Read Banggai TANO-TANO 14 Bible Online

TANO-TANO 14 - Banggai bible

TANO-TANO 14

¹Daano kooloyo meeng Simson taus doi Timna, tukon kitayo indaa komeeng koboine Filistin.

²Maka yana mule tukon bantile doi tamano tukon tinano, “Yaku yase tuuno ko Filistin boineno meeng doi Timna. Yaku kabiyo tama tukon tina nataus olotiyo yana.”

³Bai kotamano tukon tinano bantile, “Bulaando mosio nda taus doi Filistin miano sulano mumalaat boloki, sabeakai yanila aki natongusokon TEMENENO namian? Oilakai doi ndamondopulian lalomo kai doi posaapon konda bangsa akiyo komeeng koboine mopokokonoi?” Simson timbiliyo doi tamano, “Bai boinedoo Filistin doiyamokai daku inias. Tukon yaku moinikene tama naiyase olotio yana tuuk yaku.”

⁴Simson tamano tukon tinano aki natoiyo baikon TEMENENO mokai komo kubaiyo Simson lakukene dolanggedoo. Sabab, ko TEMENENO daano moumbolii todanan sulano nalobosio ko Filistin miano. Doi tempodoo ko Filistin miano kuasaiyo ko Israel miano.

⁵Maka Simson tauso doi Timna polaing-laing tukon tamano-tinano. Daanoon yanila mololoiyo komeeng koanggur asino, Simson pososuung tukon meeng kosinga motatabokon. Dosingadoo ngangaaton,

⁶tukon sosinggoton Simson teali bukuan sabab TEMENENO nakuasa. Maka yana bendi-bendinge dosingadoo tukon limano, doiyayonoo tongo adukon buno meeng kombembe. Dolanggedoo aki nasalitaikene doi tamano tukon tinano.

⁷Doibundu Simson duutiyo boinedoo tukon basa-basalita tukon yana, tukon Simson yasemo yana.

⁸Lapa bubula kotempo konakalumbit, Simson taus koidan sulano naosowaan tukon boinedoo. Doi naampakonan lalomo, yana lias tuuk mokitayo dosingadoo bunuto mo lapamo yana akateo. Salataa polong idoo yana kitayo badaang tuuno ko ani doi bunutoo lalomo, tukon daano koidan kodokoto.

⁹Yana nggunggume dodokotoo doi limano lalomo, maka banggadudul ampakon tukon kaane dodokotoo. Doibundu yana taus doi tamano tinano maka beena koidan doi yanila soobos luwedoi dokotoo, tukon yanila makaano. Bai Simson aki na popitoikene baikon dodokotoo inala luwedoi singa bunuto.

¹⁰Salataa Simson tamano taus doi boinedoo nabonua, Simson mokubai lamean indaa, sabab bunomo doiya kopaupaumalane nakabiasaan.

¹¹Salataa ko Filistin miano kitayo yana, yanila lilike kotolu kolono kotabo sulano nakotulayo yana.

¹²Maka Simson bantile doi yanila, “Daano daku sosombot. Kalu komuyu moola toiyo komuyu suwe-suwele yaku naikon beena toik lenan moalus tukon meeng kopaal kopakean mo monondok. Yaku beena tempo komuyu pitu kooloyo konakalumbit nai lamean nia basowaanan tuuk moumboliiyo koalatino.

¹³Bai kalu komuyu aki polaate koalatino, komuyumokai suwe-suwele komo beenggu toik lenan alus (muyuk) tukon meeng kopaal kopakean mo monondok.” Maka ko Filistin mianodoo bantile, “Moola! Diabudodoo bantilemo dososombotoo.”

¹⁴Maka Simson bantile, “Luwedoi mo kaane tobuat komo kinaan; luwedoi mo bukuan, tobuat komo maamis.” Salataa toliis tolu kooloyo yanila akiyoonkai nalaate koalatino dososombotoo.

¹⁵Jadi, doi oloyo kosanggapo yanila bantilo doi Simson naboloki, “Ikoo sio muoluulio komulakai sulano naiyase mopopitoikene doi kami dososombotoo alatino. Kalu aki, ikami naikon suayo ikoo tukon tamamu nabonua antoko. Bulaangge ikoo uange ikami sulano mai akabuse komai buat!”

¹⁶Sabab doiya, Simson naboloki taus doi Simson tukon kokiil, maka bantile, “Yaku toiyo ikoo aki museange yaku. Bulaando ikoo mobeena sosombot doi tulanggu, bai ikoo aki mubontiikene koalatino doiyaku? Tantu ikoo mosikitene yaku!” Simson bantile, “Totiili looluk! Doi tamanggu tukon tinanggukai aki kubontiikene, bulaando ikoo mo sio mubinontiikon?”

¹⁷Pitu kooloyo konakalumbit dolameanoo Simson naboloki kokiil banggadudul. Tukon sabab yana banggadudul basilingan kokiil maka doi oloyo kopituno, Simson bontiikenemo dososombotoo alatino doi yana. Maka Simson nabolokidoo bontiikenemo ko Filistin miano.

¹⁸Jadi, doi oloyo kopituno akiyoon nasopok kooloyo, dokotadoo miano bantile doi Simson, “Oilakai komo lobian maamis luwedoi dokot? Tukon oilakai koidan komo lobian bukuan luwedoi singa?” Simson timbiliyo, “Kalu komuyu aki pokubaiyo alat daku boloki, komuyu naikon aki polaate koalatino dososombotoo!”

¹⁹Sosinggoton Simson luwedoi TEMENENO nakuasa tealimo bukuan, maka yana taus doi Askelon. Indaa yana akateyo kotolu kolono komian mala-malaneno mo bapake mono-monondok. Yana alayo donapoo pakeanoo tukon beekene doi tolu kolonodoo komian mo lapamo toiyo dona sosombotoo alatino. Salataa lapa doiya yana mule doi nabonua tukon noano mo susah.

²⁰Maka konamonianan malane beekenemo doi Simson nabolokidoo doi mian mo teali Simson napololaing Simson naboloki doi tempo nabasowaanan.