Read Banggai YOSUA 9 Bible Online

YOSUA 9 - Banggai bible

YOSUA 9

¹Bilita tentang Israel miano nakamanangan-kamanangan tololongol doi sasaibino kotomundo taalikon doi tolopot ko Yordan Paisunobatango — doi bunggul-bunggul, doi bunggul-bunggul uuno, tukon doi seanono popupuson ko Tobun Tanga bibilo polong konaodoonan doi Libanon Bunggulo taalikon doi lembet; doiyamo tomundo-tomundo Het, Amori, Kanaan, Feris, Hewi tukon Yebus.

²Sasaibino dotomundo-tomundodoo pomeenggon tukon pototongi sulano yanila nalobosiyo Yosua tukon ko Israel miano.

³Bai ko Gibeon miano moluwedoi bangsa Hewi lapamo lengele kokaliangano oila komo Yosua nalinakukon motuuk doi Yerikho tukon Ai.

⁴Maka yanila putusemo sulano naakakene Yosua tukon yanila mangalakit doinapo keledai bunggono: karung-karung motua, anggur kantong-kantongo mo kulo-kulokis mokinubai luwedoi kulit. Tukon salaku mandu, yanila masadia tongo roti molapamo motuul tukon bukukono.

⁵Yanila mapake pakean momosi-mosiako sapatu motuamo tukon tinambal-tambalo.

⁶Tukon kokubai mobuno doiya yanila ambakono mopososuung Yosua doi basandungan doi Gilgal maka bantile doi yana tukon doi Israel miano, “Kami lubat luwedoi tano mo odoon tuuk mokubai perjanjian tukon Tuan-tuan.”

⁷ Bai ko Israel miano bantile, “Tuuk oila kami momangkabai perjanjian tukon komuyu? Uga-ugaate kopo lipu dungolan aki nadodoon naimbaa!”

⁸Yanila bantile, “Kami yase molakukene oila tolong komo Tuan napinalentakon.” “Komuyu indeemo? Tukon tano oila kopo luwean?” Yosua sadaiyo doi yanila.

⁹Yanila timbiliyo, “Kami lubat luwedoi tano mo odoon tuuno, Tuan, sabab kami lengele kokaliangano ko TEMENENO Mian Bisa Tuan mososubaiyo. Kami lengele kokaliangano sasaibino komo linakukanggono doi Mesir

¹⁰ tukon kokaliangano oila kona linakukanggon motuuk doi looluakon kotomundo Amori taalikon doi tolopot ko Yordan, doiyamo Sihon tomundo Hesy tukon Og tomundo Basan mo dungol doi Asytarot.

¹¹Katua-katua tukon sasaibino komai lipu tumbuno sumboliiyo kami momasadia mandu tuuk lengget naimbaa pososuunggene Tuan-tuan, tukon nyatakanggene baikon kami taaluk doi Tuan-tuan. Tobikon doiya, kami kabiyo Tuan-tuan namonondokan konoano sulano namangkabai perjanjian tukon kami.

¹²Sobakai Tuan-tuan pokitayo, komai roti mandu nia. Salataa kami lengget naroti nia daano moonas. Bai dia budodoo, kitayomo! Motuulo tukon bubukono.

¹³Tukon napulukon-pulukon anggur nia daanoon moboolu doi tempo mai ontokiyano; bai diabudodoo pokitayomo! Mosi-mosiako. Komai pakean tukon komai sapatu kai manaso sabab ambakonan moodoon nia.”

¹⁴Maka ko Israel miano mantalima soisik luwedoi Gibeon mianodoo nakinaan, tukon aki namansadai doi TEMENENO mengenai dolanggedoo.

¹⁵Yosua mangkabai perjanjian poosobatan tukon do Gibeonoo miano, tukon paladandi tuuk aki naakateyo yanila. Kokatua-katua Israel miano koidan, batotopi tuuk motepatiyo doperjanjianoo.

¹⁶Bai tokita, doi oloyo kotoluno salata doperjanjianoo kinubaimo, ko Israel miano laatemo kokota Gibeon, Kefira, Beerot tukon Kiryat-Yearim doi mian-mianoo nadaerah. Maka sodo natoiyo baikon konapo tampat dungolan aki naodoon doi Gilgal.

¹⁸Bai ko Israel miano aki namoola akateyo yanila, napo katua-katua Israel lapamo batotopi doi yanila luwedoi TEMENENO Israel miano na Mian Bisa sambuno. Sasaibino ko Israel miano palabebemo mengenai dolanggedoo doi napo nakatua-katua.

¹⁹Bai dokatua-katuadoo timbiliyo, “Akiyo komokubaiyan. Kami lapamo paladandi doi yanila tukon batotopi luwedoi Israel miano na TEMENENO Mian Bisa sambuno. Budodoiya kita aki namoola mokubai lokis motuuk doi yanila.

²⁰Kita aki namoola moakateyo yanila sabab kita lapamo paladandi, tukon kalu kita akiyenggene dodandidoo ko Mian Bisa naikon ukume kita.

²¹Jadi batadikenemo yanila natubo, bai kita sasaibino tealikene yanila tukang pabatai kayung tukon tukang patanggung paisu tuuk doi kita sasaibino.” Bunomo doiya dokatua-katuadoo nabantilan.

²²Maka do Gibeonoo miano inuang mangadap doi Yosua: Yosua bantile, “Bulaando komuyu motipuwo kami tukon bantile baikon komulipu dodoon tuuno, baanggokai komutano tongo naimbaa.

²³Sabab komuyu kubaiyo bunodoiya, ko Mian Bisa ukume komuyu. Komu bangsa naikon sidutu teali ata, tukang pabatai kayung tukon tukang patanggung paisu tuuk doi ku Mian Bisa na Bonua.”

²⁴Yanila timbiliyo, “Kami kubaiyo bunodoiya tobikon kami lengele baikon ko TEMENENO Mian Bisa Tuan mososubaiyo lapamo sumboliiyo Musa, dona peleleanidoo, mobeekene doi Tuan posaapon nalipu nia tukon akateyo sasaibino kotumbuno doi tempo Tuan naalaano butadoo. Kami matakut tuuno kalu kami inakate, doiyamo kosababpo tobikon mai lakukene nia sasaibino.

²⁵Budodoiya kami daano doi Tuan nakakuasaan lalomo. Polakukanggenemo kami pokokonoy komo monondok Tuan napambaleng.”

²⁶Maka naiyamo komo Yosua nalinakukanggon: yana lindungiyo domian-mianoo tukon aki napataikene ko Israel miano moakateyo yanila.

²⁷Bai yanila tealikenemo ata — doiyamo tukang pabatai kayung tukang patanggung paisu tuuk doi Israel miano tukon tuuk TEMENENO nabalabaan. Polong diabudodoo yanila daano molakukene dolimangoo doi lipu TEMENENO molilike moteali lipu bakaledaan doi yana.