Read Banggai TANO-TANO 1 Bible Online

TANO-TANO 1 - Banggai bible

TANO-TANO 1

¹Sambuno lapa Yosua mate, ko Israel miano masadai doi TEMENENO, “TEMENENO, indee kobenseno moluwe doi kami komo tumbe-tumbeno motaus lobosio ko Kanaan miano?”

²TEMENENO timbiliyo, “Yehuda nabenseno. Yanila lapamo Kubeekene kokakuasaan sulano nalambase dolipudoo.”

³Maka Yehuda nabenseno bantil doi Simeon nabenseno, “Tomboniiyo ikami molobosiyo ko Kanaan miano tukon molambase kowilayah molapamo TEMENENO tantukanggene tuuk doi kami. Kami naikon tomboniiyo komuyu molambase dowilayahdoo TEMENENO motantukanggenemo tuuk doi komuyu.” Maka Simeon nabenseno

⁴tukon Yehuda taus polaing-laing momolobosi. Tukon ko TEMENENO beekene doi yanila komanaangan doi Kanaan miano tukon Felis miano. Songulo koloon komian komusuh nasuludadu mo mate doi Bezek.

⁵Yanila posuunggene Adoni-Bezek, dolipudoo tomundono tukon lobosio yana.

⁶Yana obulen, bai yanila lelenggene tukon lakoyo yana maka patele kolimano saono tumbuno tukon aino.

⁷Adoni-Bezek bantile, “Doi loolukoo pitu kolono kotomundo lapamo yaku patele kolimano sasaono tumbuno tukon aino, maka yaku batadikenemo yanila mokaane kokinaan labi-labino motuwong luwedoi kumeda. Budodoiya ko Mian Bisa lakukanggenemo yaku pokakana buno kulakukangganano yanila.” Adoni-Bezek doibundu binaba doi Yerusalem, tukon indaamo kona matean.

⁸Yehuda miano lobosiyo ko Yerusalem maka lambase tukon suayo dokotadoo tukon akateo kotumbuno.

⁹Salataa lapa doiya yanila ampakon koidan lobosiyo ko Kanaan miano mo dungol doi lipu mo bunggokon, tukon doi bunggul bibilo; koidan modungol doi lipu mokindolon doi lalom taalikon,

¹⁰tukon doi kota Hebron, doiyamo kota doi loolukonoo mo sinombuikon Kiryat-Arba. Idoo Yehuda miano lungguiyo ko Sesai miano, Ahiman tukon Talmai.

¹¹Luwedoi Hebron, ko Yehuda miano taus lobosio kokota Debir, doi tempodoo kosambuno Kiryat-Sefer.

¹²Daano komeeng komian moluwedoi Yehuda nabensenodoo, kosambuno Kaleb, bantile, “Indee komiano komo moola lambase ko Kiryat-Sefer, yana moola osowaan tukon dakupau boineno Akhsa.”

¹³Otniel, luwedoi Kaleb utuso pioto napau kosambuno Kenas, komo lambase dokotadoo. Maka Kaleb beekene Akhsa, donapaudoo teali Otniel naboloki.

¹⁴Doi napoosowaanan oloyono, Otniel desaake Akhsa sulano namakabi soobos kolaing moluwedoi tamano. Maka obuluso Akhsa luwedoi nakeledai, maka Kaleb sadaiyo doi yana oila komu pinalaluu.

¹⁵Akhsa timbiliyo, “Yaku mapalaluu bubula kopaisu matano, sabab butadoo tama mobeekanaku tangabos doi lipu mokindolon.” Maka Kaleb beekene doi yana kopaisu matano taalikon uuno tukon paisumatano mo taalikon doi bilit.

¹⁶Musa namonianan tamano naturunan, doiyamo Keni miano, molainge ko Yehuda miano tobuat luwedoi Yerikho, kota Kurma, tukon taus doi lipu mo kindolon doi Arad taalikon lalom doi Yehuda. Indaa yanila podungolimo kobangsa Amalek.

¹⁷Doibundu polaing-laing tukon Simeon nabensenodoo taus molobosi tukon lungguiyo ko Kanaan miano mo dungol doi kota Zefat. Yanila kutukiyo dokotadoo, doibundu akabusemo maka naposombuikene Horma.

¹⁸Ko TEMENENO tulungiyo ko Yehuda miano tobikon yanila moola lambase kolipu mo bunggokon. Bai yanila aki namoola lambase ko Gaza, Askelon kai Ekron tukon lipu-lipu doi napokolanian, sabab kobangsa-bangsa mo dungoliyo popupuson kokota bibilo daanoon kona kereta-kereta polobosian moluwedoi besi; tobikon doiya ko Yehuda miano aki namoola siikayo yanila.

²⁰ Bunomolakon komo lapamo Musa palentahkene, Hebron bineekon doi Kaleb, sabab looluk tolu kotambuno Enak miano naturunan lapamo Kaleb siikayo luwedoi kotadoo.

²¹ Benyamin nabenseno aki namoola siikayo ko Yebus miano nadambas luwedoi kota Yerusalem. Doiyamo kosababpo ko Yebus miano daano mopodungoli ko Benyamin miano indaa.

²²Efraim tukon Manasye nabenseno Yusuf naturunan, taus lobosio kokota Betel, doiya kosinggato kosambuno Lus. Tukon ko TEMENENO tulungiyo yanila. Doi tempodoo sinumbolii koondosuuk motaus doi kotadoo,

²⁴yanila pososuung tukon meeng komala-malane mo lubat luwedoi kota. Yanila bantile doi yana, “Kalu ikoo yase tulungiyo kami sulano maimoola usok doi kota nia lalomo, ikami naikon kubaiyo ikoo tukon monondok.”

²⁵Maka domianoo tudoikene kololoon usokan doi kotadoo. Maka Efraim tukon Manasye miano usokio dokotadoo tukon akateo sasaibino kotumbuno, alaasene domianoo tukon namotolutusan.

²⁶Yana doibundu biyol doi Het miano nalipu, maka kekendenge komeeng kokota idoo tukon sombuikene Lus. Dokotadoo daano motataap kosambuno bunodoiya.

²⁷ Manasye nabenseno aki nasiikayo kokota Bet-Sean tumbuno, Taanakh, Dor, Yibleam tukon Megido tukon kampung-kampung napokolanian. Jadi ko Kanaan miano tataap dungol idoo.

²⁸Takainomo salataa ko Israel miano tosuungi konabukuanan, yanila pakisaayo ko Kanaan miano nabalimang tuuk yanila, bai yanila koidan aki nasiikayo tuuno ko Kanaan miano naluwe idoo.

²⁹ Doi kota Gezer, Efraim nabenseno aki nasiikayo ko Kanaan miano, dokotadoo tumbuno. Jadi, ko Kanaan miano daano motataap podungoli idoo tukon yanila.

³⁰Kokota Kitron tukon Nahalol tumbuno ko Zebulon nabenseno aki nasiikayo. Tobikon doiya kobangsa Kanaan daano motataap podungoli idoo tukon yanila, bai do Kanaan mianodoo pinakisaa mobalimang tuuk yanila.

³¹Kokota Ako, Sidon, Ahlab, Akhzib, Helba, Afek tukon Rehob tumbuno aki koidan ko Asyer nabenseno nasiikayo.

³²Tobikon doiya ko Kanaan miano, dolipudoo tumbuno tuuno daano mopodungoli idoo tukon Asyer miano.

³³Kokota Bet-Semes tukon Bet-Anat tumbuno aki koidan Naftali nabenseno nasiikayo. Tobikon doiya ko Kanaan miano, dolipudoo tumbuno tuuno daano mopodungoli idoo tukon Naftali miano. Bai yanila pinakisaa mobalimang tuuk doi Naftali miano.

³⁴Kobangsa Amori daano motataap dungol doi Asyalon, Saalbim tukon Heres Bunggulo, sabab Dan nabenseno yanila desaake doi lipu bunggokon, tukon aki napinataikon obulus doi lipu seanono. Bai dobangsa Amoridoo Efraim tukon Manasye nabenseno sidutu tekaane tukon pakisaayo mobalimang tuuk doi bensenodoo molua.

³⁶Doi taalikon lembet ko Sela, ko amori mia-miano nalipu bataso liisiyo Kotoliboan doi Akrabim.