Read Banggai TANO-TANO 18 Bible Online

TANO-TANO 18 - Banggai bible

TANO-TANO 18

¹Doi tempodoo doi Israel akiyono kotomundo. Dan benseno daanoon momounggolii lipu mo teali napoo wilayah, sabab yanila akiyoon namalaat koidan buta polaing-polaing kobense-benseno bailon doi Israel miano.

²Tobikon doiya yanila mopilih lima komian mo tambongan moluwe doi sasaibino komondopulian doi napoo benseno lalomo mo dungol doi Zora tukon Esytaol, maka beena limang doi mianoo molima sulano naondosuuke dotanodoo. Maka luwemokai domian-mianoila, tukon polongo doi Efraim nawilayah lipuno mo bunggokon. Indaa yanila sapu doi Mikha nabonua.

³Salataa kabi nausokiyo dobonuadoo yanila lengele do Lewidoo paumalaneno mo basilingan, tukon yanila tinginiioyomo kona basilingan kaliangano. Jadi, yanila lubotiio yana tukon masadai, “Bulaando ikoo modaano dimbaa? Oila komu ulusan? Indee komo babayo ikoo?”

⁴Dopaumalanedoo timbiliyo, “Yaku daano dimbaa sabab Mikha. Yanamo komo oduduke yaku teali naimam, tukon beena tambo doi yaku.”

⁵Maka yanila bantile doi yana, “Kalu buno doiya, tulung masadaikene doi Mian Bisa oilakai komai ampakonan nia naikon daano kona totuuk kai akiyo.”

⁶Doimamoo timbiliyo, “Inai molili. Ko TEMENENO lapamo satujuiyo napo ampakonan nia.”

⁷Salataa lapa doiya luwemo domianoo mo lima maka taus doi Lais. Idoo yanila palahatikanggene kotumbuno. Tokitamo baikon ko Lais miano natuboan kaliangano pokakana ko Sidon miano natuboan kaliangano. Maukai napoo tangalaas, tukon modoon luwedoi Sidon miano, bai yanila tubo monondok tukon tanaang, akiyo kona musuh, monondok, tukon akiyo komo kulang doi yanila.

⁸Salataa domianoo molima abali doi mian-mian napomeenggonan benseno doi Zora tukon Esytaol, yanila kinabikon kona laporan.

⁹Yanilakai bantile, “Mai nda lobosio ko Lais. Ikami lapamo dombalaa tukon kitayo baikon kobutano monondok, masabelak tukon monondok, sasaibino kolangge daano idoo. Inai potataap naimbaa tolong tukon akiyo kopoo kinubai oioila. Mosobitkai dombalaakon tukon nda lambase dotanodoo. Komuyu naikon laate baikon kotumbuno aki naanggene naikon moilobosi. Ikami anggayo ko Mian Bisa lapamo beekene dotanodoo doi komuyu.”

¹¹Tobikon doiya polenggeto luwe doi Zora tukon Esytaol 600 komian Dan benseno. Tukon sinapan molengkap,

¹²yanila taus doi Kiryat-Yearim tambikon talise doi Yahuda nalipu maka basandungo idoo. Doiyamo kosababpo dolipudoo daano mosinomboikon Dan Nabasandungan.

¹³Luwe indaa yanila ambakon banggadudul doi Efraim nalipu bunggulo polong doi Mikha nabonua.

¹⁴Domata-matadoo molima komian modoi lolukoo mo binotokon bantile doi tula-tulano, “Komuyu toiyo baikon doi meeng kobonua nia daano kolambea molinapis suasa? Daano koidan kolambe-lambea bailon tukon imam napakean. Soba pikikene oila komo sio nda kubaiyo.”

¹⁵Maka yanila taus doi Mikha nabonua tampat paumalane Lewidoo nadungolan, tukon masadaikene konandondoong.

¹⁶Doi tempodoo 600 Dan nabenseno nasuludadu, mosukup konasinapan, daanoon mokokondong doi tataaponoo mobabasal salaano.

¹⁷Lima domata-matadoo banggadudul usok doi bonuadoo lalomo, maka pulute dolambeadoo kayung molinapis suasa polaing tukon lambe-lambea bailon, tukon imam napakean. Do Lewidoo paumalaneno daanoon mokokondong tukon noom kosakato dosuludadudoo doi tataaponoo mobabasal.

¹⁸Salataa lima domianoo usok doi Mikha nabonua tukon pulute ko imam napakean tukon lambe-lambea pilogotoo, do Lewidoo paumalaneno mansadai, “Oila napoo kinubai nia?”

¹⁹Yanila timbiliyo, “Inai mopelek! Inai masadai. Malaingokai tukon kami, sulano muteali mai imam tukon mai pongotunggul. Kalu baino moteali imam tuuk doi meeng kopuli tolong, tadukai muteali imam tuuk doi meeng kobenseno!”

²⁰Lewidoo paumalaneno sanaang tukon dopandapatoo. Jadi, yana alayomo doimamoo napakean tukon dolambe-lambea pilogotoo maka yana malaingo tukon yanila.

²¹Doibundu dolombonganoo banggadudukene konapoo ampakonan, pau-pau komo lolukonio, iyayon piniala tukon napo lolonggu-lolonggu.

²²Salataa yanila mododoono, Mikha uange konapololanian maka polaing-laing molelenggene Dan bensenodoo miano. Salataa loolanimo tukon yanila,

²³Mikha tukon namianoo wowokonio doi yanila. Komian doi Dan nabensenodoo mbaleng tukon masadai doi Mikha, “Daano kooila! Bulaando komuyu molubat tukon todudul badaang komian?”

²⁴Mikha timbiliyo, “Komuyu dambasene daku lambe-lambea tukon naimam, tobikon yaku akimo kumotooli oioila koidan, maka komuyu bantile, ‘Daano kooila!’ ”

²⁵Doi Dan nabensenodoo bantile, “Tadukai mukukupe kobabamuyu; inai namian nia mobadaang nateali nggimal maka lobosio ikoo. Tantu ikoo tukon mukalualgaa sasaibino mate.”

²⁶Salataa lapa, bantile buno doiya doi Dan benseno mianodoo banggadudukene konapoo ampakonan. Mikha kitayo baikon yanila lobioniiyo kona bukuanan luwedoi yana, tobikon doiya yana abali tukon mule.

²⁷Sambuno lapa doi Dan nabensenodoo miano dampasene do imamoo tukon Mikha nalambe-lambea kinubai, yanila taus lobosio ko Lais, kota kotumbuno motubo monondok tukon tanaang. (Dokotadoo daano doi meeng kopeak tukon kota Bet-Rehob.) Doi Dan mianodoo akateo sasaibino komo dungoliyo ko Lais maka kotadoo sinua. Akio komo lubat tulungio ko Lais miano sabab donapoo lipudoo basusuunganggon tukon modoon luwedoi Sidon. Lapa doiya Dan miano bangunemo koidan dokotadoo doibundu yanila dungolo idoo.

²⁹Dokotadoo sambuno yanila soboliyo teali Dan, loloiyo tamano tumbunoila sambuno, doiyamo Dan, Yakub napau.

³⁰Kopilogot lambeano yanila mobabayodoo, yanila kekendenge doi kotadoo maka oduduke Yonatan, Gerzom napau, Musa natumbu, teali napoo imam. Gerzom nakatulunan nia tataap teali imam doi Dan bensenodoo polong doi tempo ko Israel miano nakinanggian tukon nasinakukonan doi tano bailon.

³¹Doi Mikha nalambea kinubai tataap doi Lais kalu ko TEMENENO Na Sandung daano doi Silo.