¹³Jadi, konasusunan dopasukan polobosidoo inatur bunonaiya: konabenteng mo babasal tinampatkanggon taalikon doi lembet dokotadoo tukon kopasukon bailonggon taalikon doi talise, bai Yosua ambakon doi pepelako doi popookoo.

¹⁴Salataa bunodoiya tomundo Ai kitayo Yosua naanak bua, mosoisoibiton yana mokubai parenta. Yana tukon sasaibino konamian tobuat tujuiyo ko Yordan Pepelako sulano nalobosiyo ko Israel miano doi tampatoo loolukon. Yana aki natoiyo baikon naapa doiya koidan yana naikon linobosimo luwedoi tonggulungo.

¹⁵Yosua tukon naanak buah mangkabai kadu-kadukon kala; tukon yanila bulen badombalaakon doi lipu mokindolon.

¹⁶Sasaibino komala-malane doi kota Ai sinumbolii sulano nalelenggene Yosua tukon donapasukanoo. Bai pololokon yanila lelenggene Yosua, pololokon dodoonokai yanila doi napokotadoo.

¹⁷Sasaibino komian doi Ai tobuat sulano nalelenggene ko Israel miano, sampe dokotadoo sinodiikono natobuka bunodoiya tolong, akiyo kopenjagaan.

¹⁸Doibundu TEMENENO bantile doi Yosua, “Binggatemo komu kalait tukon pasekenemo taalikon doi Ai; dokotadoo Yaku salakanggenemo budodoiya doikoo.” Yosua lakukene do TEMENENO doo napalenta.

¹⁹Sambuno Yosua pasekene kolimano, do pasukanoo mo basookon mosobit-sobit sumbut tukon lobosiyo dokotadoo, maka yanila lambasemo. Banggadudul yanila suayo dokotadoo.

²⁰Ko Ai, miano mbaleng doi tonggulungoila tukon kitayo kotibolung mokalikobungan polong doi timbu. Yosua tukon kona pasukan koidan kitayo kotibolung tukon toiyomo baikon kopasukan bailonggon lambasemo dokotadoo. Jadi, Yosua abalimo tukon kona pasukan tuuk molobosiyo tukon akateyo ko Ai miano. Ko Israel miano komo doi kota Ai dokai lubat tukon malaing momolobosi, sampe ko Ai miano tinikumo tukon aki namoola dampasene kobutongo. Akiyo komeeng komiankai moluwedoi yanila komo luput, sasaibino mate inakate luwedoi Israel miano,

²³alaasene tomundo Ai. Yana linako maka binaba mangadap doi Yosua.

²⁴Sambunolapa kopasukan Israel moakateyo kabus sasaibino komusuh nasuludadu molelenggene yanila doi lipu mokindolon, yanilakai abalimo doi Ai, tukon akateyomo sasaibino komian indaa.

²⁵Yosua banggadudul momeeng mopasekene konakalait taalikon doi Ai, tukon akimo naobulusene polong komian doi Ai lapamo tangakate sasaibino. Dooloyodoo koidan matemo sasaibino ko Ai tumbuno — 12.000 komian konakadaang, mala-malane tukon boiboine.

²⁷Iyayon piniala tukon barang-barang mo linaat doi kotadoo, ko Israel miano alayomo teali yanila nalobo, pokokonoy tukon ko TEMENENO nabinantil doi Yosua.

²⁸Yosua suayo ko Ai, tukon batadikenemo nateali kota lapono polong doi lounu nia.

²⁹Kotomundo doi kotadoo tinudemo doi meeng kosudong, tukon binatadikon idoo polong kinobian. Doi tempo nasopokan kooloyo matano, Yosua mosumbolii mian moalayo dobajanoo tukon sakukenemo doi tataapon mobabasal salaano. Doibundu dolipudoo tinombunimo tukon batu mo badaang tuuno. Dobatu-batudoo daano indaa polong budodoo nia.

³⁰ Doibundu Yosua kekendenge komeeng kobalabaan doi Ebal Bunggulo tuuk doi TEMENENO, Israel miano na Mian Bisa.

³¹ Dobalabaanoo kinubaimo pokokonoy tukon potudoikon-potudoikon doi Musa na Buku lalomo, do TEMENENO doo napeleleani, doi Israel miano: “Meeng kobalabaan luwedoi mo akiyoon nabiasa linimang tukon pakakas-pakakas besi.” Doi balabaanoo bunggono ko Israel miano mososubakon doi TEMENENO: sosubakon mosinua tukon koidan sosubakon napodamean.

³²Indaa, tukon Israel miano sakisiiyomo, Yosua motulis doi batu-batu balabaanoo konasinalinan ko TEMENENO Naukum-ukum mo talaat doi Musa na Buku lalomo.

³³ Ko Israel miano, tukon katua-katua, suludadu kapalano, hakim-hakim, tukon koidan komian sangalaasan komo podungoli yanila kokondong sosuwele kolisuko doi TEMENENO doo na Peti Perjanjian sasalaane ko Lewi miano naimam-imam mo tanggunge do Peti Perjanjianoo. Kosembeleng luwedoi mian-mianoo sasalaan doi Gerizim Bunggulo tukon kosembeleng koidan sasalaan doi Ebal Bunggulo. Musa, TEMENENO napeleleani lapamo maparentakene sulano yanila lakukene dolanggedoo kalubaikon laatemo kotempono tuuk doiyanila natalimaano kobalakaat TEMENENO mo dandikenemo.

³⁴Doibundu Yosua bacayomo buku-bukuan sasaibino koukum pokokonoy tukon komo totulis doi Buku Ukum lalomo, tongusokon kobalakaat-balakaat tukon kototopi-totopi.

³⁵Sasamba Musa napalenta Yosua bacakanggene doi sasaibino ko Israel miano mo pototongi idoo, tongusokon koboine, labuk-labuk, tukon mian sangalaasan mo podungoli yanila.