Read Banggai TANO-TANO 11 Bible Online

TANO-TANO 11 - Banggai bible

TANO-TANO 11

¹Yefta daano meeng kosuludadu motambongan barani. Konadungolan doi Gilead. Kotamano sambuno Gilead bai kotinano meeng komian mo tombololoaon.

²Dotamanodoo daano koidan konapau-pau malane bailon luwedoi naboloki mo sah. Salataa dona paupaudoo paumalanekon, yanila siikayo Yefta luwedoi nabonua. Yanila bantile doi yana, “Ikoo aki naikon mumalaat obos oioila mo luwedoi tamanggami, sabab ikoo pau moluwedoi boine bailon.”

³Tobikon doiya Yefta poalaaso doi utus-utusodoo maka taus tukon dungol doi Tob lipuno. Indaa meeng kotambuno komian molokis pototongi tukon yana maka yanila taus malambok.

⁴Bubula kotempo ko Israel miano Amon miano lobosio.

⁵Salataa teali dolanggedoo, sasaibino ko Israel katuano doi Gilead taus tukon oluuliyo Yefta natinggale ko Tob lipuno.

⁶Yanila bantile, “Katuaiyomo kami molawane ko Amon miano.”

⁷Bai Yefta timbiliyo, “Bolikonkai komuyu mosikitinemo tuuno yaku? Komuyu lapamo siikayo yaku luwedoi tamanggu nabonua. Bulaando diabudodoo doi tempo posusaan lalomo maka polubat doiyaku?”

⁸Yanila timbiliyo, “Kami lubat sabab ikami yase sulano ikoo mukatuaiyo sasaibino ko Gilead tumbuno sulano nalobosio kobangsa Amon diabudodoo koidan.”

⁹Yefta timban, “Kalu komuyu oluliyaku kuabali doi Gilead sulano ndalobosio ko bangsa Amon, tukon TEMENENO beena kamanangan doi kita, yakumo naikon komo kuasaiyo doi komuyu.”

¹⁰Yanila timbiliyo, “Kami satuju. TEMENENO komo teali sakisii.”

¹¹Maka luwemo Yefta polaing-laing tukon sasaibino ko Gilead katuano. Doibundu ko Gilead tumbuno oduduke yana teali balakuasa tukon teali katua. Tukon doi TEMENENO salaano doi Mizpa, Yefta pelenggene kona kakabi-kakabi doi Gilead miano.

¹²Lapadoiya Yefta mobintokon mian tuuk mobontiikene doi tomundo Amon buno naiya. “Oila komai salah tobikon polobosio komai tano?”

¹³Tomundo bangsa Amon timbiliyo dobito-bitodoo, “Salataa ko Israel lubat luwedoi Mesir, yanila alayo komai buta, tambuun luwedoi Arnon Paisunobatango polong doi Yabok Paisunobatango tukon Yordan Paisunobatango. Diabudodoo abalinggenemo doiya tukon podamean.”

¹⁴Maka Yefta mobintokon koidan mian doi tomundo Amon

¹⁵sulano natimbiliyo bunonaiya, “Ko Israel miano aki nanggoola lambase ko Moab miano nabuta kai Amon miano nabuta.

¹⁶Salataa ko Israel miano otinggale ko Mesir, yanila pakituuwo ko Akaba minangano mo loloiyo padang bone maka polong doi Kades.

¹⁷ Doibundu yanila mobintokon mian doi tomundo Edom tukon mangkabi isin naloloiyo konatano. Bai yana aki napataikene doi yanila. Doibundu manggabi langge mopokakana doi tomundo Moab, bai yanadoo aki nabeena isin yanila mololoiyo doi nalipu. Tobikon doiya ko Israel miano dungol doi Kades.

¹⁸ Lapadoiya yanila banggadudukene konapoo ambakonan lolodoi padang bone, bai aki napoo loloiyo ko Edom tukon Moab lipuno bai mangala loloon mo bailing tobikon doiya polong doi Moab taalikon tolopot doi Arnon Paisunobatango sembeleng. Yanila basandungo indaa, bai aki napoo pintosiiyo dopaisu batangodoo, sabab dotanodoo tongusokon Moab nalipu.

¹⁹ Lapa doiya ko Israel miano mobintokon mian doi Sihon, tomundo Amori doi Hesybon tuuk momangkabi isin loloiyo ko Amori lipuno, sabab yanila naikon taus doi napoo lipu susuungo.

²⁰Bai Sihon aki napataikene yanila sabab aki naanggayo baikon yanila tolongo yase alokon tolong. Baanggokai yana tolongo atule sasaibino konasuludadu polobosi maka namokubai benteng doi Yahas doibundu lobosiomo ko Israel.

²¹Bai ko TEMENENO, Israel na Mian Bisa, beekene doi Israel miano komanaangan doi Sihon tukon nasuludadu polobosi. Bunomokai doiya ko Israel miano nalaatano sasaibino ko Amori miano nabuta-buta mo dungol doi tanodoo.

²²Do Amori mianodoo yanila dungoliyo tambuun luwedoi Arnon taalikon lalom, polong doi Yabok Paisunobatango taalikon doi lembet, tukon luwedoi padang bone taalikon doi tolopot, polong Yordan Paisunobatango taalikon talise.

²³Jadi ko TEMENENO, Israel na Mian Bisa, doiyamo komo siikayo ko Amori miano tuuk TEMENENO namian nakapalaluuan.

²⁴Tukon diabudodoo nia oilakai ikoo yase moalayo koidan? Buta Kamos mo beekene, muiladoo doi komuyu doiya tataap komuyu. Bai oila komo lapamo TEMENENO beekene, komai Mian Bisa doi kami, naikon kami palataanggene.

²⁵ Ikoo anggene ikoo lobian monondok luwedoi Balak Zepor napau, tomundo Moab? Balak aki nabiasa tantaange kai nalobosio ikami.

²⁶Tolu kosakato kotaun konakalumbit ko Israel nadungoliyano ko Hesybon tukon Arur tukon kambung-kambung doi napotikunggonan, tukon sasaibino kokota-kota doi Arnon Paisunobatango natolongan. Tukon bulaando doi namalumbitanoo ikoo moakimo muabali alayo?

²⁷Aki, ikami akiyo komai salah doi komuyu. Ikoomo komo salah sabab molobosiyo ikami. TEMENENOkai kohakim nai oloyo nia mo putusiyo napalakala nia antara Israel miano tukon Amon miano.”

²⁸Bai tomundo Amon aki namopusinggon koteteba mo luwedoi Yeftadoo.

²⁹Doibundu ko TEMENENO Naroh kuasaiyomo Yefta. Maka Yefta tauso moduutio ko Gilead lipuno tukon Manasye doibundu abali doi Mizpa doi Gilead. Luwe idoo yana banggadudukene kona ampakonan doi Amon miano nalipu.

³⁰Yefta kubaiyo naperjanjian nia doi TEMENENO, “Kalu ko TEMENENO pataikanaku molungguiyo ko Amon miano,

³¹tukon yaku abali tukon salamat, maka indeemo komo tobuat tumbe-tumbeno luwedoi kubonua tuuk mololobotio yaku, naikon yaku sosubakene salaku sosubakon mo sinua doi TEMENENO.”

³²Maka Yepta pintosiiyo ko Yordan Paisunobatango sulano nalobosio ko Amon miano, tukon TEMENENO beekene komanaangan doi yana.

³³Yefta lobosio yanila kabus-pokabuson luwedoi Arur polong doi napoloolanikonan ko Minit lipuno — sasaibino lua kolono kokota — tukon polong potimbang ko Abel-Keramim. Badaang tuuno ko Amon miano mo mate, tobikon doiya ko Israel miano lungguiyomo yanila.

³⁴Salataa Yefta abali doi Mizpa, lubat konapauboine mololobotio yana tukon osuleng maka batenge kobobolon. Doiyamokai donapaudoo motongo meeng.

³⁵ Sambuno Yefta kitayo susah tuuno tobikon doiya yana bending-bendinge konakalambi, maka bantile, “Aduh dakupau, susah tuuno konoanggu! Bulaandokai mosio ikoo komo tealikene susah konoanggu? Yaku lapamo batotopi doi TEMENENO, tukon akimo namoola kusaalikene koidan.”

³⁶Maka boinedoo bantile doi Yefta, “Tama lapamo batotopi doi TEMENENO, tukon ko TEMENENO lapamo loasene Tama mobalase ko Amon miano, Tamanggu namusuhdoo. Jadi oila komo lapamo Tama paladandikene siokai Tama natapaatiyomo.”

³⁷“Tolongo” boinedoo bantile, “yaku kabiyo komeeng kolangge: Beenggukai tempo lua kobituwon sulano kuamba-ambakon doi lipu nabunggokonan polaing-laing tukon tula-tulanggu Indaa yaku naikon kokiiliyo daku tuboan, sabab yaku naikon momate sodo pauboinekon.”

³⁸Kotamano pataikenemo yana, maka yana sodiiomo taus. Boinedoo tukon tula-tulano taus doi bunggul sulano indaa napoloonggene konoano, sabab yana naikon mate akiyoon naosowaan tukon malaat pau.

³⁹Lapa liise lua kobituwon, yana abalimo doi tamano, maka kotamano lakukene oila komo lapamo dondiikene doi TEMENENO. Maka boinedoo mate daanoon mopauboinekon. Doiyamo konalenggetan tumbeno bulaando ko Israel miano nabinatilan, konakabiasaan

⁴⁰kopau-pau boine sasamba kotaun motaus sangkap kooloyo tuuk poloonggene konoano moneneeke Yefta napau doi Gilead.