Read Banggai TANO-TANO 2 Bible Online

TANO-TANO 2 - Banggai bible

TANO-TANO 2

¹TEMENENO namalaekat ampakon luwedoi Gilgal taus doi Bokhim tukon bantile doi Israel miano, “Yaku lapamo tobuatene komuyu luwedoi Mesir, tukon babayo komuyu doi tano mo lapamo Kudondiikene doi tumbumuyu. Lapamo Kubantile koidan, ‘Konda perjanjian mo lapamo kita kubaiyo aki naikon Kuputuse.

² Tobikon doiya komuyu aki namoola kubaiyo komeeng koperjanjian tukon natano nia tumbuno. Konapoo balabaan-balabaan sio pomanase.’ Bai komuyu aki polakukanggene oila komo lapamo Yaku palentahkenedoo. Bai komuyu tolongo lakukene komo bolikon Kumongiasan!

³Jadi budodoiya ndongoliio! Aki naikon kusiikayo komian nai tano nia kalukai komuyu polobosi tukon yanila. Yanila naikon teali mumusuh-musuh, tukon komuyu naikon tongokolii, tobikon komuyu tulut sosuba doi napodewa-dewa.”

⁴Salataa lapa do malaekatoo pelenggene dobilitadoo, sasaibino kobangsa Israel kokiil tukon kokobukuan.

⁵Tobikon doiya dotampatoo sinombuikon Bokhim. Maka doi tampatoo ko Israel miano sosubakene kososubakon doi TEMENENO.

⁶Salataa Yosua sobiiyo ko Israel miano taus, yaniladoo luwe sulano nadungoliyo kotano mo tealimo napoobos suwe-suwele.

⁷Doi daanoan Yosua motubo ko Israel miano mangangga doi TEMENENO. Salataa Yosua mate bai yanila tataap mangangga doi TEMENENO doi nadaanoan yanila mokinatuai doi mian molapamo kitayo susuungo sasaibino kolangge mo minasaindinggon TEMENENO mo lakukene tuuk doi Israel miano.

⁸Yosua Nun napau — TEMENENO napeleleanidoo — mate konaumur sakat songulo kotaun.

⁹ Yana kinibul doi nabuta susuungo, doiyamo doi Timnat-Selah doi Efraim nalipu bunggulo taalikon lembet ko Gaas Bunggulo.

¹⁰Sasaibino komian motubo doi bundu mate koidan. Tukon komian mo tubo doibundu koikoidan akimo natingoniiyo ko TEMENENO, sabab yanila akimo natoupiyo oila komo lapamo TEMENENO lakukene tuuk doi bangsa Israel.

¹¹Doibundu ko Israel miano baladosamo doi TEMENENO. Yanila akimo koidan nasosubaiyo ko TEMENENO, tumbunoila na Mian Bisa, doiyamo Mian Bisa mo lapamo babayo yanila tobuat luwedoi Mesir. Yanila tambuuno mososubaiyo ko pilogot tukon Asytoret tukon temeneno-temeneno bailon bangsa-bangsa doi potikunggon yanila nasinosubai. Maka ko TEMENENO nggimoliiyo yanila tukon batadikene komusuh nalobosio tukon bulenggene yanila. Yanila akiyono konapoo kokubai mosasalaane komusuh-musuh motikumemo yanila.

¹⁵Sasamba luunggon napoo taus molobosi, ko TEMENENO lawane yanila, buno komo lapamo Yana ingotiikene yanila. Maka yanila toupiyo kosusaan mo babasal tuuno.

¹⁶Ko TEMENENO seseket beena doi yanila kokatua mo kakaate sulano nasobiiyo yanila luwedoi musuh mo balambok.

¹⁷Bai yanila aki napopusinggon sasaibino donapoo katuadoo. Yanila sosubaiyo kotemeneno-temeneno bailon, tukon aki nasetia doi TEMENENO. Aki napoloingiyo kotumbunoila nasipat motaat doi TEMENENO napalentah-palentah.

¹⁸Kalukai ko TEMENENO mebee meeng komian mokatuaiyo kobangsa Israel, ko TEMENENO sidutu tulungiyo dokatuadoo. Tukon doi nadaanoan dokatuadoo motubo, ko TEMENENO sidutu sobiiyo yanila luwedoi napoo musuh-musuh. Yana seseange doi yanila kalukai Yana lengele yanila momanggadidi sabab sinakisaa tukon tinodudukon.

¹⁹Bai kalukai dokatuadoo matemo, dobangsadoo konakalakuan lobian kulokis luwedoi mian mo tubo loolukonoo. Yanila mangangga doi temeneno-temeneno bailon tukon sosubaiyo dotemeneno-temenenodoo. Yanila abali doi napo kalakuan-kalakuan mo lokis tukon aki naiyase moboliiyo konapoo kalakuan.

²⁰Tobikon doiya ko TEMENENO nggimal tuuno doi Israel miano, tukon bantile, “Yaku lapamo parentahkene nabangsa nia nambumbu sulano nataanio koperjanjian doi Yaku tukon yanila. Bai nabangsa nia akiyenggene doperjanjianoo; yanila lumbaiyo Daku parentah.

²¹Diabudodoo aki Kuiyase koidan mosiikayo indeemo kobangsano koidan modaano nai tano nia salataa Yosua mate.

²²Yaku naikon pakeyo dobangsa-bangsadoo sulano Kuudio kobangsa Israel, sulano Kutoiyo oilakai ko Israel miano yase mololoi Daku parentah-parentah buno tumbunoila, kai aki.”

²³Tobikon doiya ko TEMENENO aki nabeena Yosua manaangan luwedoi bangsa-bangsadoo. Konakabalikan ko TEMENENO batadikene yanila nadungol doi tanodoo, tukon aki mosobit siikayo yanila.