Read Banggai TANO-TANO 21 Bible Online

TANO-TANO 21 - Banggai bible

TANO-TANO 21

¹Doi tempo ko Israel miano napototongian doi Mizpa, yanila lapamo paladandi doi TEMENENO baikon akiyo komeeng komiankai mo luwedoi yanila naikon mopataikene konapau boine nateali Benyamin miano naboloki.

²Diabudodoo yanila taus doi Betel tukon osulang poloon konoano polong popook doi TEMENENO salaano. Yanila kokiil tukon nggeleamon,

³“Oh TEMENENO, Israel na Mian Bisa, bulaando nia sasaibino mo sio nateali? Ko Benyamin benseno daanokai meeng kobenseno doi mai bangsa moadukono kabus!”

⁴Modoakon kooloyono, dodoa tuuno, ko Israel miano mokokondong meeng kobalabaan idoo, maka sosubakene doi TEMENENO kososubakon mosinua tukon sosubakon podamean.

⁵Doibundu yanila ondosuuke ko bangsa Israel bense-benseno oilakai daano komo aki nataus pototongi mangadap TEMENENO doi Mizpa loluk. (Doi tempodoo yanila lapamo batotopi baikon komian mo aki naloingiyo koponguang ampakonan doi Mizpa sio nainukum mate.)

⁶Ko Israel miano seseange doi utus-utusoila Benyamin nabenseno; yanila bantile, “Oloyo nia Israel lapuso kobenseno meeng.

⁷Kita sio nda mokubai oila sulano ko Benyamin miano nia labino moola nadaano kona boloki, sabab kita lapamo batotopi doi TEMENENO baikon kita aki naikon ndapataikene konda pau-pau boine nateali Benyamin miano naboloki?”

⁸Maka yanila ondosuuke oilakai daano komeeng kotambuno luwedoi Israel miano benseno moaki nataus pototongi doi Mizpa. Tukon yanila malaat baikon luwedoi Yabes miano daango doi Gilead, akiyo komiankai komo taus doi Mizpa.

⁹Sabab, salataa pinalesa kobanggapi sambuno natinulisan tokita aki natalaat idoo komeeng komiankai moluwedoi Yabes.

¹⁰Tobikon doiya, komian daango mopototongi doi Beteloo makapatu 12.000 komian mobarani tuuno doi yaniladoo sulano naakateo sasamba ko Yabes miano, tongusokon koboine tukon pau-pau.

¹¹Yanila pinalentahkon sulano naakateo sasaibino komala-malane, tukon koidan samba koboine moosowaano.

¹²Maka doi yaniladoo mo dungol doi Yabesoo, yanila malaat 400 koboine moakiyoon naosowaan. Yanila babayo doboiboinedoo doi nabasandungan doi Silo motangabos doi tano Kanaan.

¹³Sasaibino ko Israel miano makapatu bito-bito doi Benyamin miano modaano doi bunggul-bunggul batu doi Rimon tuuk pobaasikene kopodamean.

¹⁴Tobikon doiya ko Benyamin miano daangodoo abali, maka ko Israel miano beekene doi yanila koboiboine mo luwedoi Yabes moakiyoon nainakatedoo. Bai doboiboinedoo nakadaang aki nasamba boloki ko Benyamin miano.

¹⁵Ko Israel miano tuong kona soyang doi Benyamin miano sabab ko TEMENENO lapamo poalaasene ko Israel miano bense-benseno napomeenggonan.

¹⁶Tobikon doiya kolakai-lakai mopototongi doi Beteloo bantile, “Doi Benyamin benseno lalomo akiyono koboine koidan. Bai, akiyo komokubaiyan; kita aki namoola pataikene konda pau-pauboine naosowaan tukon yanila, sabab kita lapamo batotopi baikon sasamba komian moluwedoi kita nia mopataikene kona pauboine naosowaan tukon meeng ko Benyamin miano! Jadi, oilakai komo sio nda lakukene tuuk doi yaniladoo labino nia sulano yanila namoola daano kona boloki koidan? Ina-inaikene naikon ko Israel nalapus komeeng luwedoi songulo luadoo kobenseno. Kita sio nda moumbolii loloon sulano Benyamin nabenseno namoola daano banggadudul kotulunan tukon tataap bakoonggukene sasaibino konabuta.”

¹⁹“Bunoniia,” yanila bantile, “daano komeeng kololoon, doiyamo doi tempo lamean sasamba kotaun tuuk TEMENENO doi Silo.” (Doi Silo nia tambikon lalom tangabos kokota Betel, tukon taalikon doi talise talaat ko Betel loloono babasal tausan doi Sikhem, sabeakai taalikon doi lembet tangabos ko Lebona kotano.)

²⁰Maka kolakai-lakai mopototongi doi Beteloo bantile doi Benyamin mianodoo labino, “Potauso sapit doi anggur asi-asino doi Silo,

²¹tukon bada-badagai idoo. Kalukai do Silodoo boi-boineno tobuat moosuleng polapakon dolameanoo sasamba kotaun tuuk doi TEMENENO, komuyu sio potobuat luwedoi anggur asi-asinodoo. Maka komuyu sue-suele sio pomalako meeng koboine luwedoi yaniladoo tukon podampasene doi Benyamin nalipu sulano potealikene muboloki.

²²Kalu kotamano kai utuso mala-malane lubat tukon tuntute yana, komuyu moola bantile, ‘Ikami kabiyo, batadikenemo yanila doi kami. Ikami aki mai lambase yanila doi polobosian lalomo. Tukon sabab komuyu aki pobeekene yanila doi kami, komuyu aki polumbaiyo koperjanjian, jadi aki posalah.’ ”

²³Maka ko Benyamin mianno daangodoo lakukanggene oila komo binantil doi yanila. Yanila sue-suele madampason meeng koboine luwedoi boi-boinedoo moosuleng doi Silo. Doibundu yanila abali doi napoo lipu susuungo tukon kekendenge koikoidan kona kota-kota maka tataapo indaa.

²⁴Ko Israel miano bailonggon lenggeto koidan. Yanila abali koikoidan doi napoo buta doi napoo lipudoo lalomo sue-suele, mokonoiyo kopuli tukon bense-benseno.

²⁵ Doi lounudoo akiyoon nadaano kotomundo doi Israel. Sasamba komian lakukene oila kona inaanggon kana.