Read Banggai TANO-TANO 20 Bible Online

TANO-TANO 20 - Banggai bible

TANO-TANO 20

¹Maka sasaibino ko Israel miano lubat luwedoi Dan doi Lembet polong doi Bersyeba doi lalom, tukon Gilead doi tolopot, sulano napoo tapaatiyo doponguangoo. Yanila pototongi tukon pomeenggon doi Mizpa doi TEMENENO salaano.

²Sasaibino daano ko 400.000 kosuludadu moluwedoi pasukan mo ampakon aiai. Kokatua-katua moluwedoi sasamba ko Israel miano benseno lubat koidan indaa.

³Daanoon mobuno doiya ko Benyamin benseno miano lengelemo baikon sasaibino ko Israel miano bailon lapamo pototongi doi Mizpa. Maka ko Israel miano masadaikene do Lewi mianodoo kona boloki piala mo inakate, “Soba salitayo doi kami bulaando dokulokisanoo natealian!” Lewi mianodoo timbiliyo, “Yaku tukon kuboloki piala sampu doi Gibea Benyamin nawilayah tukon bamoolokon indaa.

⁴

⁵Lapadoiya ko Gibea miano lubat doi tempo popook tuuk mounggoliiyo yaku. Yanila lobosio daku bonua bamoolokonan tukon maksud tuuk moakateo yaku, bai doibundu yanila pakeo daku boloki piala pomatekon.

⁶Maka yaku alayo kobajano maka kupoto-potolio doibundu yana kapatuwo doi songulo lua kobenseno doi nda bangsa lalomo. Sue-suele meeng kopatolo. Yaku lakukene dolanggedoo sabab ko Gibea mianodoo lapamo lakukene komeeng kolobo molokis tukon akamaayo doi antara Israel miano.

⁷Komuyu sasaibino modaano dimbaa daanoon Israel miano. Jadi diabudodoo yaku kabiyo potimbongiiyo!”

⁸Tukon posinggat komian mopototongi doi tampatoo kokondong tukon bantile, “Kita sasaibino akiyo naikon komo mule doi nasandung kai doi nabonua.

⁹Naiyamo naikon konda linakukanggon: Kita undio sulano nda tantukanggene komiano mo sio nalobosio ko Gibea.

¹⁰Soobos doi songulo koobos luwedoi sasaibino ko Israel mala-malaneno sio nasadiayo kokinaan mo tuuk doi yanila momolobosi. Kobailon taus molobosiyo ko Gibea tuuk ukume yanila sabab kokulokisan molapamo yanila lakukanggene motuuk doi Israel miano.”

¹¹Bunomo doiyakai ko Israel miano napomeenggonan molobosiyo ko Gibea.

¹²Salataa lapa doiya ko Israel miano mobintokon mian badaang posaapon ko Benyamin benseno nawilayah sulano napelenggene nabilita nia: “Kulokisan oila komo teali doi komuyu?

¹³Salakanggenemo domian-mianoo molokis luwedoi Gibea doi kami sulano mai akateo yanila tukon buno doiya ikami akabuse dokulokisanoo doi Israel tanga-tangano.” Bai ko Benyamin miano aki napopusinggon ko Israel miano bailonggon nabantilan.

¹⁴Bai luwedoi sasaibino kokota doi Benyamin nawilayahdoo ko Benyamin miano lubat doi Gibea sulano nalobosio ko Israel miano bailonggon.

¹⁵Oloyodoo yanila pototongi luwedoi napoo kota-kota konakadaang 26.000 kosuludadu. Tukon sangalaasan doiya koidan ko Gibea tumbuno susuungodoo lapamo pototongikene ko 700 komian moililik. Sasaibino domianoo bobo mo pandoi doi langge malambitonan batu tukon pake alos. Kalu yanila masakukon batu tukon pake alos, akiyo komo sala soisik.

¹⁶

¹⁷Doi Israel miano bailonggon lapamo pototongi ko 400.000 konakadaang kosuludadu mo linatimo.

¹⁸Ko Israel miano nasuludadu taus doi Betel doi bonua kaledaan, tukon masadai doi Mian Bisa, “Oh TEMENENO, indeekai kobenseno luwedoi kami nia komo tumbe-tumbeno sio nataus lobosio ko Benyamin miano?” Ko TEMENENO timbiliyo, “Yehuda benseno.”

¹⁹Modoa dodoa yanila lenggeto tukon basandung loolani kokota Gibea.

²⁰Yanila atule kona barisan polobosi posasalaan tukon dokotadoo, maka yanila lobosio.

²¹Maka Benyamin nasuludadu polobosi sumbut molobosi koidan tukon mangakate 22.000 ko Israel nasuludadu doi oloyodoo koidan.

²²Sabab nakalaanoo, ko Israel miano tauso doi bonua kaledaan maka kokiil indaa doi TEMENENO sampe popook. Yanila masadai, “TEMENENO siokai mai taus koidan lobosio komai utus-utus do Benyamin mianodoo?” Ko TEMENENO timbiliyo, “Oode, tausokai.” Tobikon doiya ko Israel nasuludadu tealimo barani koidan, tobikon yanila abali moatule konapoo pasukan buno doi oloyodoo tumbeno.

²³

²⁴Tuuk koluano luunggon yanila taus molobosiyo ko Benyamin nasuludadu polobosidoo.

²⁵Tukon tuuk koluano luunggon koidan do Benyaminoo miano tobuat momolobosi. Idan nia yanila mangakate 18.000 kosuludadu-suludadu molinatimo luwedoi Israel miano nasuludadu polobosi.

²⁶Maka tauso koidan ko Israel miano doi Betel tukon kokiil doi TEMENENO. Indaa yanila apata sampe popook tukon mososubakon sosubakon podamean tukon sosubakon mosinua doi TEMENENO.

²⁷Doi tempodoo ko Mian Bisa na Peti Perjanjian daano doi Betel, tukon Pinehas Eleazar napau, Harun natumbu, balimang salaku imam. Maka ko Israel miano masadaimo doi TEMENENO, “TEMENENO, kai sio mai taus koidan molobosiyo komai utus-utus do Benyamin mianodoo, kai sio mai atadeyo napolobosian nia?” Ko TEMENENO timbiliyo, “Lobosiomo yanila! Namodoa yaku naikon beekene komanaangan doi komuyu.”

²⁸

²⁹Salataa lengele ko TEMENENO napotimbilidoo, Ko Israel mianodoo atulemo konapoo suludadu doi lipu-lipu motosookon doi napokoolanian ko Gibea.

³⁰Maka doi oloyo kotoluno yanila lobosio ko Benyamin nasuludadu polobosi tukon napoo aturano konapoo suludadu mo sasalaane ko Gibea pokakana komo lapamo yanila lakukanggene doi oloyo-oloyo mo akiyoon napoo molobosi.

³¹Ko Benyamin mianodoo lubotiio tukon lobosio koidan, tukon tongokolii sulano natobuat luwedoi kotadoo. Bunomo komo lapa-lapamo, yanila tambuuno moakateo ko Israel miano doi lipu momadialan doi kota tonggulungo doi loloon mololoiyo ko Betel tukon loloon mololoiyo ko Gibea. Tolu kolono ko Israel miano mo tangakate.

³²Tobikon doiya ko Benyamin miano aanggene yanila lungguiyomo do Israel mianodoo koidan buno doi tumbeno. Bai ko Israel nasuludadu lapamo pomeenggon pikilan tuuk bangabalinggon sulano naokoliiyo do Benyamin nasuludadudoo nataus doi loloon-loloon babasal, odoon luwedoi kota.

³³Salataa ko Israel napasukan tuuno bangabalinggon tukon atule koidan konabarisan doi Baal-Tamar, konapoo mian mo badaang moinatul doi napololanikonan ko Gibea, mosobit sumbut luwedoi napoo lipu-lipu sapitan doi kota lipuno tonggulungo.

³⁴Yaniladoo mian motolilik luwedoi sasaibino ko Israel; konakadaang 10.000 komian. Tealimokai kopolobosian mohebat salataa 10.000 domianoo lobosio ko Gibea. Ko Benyamin namian daango aki naanggene yanila baikon akimo namalumbit koidan naikon kalahmo.

³⁵Ko TEMENENO beena manaang ko Israel miano luwedoi Benyamin miano, tobikon doi oloyodoo ko Israel miano mangakate 25.100 komian ko Benyamin nasuludadu.

³⁶Sododoiya ko Benyamin miano maka natoiyo baikon yanila kalahmo. Ko Israel napasukan mobarani tuuno tukon sangadaiyo dampasene kobutongo doi Benyamin miano sabab yanila balaanggene konapoo suludadu mo sapit doi napoo lipu sapitan doi napoololanikonan ko Gibea.

³⁷Komian badaang mosapit mosoi-sobit usok lobosio ko Gibea; yanila sasabul doiyayaa doi kota lalomo tukon akateo sasaibino komian idoo.

³⁸Bai yanila lapamo pomeenggon loluk baikon kalu daano kotibolung mo kobung doi dapang luwedoi kota-kotadoo tanga-tangano,

³⁹kopasukan mobukuan yanila undur tukon abali koidan mosarange komusuh. Doi tempodoo ko Benyamin mianno mangakatemo 30 ko Israel miano nasuludadu, tobikon doiya yanila anggene baikon lungguiyomo ko Israel mianno koidan pokakana doi tumbeno.

⁴⁰Bai sosinggot tambuuno mokobung kotibolung doi dapang luwedoi kota Gibea tanga-tangano. Ko Benyamin miano pongginggikon salataa yanila mbaleng tukon kitayo posaapon konapoo kota tosuamo.

⁴¹Tukon doi tempodoo koidan ko Israel napasukan mobarani tuuno abali momolobosi, tobikon ko Benyamin nasuludadudoo teali pusing sabab yanila toiyomo baikon yanila naikon tantumo mo kalah.

⁴²Jadi, yanila dampasene ko Israel miano pakatuuwo kopadang bone lipuno, bai yanila aki napoo luput, yanila tokulungo doi antara Israel nasuludadu mobarani tuuno tukon suludadu doi tempodoo mo sodo lubat luwedoi kota. Ko Benyamin miano toupiyomo kokalaan mo hebat tuuno.

⁴³Ko Israel miano lobosioyomo tukon lelenggene yanila bangga-banggadudul polong doi meeng kolipu taikon tolopot ko Gibea. Daano mololonggon, yanila mangakate

⁴⁴18.000 kosuludadu molapamo linati luwedoi Benyamin nasuludadu polobosi.

⁴⁵Ko Benyamin nasuludadu bailon abali maka dampas liise kopadang bone lipuno pakatuuwo kobunggul-bunggul batu doi Rimon. 5.000 komian doi yaniladoo komo inakate doi loloon tangano. Kobailonggon linolonggon banggadudul polong doi Gideon. Luwedoi mian-mianoo daano ko 2.000 komo inakate.

⁴⁶Jadi Benyamin nasuludadu moinakate oloyodoo daanoon 25.000 komian ko suludadu motambongan barani.

⁴⁷Bai doi antara yanila komo dampas liise kopadang bone lipuno pakatuuwo kobunggul-bunggul batu doi Rimon daano ko 600 komian komo luput. Yanila dungol doi Rimon sangkap kobituwon kona kalumbit.

⁴⁸Lapadoiya ko Israel miano abali koidan maka lobosio tukon akateo sasaibino ko Benyamin miano labi-labino - malane, boine, pau-pau tukon koidan iyayon. Sasaibino kokota doi lipudoo yanila suayo.