Read Banggai TANO-TANO 10 Bible Online

TANO-TANO 10 - Banggai bible

TANO-TANO 10

¹Salataa Abimelekh matemo, Tola Pua napau, teali katua mo olupute ko Israel miano. Yana doiyamo Dodo natumbu doi Isakhar nabenseno. Yana dungol doi Samir doi Efraim lipuno bunggulo.

²Lua kolono tolu kotaun konakalumbit konakatuaiyano ko Israel miano, doibundu yana mate maka kinibul doi Samir.

³Lapa Tola, Yair komo katuaiyo ko Israel lua kolono lua kotaun konakalumbit. Yair konaluwean doi Gilead.

⁴Konapau mala-malaneno daano kotolu kolono komian. Yanila mototooli tolu kolono konapoo keledai lakitan tukon tolu kolono konapoo kambung doi Gilead lipuno. Dokambung-kambungoo daanoon mosinombuikon Yair nakambung-kambung.

⁵Yair koidan mate, tukon kinibul doi Kamon.

⁶Ko Israel miano mokubaimo koidan lalim doi TEMENENO. Yanila aki napusinggene ko TEMENENO tukon aki nasosubaiyo Yana koidan. Yanila sosubaiyo kopilogot-pilogot Baal tukon Asytoret, tukon bangsa Siria, Sidon, Moab, Amon tukon Filistin napilogot-pilogot.

⁷Tobikon doiya ko TEMENENO nggimoliiyo ko Israel miano, tobikon Yana batadikene kobangsa Filistin tukon bangsa Amon nakuasaiyo yanila.

⁸Songulo alu kotaun konakalumbit loluakon dobangsadoo nalailaingganano ko Israel miano mo dungol doi Gilead, doiyamo Amori miano nalipu mo taalikon doi tolopot ko Yordan Paisunobatango. Yanila palentahyo ko Israel miano tukon lokis.

⁹Bai ko Amon miano pintosiiyo ko Yordan Paisunobatango sulano naampakon lobosiyo ko Yehuda nabenseno, Benyamin tukon Efraim komo mangaanikene ko Israel miano sakisaa tuuno.

¹⁰Maka ko Israel miano uang doi TEMENENO, konabantilano, “Ikami baladosamo doi Koo, sabab akimo mai popusinggon Ikoo oh komai Mian Bisa. Ikami sosubaiyo kopilogot-pilogot Baal.”

¹¹Ko TEMENENO timbiliyo, “Doi loolukonoo ko bangsa Mesir Amori, Amon, Filistin, Sidon, Amalekh tukon bangsa Maon lai-lainggene komuyu. Maka doi tempodoo komuyu uang mangkabi tulung doi Yaku, bolikon? Soba neneeke, oilakai aki Kusalamatene komuyu luwedoi napoo kakuasaan?

¹³Mau nabuno doiya, komuyu daanoon koidan mototonggulunga-Ku, maka potaus sosubaiyo kopilogot-pilogot. Diabudodoo akimo kuiyase koidan mosodiiyo komuyu.

¹⁴Potausokai doipoo pilogot-pilogotoo pinili. Pouangokai doi yanila! Batadikenemo yanila natulungiyo komuyu doi tempo posusaan lalomo.”

¹⁵Bai ko Israel miano bantile doi TEMENENO, “Ikami baladosamo doi TEMENENO. Lakukenemo oilamo tolong komu mongiasan, asal Ikoo mutulungiyo kami oloyo nia.”

¹⁶Doibundu yanila sakukenemo sasaibino kopilogot timbalango, maka sosubaiyo ko TEMENENO Mian Bisa. Maka ko Mian Bisakai poloon konoano mokitayo yanila doi susah lalomo.

¹⁷Doiya kotempono Amon nasuludadu daanoon mobato-batotobo sulano nataus polobosi. Yanila mokubai sandung doi Gilead. Ko Israel mianodoo lapamo pototongi tukon basandung doi Gilead.

¹⁸Indaa korayat tukon sasaibino kokatua mo luwedoi Israel bense-bensenodoo yanila posadaikene oilakai doi yaniladoo daano komo barani bingkate konasinapan molawane kobangsa Amon. Domianoo naikon tinealikon katua doi sasaibino ko Gilead tumbuno.