Read Banggai TANO-TANO 19 Bible Online

TANO-TANO 19 - Banggai bible

TANO-TANO 19

¹Doi tempo ko Israel miano akiyoon nadaano kona tomundo, daano komeeng ko Lewi miano modungol doi lipu tanga, doi Efraim nalipu bunggulo. Yana kilayo komeeng koboine moluwedoi Betlehem Yahuda teali naboloki piala.

²Bai doi bundu boinedoo nggimoliiyo yana tobikon yana abali doi tamano nabonua doi Betlehem. Salataa boinedoo dungol indaa sangkap kobituwon konakalumbit,

³do Lewi mianodoo taus tunduwo yana sulano oluuliyo naabali doi yana. Yana taus tukon mababa meeng koata tukon lua kokeledai. Lapa polong indaa, boinedoo babayo yana doi tamano. Salataa boinedoo tamano kitayo yana, yana sambute tukon sanaang,

⁴tukon desaake sulano yana naaki namule. Tobikon doiya, yana dungol tolu kooloyo konakalumbit tukon kaan monginum tukon pookoloimo idoo tukon dona boloki piala.

⁵Doi oloyo kosanggapo, yanila bangun dowa-dowa maka bato-batotobomo moluwe. Bai boinedoo tamano bantil doi Lewidoo miano, “Kaan looluk sulano pobukuan. Nalapa doiya maka poluwe.”

⁶Maka osulango do Lewidoo miano maka kaan tukon monginum posinggat-singgat tukon boinedoo tamano. Bai salataa yana kokondong adukon luwe, boinedoo tamano oluuliyo sulano inai nataus. “Basana-sanaango loluk,” konabantilano, “tukon moolomo dimbaa.” Maka do Lewidoo miano dungolo idoo meeng kopopook koidan.

⁸Oloyo kolimano, dodoa tuuno, salataa yana kabi naluwe boinedoo tamano bantil koidan, “Ayo kaan looluk; naapa maka nasodo poluwe.” Maka yanila luaila kaan posinggat tukon kakalumbit polong adukon sopok kooloyo matano.

⁹Doibundu, salataa do Lewi mianodoo polaing kona boloki piala tukon naata naikon moluwe; dotamanodoo bantile, “Oloyo lolanimo popook, naapa koidan kalipookano. Tadukai posambukono dimbaa tukon basana-sanaang. Namodoa dodoa komuyu moola bangun maka poluwe tukon pomule.”

¹⁰Bai do Lewidoo miano akimo naiyase momoolo koidan idoo. Yana tukon naboloki piala luwemo, polaing-laing tukon naata tukon nakeledai molua moano konapangalas doi bungguto. Salataa kooloyo loolanimo popook, yanila polong doi naloolanian ko Yebus (doiyamo Yerusalem). Maka doatadoo bantile doi natuan, “Tuan maimo nda sapu tukon bamoolokon nai Yebus mian nia nakota.”

¹²Bai kona tuan timbiliyo, “Aki! Kita aki nda tade doi lipu mobolikon Israel miano kotumbuno. Maimo nda banggadudul ampakon soisik koidan tukon sio nabamoolokon doi Gibea kai Rama.”

¹⁴Tobikon doiya yanila banggadudul ampakon tukon aki natade doi Yebus. Oloyo matano lapamo sopok salataa yanila polong doi Gibea Benyamin benseno nawilayah.

¹⁵Yanila sampu indaa tukon bamoolokono, maka usok doi kota tukon taus osulang doi dego-dego. Bai akiyo komeeng komian mo uange yanila doi nabonua sulano napoo moolo.

¹⁶Daanoon yanila mo osulang doi kotadoo dego-degono, lubat komeeng kolakai mosodo abali luwedoi nabalimangan doi asi. Yana kona tutuuwan kona asal luwedoi Efraim nalipu bunggulo bai dia budo doo dungol doi Gibea. (Doi Gibea kotumbuno bailon doiyamo Benyamin miano.)

¹⁷Salataa dolakaidoo kitayo do Lewidoo miano doi dego-dego, yana masadai, “Utus luwe doiyaa, tukon yase taus doiyaa?”

¹⁸Do Lewidoo miano timbiliyo, “Ikami sodo lubat luwedoi Betlehem Yahuda, tukon daanoon doi ampakonan lalomo mule doi bonua doi lipu tanga doi Efraim bunggulo. Daku luwean luwe indaa. Akiyokai komeeng komian nai kota nia mo yase talimayo ikami doi bonua sulano mai bamoolokon.

¹⁹Ikami aki mai mapalaluu oioila bailon, komai mandu sukup. Daano komai bulung moteali mai keledai nakinaan; daano komai roti tukon anggur tuuk yaku polaing kuboloki nia tukon daku ata.”

²⁰Maka dolakaidoo bantile, “Inai molili, yaku naikon tulunggon. Mau naaki pomoolo naidego-dego nia.”

²¹Doibundu yana babayo yanila doi nabonua maka beena kinaan konapoo keledai-keledai. Tukon lapa kona tamu-tamudoo kumesio koaino, yanila kaano.

²² Yanila daanoon mobasana-sanaang; sosinggot dobonuadoo ilobosi mian molokis luwedoi kotadoo. Yanila nggienggieke kotataapon tukon bantile doi lakaidoo, “Salakanggene doi kami malanedoo ikoo mo babayo doi mubonua. Ikami yase pakeo yana!”

²³Dolakaidoo sumbot tukon bantile doi yanila, “Inai, utus-utus! Yaku kabiyo inaipoo lakukanggene kolangge molokis tukon aki namoola buno doiya, sabab yana kutamu.

²⁴Yaku naikon beekene tolong konaboloki piala tukon daku boine doi komuyu. Moolamokai poakambambule kopoomoot doi yanila. Bai inai polakukanggene oioila komolokis doi kutamudoo!”

²⁵Bai sabab mian badaang molokisoo tataap kakatikas, maka Lewidoo miano dudunggene dona bolokidoo piala sumbut tuuk yanila. Maka yanila pakeo boinedoo aki natade-tade sampe dodoa.

²⁶Doi naalanian komodoa boinedoo abali, bai doi lakaidoo nabonua tataapono salaano, tampat nalakai nadungolan, yana poso. Lapa kooloyo matano sumbut yana daanoon idoo.

²⁷Dodoadoo, salataa nalakai bangun tukon bukayo kotataapon tuuk molengget, yana kitayo konaboloki piala tetelengan doi bonuadoo salaano tukon kolimano bataani doi tataapon.

²⁸“Bangunokai,” konabantilano doi yana, “maimo nda luwe.” Bai boinedoo aki natimbiliyo sabab matemo. Maka, yana binggate boinedoo tukon abese doi nakeledai bungguno, doibundu yana luwemo mo mule doi nabonua.

²⁹ Polong doi nabonua, yana usok tukon mangala piso doibundu maka pate-patele konaboloki piala bajano teali songulo lua kopatolo. Lapa doiya, yana kapatuwo dopato-patolodoo doi songulo lua ko Israel miano benseno, sue-suele meeng kopatolo.

³⁰Sasaibino komian mokitayo doiya bantile, “Akiyo naano kolangge mobuno nia kona tealian, salataa ko Israel miano natobuatan luwedoi Mesir polong doi oloyo nia. Kita aki namoola tongo batingaakon. Kita sio nda popikili sulano nda mokubai tindakan!”