Read Banggai FILEMON 1 Bible Online

FILEMON 1 - Banggai bible

FILEMON 1

¹Utus Filemon, tulando tukon tulanggami! Yaku, Paulus, meeng komian motinalunggu sabab Kristus Yesus, polaing tukon utusonggita Timotius, komo tulise nasuratia doikoo

² tukon doi jemaat mo pototongi doi mubonua; koidan doi utusonggita Apfia tukon tulanggita momeeng koperjuangan, doiyamo Arkhipus.

³Kami moinikene boliisi ko Mian Bisa Tamanggita tukon Temeneno Yesus Kristus mebee balakaat tukon namonondokan doikoo.

⁴Sasamba luunggon yaku sambeang, yaku bantile Utus sambuno tukon mopolonggon kinatauwan doi Mian Bisa.

⁵Sabab yaku molongol baikon Utus tutuu mangangga doi Temeneno Yesus tukon seseange sasaibino ko Mian Bisa namian.

⁶Yaku sambeang boliisi konda motolutusan napokakana komian momangangga naikon okitakene kopengertian mo lobian babasal doi sasaibino kobalakaat mo daano doi kita sabab kita pomeenggono tukon Kristus.

⁷Utus Filemon, museangano doi sasaibino ko Mian Bisa namian, yaku laba tuuno tukon beena dorongan doi yaku! Sasaibino ko Mian Bisa namian lapamo teali laba sabab Utus.

⁸Doiyamo kosababpo, buno meeng komian utuso momeeng komanganggaan, yaku moolamo parentayo Utus tuuk lakukene oila komo pantas Utus lakukanggene.

⁹Bai sabab yaku seseange Utus, yaku tongo mangkabi tolong. Yaku nia meeng komian motuwa tukon diabudodoo daano doi talunggu lalomo sabab Kristus Yesus.

¹⁰ Yaku, Paulus, pelenggene meeng kokakabi doikoo tentang Onesimus, kupau doi Kristus lalomo. Sabab doi talunggu nia lalomo yaku lapamo teali tama rohani.

¹¹Looluk yana aki naberguna tuuk ikoo, bai diabudodoo yana bergunamo, bolikon tolongo tuuk ikoo tolong, baikai koidan tuuk doikoo!

¹²Diabudodoo mian domianoo yaku moseange yaku kapatuwo koidan doikoo.

¹³Kona bisaan yaku taane yana sulano napolaing yaku tukon nateali soboliyo ikoo, sulano yana namoola tombonii yaku, selama kutinaanan doi talunggu nia lalomo sabab babotilanggene Bilita Monondok luwedoi Mian Bisa.

¹⁴Bai aki kuyase lakukanggene oioila kalu Utus akiyoon musotujuiyo. Yaku yase tuuno kalu Utus kubaiyo tukon noamu susuumu nameleosan; yaku aki kupakisaayo ikoo.

¹⁵Moola Onesimus tinggale doi Utus bai aki namalumbit sulano Utus moola laate yana abali tuuk sidutu-posidutukon.

¹⁶Diabudodoo yana bolikon tolongo meeng koata; yana lobiano doiya. Yana daano tulando mian Salani mo sineang. Yana berguna tuuno doi yaku, bainokai tuuk doikoo! Yana berguna tuuno mau nabuno komeeng kopeleleani mau kai nabuno meeng komian utuso doi Temeneno lalomo!

¹⁷Tobikon doiya, sabab Utus toiyo yaku tulanggita Salani miano, talimayo koidan Onesimus pokakana buno Utus talimayo yaku.

¹⁸Kalu yana sala kabai basamea doikoo, sodiiyomo maka kutanggunge kokabuson.

¹⁹Eh, monondoko yaku batulis susuunggu diimbaa: Yaku, Paulus, naikon olunosiiyo sasaibino. (Tantu aki napalaluu yaku tondoikene baikon Utus koidan daano komu samea doi yaku, doiyamo mutuboan boolu doi mutealian Salani miano.)

²⁰Tobikon doiya, oh Temeneno coba tulunge yaku, sanaanggene konoanggu pokakana koutus doi Kristus lalomo.

²¹Yaku tulise nasuratia sabab yaku anggayo baikon Utus naikon lakukanggene oila daku kinabi. Bisa yaku toiyo Utus naikon molakukanggene lobian doiya.

²²Diabudodoo yaku makabi tulung sulano mumasadianggu meeng kokombiang motuuk doiyaku, sabab yaku moinikenemo ko Mian Bisa talimayomo sasaibino Utus-utus nasambeang tobikon doiya yana babayo yaku abali doi komuyu.

²³ Epafras, komo daano polaing yaku doi talunggu lalomo sabab Kristus Yesus, kapatuwo kona teteba doikoo.

²⁴ Talimayo koidan kotula-tulanggu nateteba; Markus, Aristarkus, Demas tukon Lukas.

²⁵Boliisi ko Temeneno Yesus Kristus nabalakaatiyo komuyu. Komai Hormat, Paulus