Read Banggai TANO-TANO 16 Bible Online

TANO-TANO 16 - Banggai bible

TANO-TANO 16

¹Daano kooloyo meeng Simson taus doi Gaza. Indaa yana pososuung tukon meeng komian motombololoaon maka yana taus pokooloi tukon boinedoo.

²Maka ko Gaza miano lengele baikon Simson daano indaa. Jadi, yanila lubotiio dolipudoo tukon totiiliyo yana doi kotadoo tataapono pobanggamodoakon. Bai yanila aki namakabai oioila doi popookoo sabab yanila pikikene, “Siokai kalu naikon sumboto kooloyo matano, maka ndasodo akateo yana.”

³Bai Simson aki namoolo idoo polong dodowa. Yana bangun pintanga kopopook maka taus doi kotadoo tataapono. Yana bubute dotataaponoo posaapon tukon sudo-sudongo maka posu-posupato sasaibino. Lapadoiya yana bingkate dotataaponoo maka natanggunge, yana babayo doi bunggul bunggono doi Hebron sembeleng.

⁴Lapa doiya Simson anomo konoano doi meeng koboine moluwedoi Solek Peako. Boinedoo kosambuno Delila.

⁵Maka lubato kolima komian mokuasaiyo ko Filistin doi boinedoo tukon bantile, “Oluuliyo Simson sulano naiyase popitoikene doikoo oila konabukuanan lahasiano, tukon bulaando kokubaiyano sulano naalapuse donabukuananoo. Tukon buno doiya kami moola lubat tukon keete yana sulano mai lungguiyo. Totiili naikon kami suwe-suwele beena ikoo soloon sakat kodoy suasa.”

⁶Maka Delila bantile doi Simson, “Simson, oila kosababpo ikoo mobuno koiya komubukuanan? Tukon oila kopoboboino ikoo sulano nalapus domubukuananoo? Soba bontiikanaku kolahasiano!”

⁷Simson timbiliyo, “Kalu yaku binoboi tukon pitu koputal boolu mo akiyoon namotuul tuuno, yaku naikon miyuk tukon teali buno mian biasa.”

⁸Maka domo kuasaiyodoo ko Filistin beekene doi Delila pitu koputal boolu mo akiyoon namotuul tuuno. Doibundu, daanoon ko Filistin miano mototiili doi kombiang bailon, Delila boboiyomo Simson tukon doalos-alosoo maka nggeleamon, “Simson! Lubato ko Filistin miano!” Banggadudul Simson bentele doputaloo. Doalos-alosoo bontol buno banang mo bontol kana aung. Simson nabukuanan lahasiano akiyoon natinoi.

¹⁰Maka Delila bantile doi Simson, “Ah ikoo kala-kala! Ikoo tongo maenggene yaku. Ayo salitayomo doiyaku tukon oila ikoo moola binoboi!”

¹¹Simson timbane, “Kalu yaku binoboi tukon putal boolu mo akiyoon napinake, yaku naikon miyuk tukon teali buno mian biasa.”

¹²Daanoon ko Filistin miano mototiili doi kombiang bailon, Delila mangala bubula koputal mo boolu, maka boboiyo Simson. Lapadoiya yana wookon, “Simson! Lubato ko Filistin miano!” Bai Simson bentele doputal-putaloo luwedoi limano buno mian momobontol banang.

¹³Maka Delila bantile doi Simson, “Ah, ikoo maenggene yaku koidan. Ikoo kala-kala. Soba salitayo tukon oila ikoo moola binoboi!” Simson timbiliyo, “Kalu pitu kobuuko dakubuuk pinotongikon kobanang doi batonunan pakakaso, doibundu binoboikon doi kayung tonun pakakasodoo, yaku naikon miyuk tukon teali buno mian biasa.”

¹⁴Maka Delila kubaiyo Simson moolo maka potongikene pitu kobuuko Simson nabuuk doi banang tonun pakakaso. Lapa doiya yana boboikene doi kayung tonun pakakasodoo maka nggeleamon, “Simson! Lubato ko Filistin miano!” Simson kai bangun maka kibute konabuuk maka tosobii luwedoi pakakas tonunoo.

¹⁵Lapadoiya Delila bantile doi yana, “Ah ikoo bantile ikoo seseangaku baanggokai konoamu moddoon luwedoi yaku! Tolumo luunggon mumaengganaku, tukon polong diabudodoo ikoo aki muiyase popitoikene bulaando ikoo mobukuan bunokoiya.”

¹⁶Samba kooloyo Delila banggadudul manga-mangala noa tukon desaake, maka Simson mangaelo momondongolii.

¹⁷Doibundu Simson salitaikene konalahasia. “Dakubuuk akiyoon nabiasa pinatol,” Simson bantile. “Yaku lapamo teali meeng komian mo binaniaton doi Mian Bisa teali koona namilik. Sodo kusinuung yaku lapamo teali meeng komian mo binaniaton. Kalu daku buuk pinatol, daku bukuanan naikon lapus; yaku naikon miuk tukon teali buno mian biasa.”

¹⁸Delila toiyomo baikon Simson bontiikenemo konalahasia doi noano. Tobikon doiya yana kapatuwo nabilita nia doi mokuasaiyo ko Filistin, “Polubato koidan baino nia idan kopoo lubatan. Simson lapamo salitaikene kona lahasia doi yaku.” Yanilakai lubato tukon mababakene doy tuuk doi Delila.

¹⁹Lapadoiya Delila abine Simson sampe moolo doi naabinano, maka yana monguang mian tukon sumboliiyo mopatele pitu kotambuno Simson nabuuk. Doibundu yana sakisaayo Simson, sabab Simson lapuso kona bukuanan.

²⁰Maka yana wookon, “Simson! Lubato ko Filistin miano!” Simson bangun tukon yana aanggene daano motosodii buno doi tempo-tempodoo molapa. Yana aki natoiyo baikon ko TEMENENO tinggalemo yana.

²¹Maka ko Filistin miano lakoyo yana tukon suete komatano batuno. Yanila babayo yana doi Gaza tukon boboiyo yana tukon lua kolante tambaga, maka yanila usekene yana doi talunggu lalomo. Indaa yana sinumbolii balimang doi gilingan.

²²Bai doi nadaanoan yana mo balimang kona buuk tambuuno tubo koidan.

²³Daano kooloyo meeng sasaibino komo kuasaiyo ko Filistin pototongi naikon mokubai balameanan tukon mososubakon sosuba tuuk doi Dagon, doi napoo pilogot. Yanila manani, “Konda pilogot mo babasal lapamo beekene doi kita komanaangan doi Simson, nda musuh!”

²⁴Daanoon yanila mobalame-lame yanila bantile, “Babayomo Simson doisumai sulano nakokumbite yana!” Maka yanila ndokiiyo Simson luwedoi talunggu, tukon yana teali yanila nabahan kinokumbit. Yanila sumboliiyo yana kokondong doi antara lua kosudong mobabasal. Salataa domianooila kitayo Simson, yanila nggaale ko Dagon tukon manani, “Konda pilogot lapamo beekene doi kita komanaangan doi musuh molapamo manase konda lipu tukon badaango konda mian nainakate!”

²⁶Simson bantile doi paumalanedoo mo tandane, “Sodiiyomo kolimanggu sulano kumoola bataani doi sudong-sudong potumbak nabonua nia, sabab yaku yase sosinggalang idoo.”

²⁷Dobonuadoo moono tuuno tukon mian. Lima koponguasa Filistin bai daano idoo. Tukon doi bonuadoo uga-ugaate daano ko 3.000 komian. Yanila sasaibino mokita tukon totulaiyo Simson.

²⁸Doi tempodoo Simson sambeang; konabantilano, “Oh TEMENENO Moinakatandak Tuuno, Ikoo yase neneeke yaku. Benggumo koidan naikon bukuanan doi yaku tolongo idan nia, oh Mian Bisa, sulano tukon nakokubai nia yaku moola balase ko Filistin miano molapamo suete loluakon komatanggu batuno.”

²⁹Lapa doiya Simson taanio loluakon dosudongoo doi tanga mo tumbake dobonuadoo. Maka yana bataani tukon limano bobono doi meeng kosudong tukon limano bakalinga doi sudong bailon,

³⁰yana nggeleamon, “Batadikenemo kumate polaing-laing tukon na Filistin nia miano!” Tukon sasaibino kona bukuanan yana duekene dosudong-sudongoo sampe tolubang tukon pisayo do Filistinoo naponguasa mo lima polaing sasaibino komian bailonggon mo daano idoo. Mau Simson bai mate. Bai, doi tempo namateanoo kona mian inakate lobian badaang tukon nainakate doi tempo natuboan.

³¹Doi bundu lubato kona montolutusan tukon sasaibino kopulino moalayo kobajano. Yanila babayo mule kobajanodoo, tukon yanila tadine doi Manoah natinadinan lalomo, dotamanodoo. Dobatadinanoo kona tangabosan doi napokalalatanan ko Zora tukon Esytaol. Lua kolono kotaun kona kalumbit Simson natealian katua doi Israel.