Read Banggai TANO-TANO 12 Bible Online

TANO-TANO 12 - Banggai bible

TANO-TANO 12

¹Doi tempodoo ko Efraim benseno bato-batotobomo tuuk polobosi, maka taus pintosiiyo ko Yordan Paisunobatango. Kona pinakituu doi Zafon. Yanila bantile doi Yefta, “Bulaando ikoo motaus molobosiyo ko Amon miano aki mutobio ikami? Diabudodoo ikami naikon suayo ikoo tukon mubonua antoko.”

²Yefta bantile, “Antara Amon miano tukon ikami Gilead miano daano koposalakonan mo babasal. Komuyu lapamo yaku uange sulano potombonio moolupute yaku luwedoi Amon miano, bai aki polubat.

³Jadi salataa lapa yaku pikikene baikon komuyu aki naikon polubat motomboniiyaku, yaku tetenggene motaus lobosio ko Amon mianodoo, maukai naikon kumate. Maka ko TEMENENO beekene doiyaku komanaangan luwedoi yanila. Bulaando diabudodoo komuyu molubat lobosio yaku?”

⁴Doibundu Yefta pototongikene sasaibino ko Gilead miano, maka yanila, lobosio tukon lungguiyomo ko Efraim miano. (Ko Gilead miano mo dungol doi Efraim tukon Manasye ko Efraim miano laitemo baikon yanila lapamo alaase kobutongo luwedoi Efraim nabenseno.)

⁵Ko Gilead mianodoo mo daano mopolobosi, dungoliyo kotampat-tampat pintasan doi Yordan Paisunobatango, sulano namoola semba-sembange ko Efraim miano moiyase dambas. Doi tempo meeng ko Efraim miano mo kabi dambasene kobutongo, kabiyo sulano napintas, ko Gilead miano masadai doi yana, “Oilakai ikoo Efraim miano?” Kalu yana timbiliyo, “Bolikon,”

⁶yanila sumboliiyo yana nabantile kobantilan, “Syibolet”. Yana naikon bantile, “Sibolet” sabab aki nateali mobantile dobantilanoo tukon mosobit. Maka yanila naikon lakoyomo tukon akateomo doi meeng kolipu pintasanoo. Maka tangakatemokai ko 42.000 ko Efraim miano doi tempodoo.

⁷Yefta katuaiyo ko Israel miano noom kotaun konakalumbit. Doibundu yana mate maka kinibul doi nakambung susuungo doiyamo doi kota Mizpa doi Gilead.

⁸Salataa lapa Yefta, Ebzan mo luwedoi Betlehem komo katuaiyo ko Israel miano.

⁹Ebzan daano konapau malaneno tolu kolono tukon konamoluko tolu kolono. Dona pau-pau boinenodoo yana osowaanggene tukon mian mo luwedoi benseno bailon, tukon kona pau-pau malaneno yana mangalakene tolu kolono koboine moluwedoi benseno bailon. Pitu kotaun konakalumbit Ebzan nakatuaiyano ko Israel miano,

¹⁰doibundu yana mate tukon tinadin doi Betlehem.

¹¹Salataa lapa Ebzan, Elon luwedoi Zebulon benseno komo katuaiyo ko Israel miano songulo kotaun konakalumbit.

¹²Doibundu yana mate maka tinadin doi Ayalon Zebulon nalipu.

¹³Lapa Elon, Abdon Hilel napau mo luwedoi Piraton komo katuaiyo ko Israel miano.

¹⁴Konapau malaneno daano kosanggapo kolono komian, tukon kona tumbu-tumbu malane daano kotolu kolono komian. Yanila suwe-suwele motooli meeng kokeledai lakitan. Abdon katuaiyo ko Israel miano alu kotaun konakalumbit.

¹⁵Doibundu yana mate maka tinadin doi Piraton Efraim nalipu doi Amalek miano nalipu bunggulo.