Read Banggai TANO-TANO 15 Bible Online

TANO-TANO 15 - Banggai bible

TANO-TANO 15

¹Bubula kotempo doibundu, salataa tempo bapupuiyan gandum, Simson taus duutio konaboloki. Yana makanggi meeng kombembe mongula tuuk doi naboloki. Simson bantile doi namonianan malane, “Yaku yase usok doi kombiang tuuk posuung tukon kuboloki.” Bai konamonianan malane aki napataikene yana.

²Konabantilano doi Simson, “Yaku aanggene ikoo tutuumo momosikitenemo yana, jadi, yana yaku beekenemo doi tulamuyu. Bai ikoo moola mualayo koutuso pioto. Yana liisio konatambonganan.”

³Bantilokai Simson, “Oila daku linakukon mo tuuk doi Filistin miano dia budoo, bolikonkai kukasalahan!”

⁴Maka yana taus momalako asulobo tolu kosakato. Doasu-asulobodoo puuso pinoboboikon lulua. Doi nasinimbutan pokotoo, yana obosiyo meeng koponsona.

⁵Lapadoiya yana koitiyo doponsona-ponsonadoo maka nasodiiyo doasu-asulabodoo, doi Filistin miano naasi-asi lalomo. Tosuamo sasaibino kogandum mo lapamo pinupui indaa. Maukai gandum mo sinakakon tukon anggur asi-asino talaing tosuakai.

⁶Ko Filistin miano taus moondosuuke indee komo lakukene dolanggedoo. Maka komian bontiikene doi yanila baikon Simsonkai komo lakukanggene, sabab namonianan malane doi Timna beekenemo Simson naboloki doi meeng komian Simson tulano. Tobikon doiya badaang ko Filistin miano mosuayo boinedoo tukon tamano nabonua antoko pokabuson.

⁷Maka Simson bantile doi Filistin mianodoo, “Oh bunomokoiyakai kopoo kokubai? Yaku batotopi baikon aki naikon kubatingaakon kalu akiyoon kubalese nalangge nia doi komuyu!”

⁸Lapadoiya yana lobosio yanila tukon lokis tukon badaang konainakate doi yaniladoo. Salataa lapa doiya, yana tauso maka dungol doi leeng lalomo doi meeng kobunggul batu doi Etam.

⁹Maka ko Filistin miano lubat doi Yehuda nalipu maka basandung idoo, lapadoiya lobosio kokota Lehi.

¹⁰Ko Yehuda miano masadai doi Filistin miano, “Bulaando komuyu molobosiyo ikami?” Yanila timbiliyo, “Ikami lubat tuuk molakoyo Simson sulano mai moola lakukanggene yana bunomo yana nalakukangganano kami.”

¹¹Salataa lengele doiya, tausokai ko 3.000 ko Yehuda miano doi leeng doi bunggul batu doi Etam. Indaa yanila bantile, “Simson, oilakai ikoo aki mutoiyo baikon ko Filistin miano kuasaiyo kita? Oilakai naiya komo lapamo ikoo lakukanggene motuuk doi kami!” Simson timbane, “Yaku tongo balese oila konapoo linakukon motuuk doi yaku.”

¹²Yanila bantile, “Ikami lubat sulano mai boboiyo tukon salakanggene ikoo doi Filistin miano.” Simson bantile, “Popaladandimokai looluk baikon komuyu aki naikon poakateaku.”

¹³“Monondok” yanila bantile, “Takainomo ikami tolongo yase boboiyo tukon salakanggene ikoo doi Filistin miano. Aki naikon mai akatekon.” Maka yanila boboiyo yana tukon lua koputal mo daano boolu, tukon yana binaba taus luwedoi leengoo.

¹⁴Salataa Simson binaba polong doi Lehi, ko Filistin miano obulen mo lubotiio yana tukon toloukonio yana. Baino sosinggot tukon TEMENENO nakuasa yana tealimo bukuan. Koalos-alos poboi limano doo yana betele buno doiya tolong doalosoo tongo adukon buno alos mo mosua.

¹⁵Doibundu yana posuunggene komeeng kokeledai adeno bukuno mo daanoon moboolu. Yana pulute dobukudoo, maka yana kubaiyo pobobokii 1000 komian polong pomatekon.

¹⁶Maka Simson mananimo, “Tukon keledai adeno, yaku bobokiio kosoloon komian; tukon keledai adeno yaku pototongikene kobajan-bajanoila.”

¹⁷Lapa doiya yana sakukene doadedoo bukuno. Doiyamo kosababpo dolipudoo sinombikon Ramat-Lehi.

¹⁸Lapadoiya Simson moloumo tuuno, tobikon yana masadai doi TEMENENO. Yana bantile, “TEMENENO, sodokai Ikoo beekanaku nakamanaangan nia doiyaku. Diabudodoo kai sio kumate lou, sulano ko Filistin miano mo aki natingoniiyo ikoo nalakeo yaku?”

¹⁹Maka ko Mian Bisa bukayo kobuang doi bunggul batu Lehidoo, maka tobuatokai kopaisu mo luwe idoo. Simson monginum, lapadoiya yana lasayo sehato koidan. Doiyamo kosababpo dopaisu naluweanoo sinombuikon Paisu Hakol Naluwean. Paisu nia naluwean daanoon doi Lehi.

²⁰Lua kolono kotaun konakalumbit Simson nakatuaiyano ko Israel miano doi tempo ko Filistin nakuasaiyano yanila.