Read Banggai TANO-TANO 13 Bible Online

TANO-TANO 13 - Banggai bible

TANO-TANO 13

¹Maka ko TEMENENO sodiikene ko Filistin miano nakuasaiyo ko Israel miano sangkap kolono kotaun konakalumbit sabab yanila baladosamo koidan doi TEMENENO.

²Doi lounudoo daano komeeng ko mala-malane doi kota Zora. Kosambuno Manoah, luwedoi Dan benseno. Konaboloki kamba.

³Bai daano kooloyo meeng ko TEMENENO namalaekat okitakene kobutongo doi yana tukon bantile, “Naiya budoo ikoo aki mumalaat pau, bai akimo namalumbit koidan ikoo naikon tianan, tukon malaat meeng kopau malaneno.

⁴Tobikon doiya dagaiyo kobutomu mono-monondok. Inai monginum anggur kai suka momosopot, kai makaan lobo mo pinatanggon.

⁵ Salataa domupaudoo sinuung, aki namomoola ikoo mopatele konabuuk, sabab daano doi tialalom yana lapamo tinantukon tuuk teali mian mosalakanggene kobutongo teali peleleani doi Mian Bisa. Yanamo naikon komo kakaate tuuk moolupute ko Israel miano luwedoi Filistin miano nakakuasaan.”

⁶Salataa lapa doiya, Manoah naboloki taus doi nalakai tukon bantile, “Ikoo daku lakai daano ko Mian Bisa nabito-bito mo lubat doiyaku, kotambongo buno Mian Bisa namalaekat tobikon yaku matakut. Yaku aki kumasadaikene yaando kona lubatan, tukon yanakai aki napopitoikene kosambuno doiyaku.

⁷Bai yana bantile baikon naikon yaku tianan tukon malaat meeng kopau malaneno. Yana bantile koidan baikon yaku aki kumoola monginum anggur kai moinum suka momosopot, kai makaan lobo mopinatanggon, sabab dopaudoo sio nasilakanggon doi Mian Bisa sulano nateali meeng komian mo salakanggene kobutongo pomatekon tuuk peleleani doi Mian Bisa.”

⁸Salataa lengele doiya Manoah sambeango doi TEMENENO, bunonaiya, “TEMENENO, kalu momoola mubintekene domuatadoo koidan doi kami tuuk mopopitoikene oila komo sio mai kubaiyo tukon dopaudoo nalapa sinuung.”

⁹Ko Mian Bisa ndongoliiyo Manoah nakakabi. TEMENENO namalaekatoo lubat koidan salataa Manoah naboloki daanoon moosu-osulang doi naasi. Konalakai akiyo idoo doi tempodoo.

¹⁰Jadi yana obulen popitoikene dolanggedoo doi nalakai, “Lakai, kitayo, kitayokai, domianoo mo lubat doiyaku doi lolukoo, lubato koidan!”

¹¹Manoah mosobit molainge konaboloki. Yana koolaniyo domianoo tukon masadai, “Ituan komo babayo kobilita doi kuboloki?” “Bisa,” yana timbiliyo.

¹²Maka Manoah masadai, “Kalu oila Tuan nabinantiloo tealimo naikon, oila komo sio nalinakukanggon doipaudoo? Bulaando konatuboan naikon?”

¹³Do TEMENENO doo namalaekat timbiliyo, “Komu boloki aki namoola momoinum anggur kai suka momosopot, aki namoola koidan momakaan lobo moluwedoi anggur batango, kai langge mo pinantanggon. Yana sio nalaksanakanggene sasaibino komo lapamo kubantile doi yana, tukon dagaiyo sulano naakiyo komo aki nailaksanakanggon.”

¹⁵Maka Manoah bantile doi yana, “Moolakai Tuan natotiili soisikeen. Ikami naikon masaanggene mbembe mongula tuuk Tuan.”

¹⁶Bai ko TEMENENO namalaekatoo bantile, “Maukai kumototiili dimbaa, aki kai naikon kukaane oila domu bineekonoo. Bai kalu ikoo yase koidan mosidokiikene, sidokiikenemokai doiya salaku sosubakon mo sinua, tukon sosubakenemo doi TEMENENO.” Manoah akiyoon natoiyo baikon komo basilingan tukon yanadoo daanoon TEMENENO namalaekat. Jadi yana bantile, “Kalu bunodoiya, kalu momoola Tuan nabontiikanaku Tuan sambuno, sulano kalu oila Tuan nabinatiloo lapamo natealikai, ikami moola beena komai pongodotii doi Tuan.”

¹⁸TEMENENO namalaekatoo masadai, “Oila kosababpo ikoo moiyase toiyo kosambunggu? Kosambunggu doiyamo sambu mo minasaindinggon.”

¹⁹Maka Manoah mangala meeng kombembe mongula tukon soisik kogandum, maka abese doi batu bunggono tukon sosubakene doi TEMENENO, doiyamo TEMENENO molakukanggene kolangge-langge mo minasaindinggon.

²⁰Daanoon mokait koaung luwedoi balabaanoo bunggono, Manoah tukon naboloki kitayo ko TEMENENO Namalaekatoo liba doi aungoo nakaitan lalomo bunggono tolibo doi timbu. Salataa buno doiya Manoah toiyomo baikon doiya TEMENENO namalaekat, maka yana tukon naboloki tootuku sosubaiyo. Akimo nasiditu yanila kitayo domalaekatoo koidan.

²²Maka Manoah bantile doi naboloki, “Kita tantumo naikon mate sabab kita kitayomo ko Mian Bisa!”

²³Konaboloki timbiliyo, “Kalu ko TEMENENO yase akateo kita, tantu Yana aki naiyase matalima sosubakon kita mososubakene doi Yanadoo; Yana koidan aki naikon natudoikene sasaibino nia doi kita kai popitoikene kolangge-langge molapamo bontiikene doiya doi kita.”

²⁴Bubula kobituwon doibundu Manoah nabolokidoo mosuung meeng kopau malaneno maka yana beena sambu doi yana Simson. Dopaudoo teali babasal tukon TEMENENO balakaatio;

²⁵tukon salataa yana anomo doi Dan nabenseno nabasandungan mo tangabos doi napokalalatanan ko Zora tukon Esytaol, ko TEMENENO Naroh tambuuno mobeena bukuanan doi yana.