Read Banggai TANO-TANO 3 Bible Online

TANO-TANO 3 - Banggai bible

TANO-TANO 3

¹Tuuk ujiano ko Israel miano moaki nabiasa motoupi polobosian doi Kanaan, TEMENENO sodiikenemo bubula kobangsa modungol doi tanodoo.

²Ko TEMENENO lakukene doiya tolongo kona maksud otunggule sasamba kotabo Israel doi polobosian, komo inutamakon yanila moakiyoon nabiasa malaing polobosi.

³Kobangsa-bangsa moanoon modungol doi tanodoo doiyamo: bangsa modungol doi lima ko Filistin kotano lalomo, sasaibino kobangsa Kanaan, bangsa Sidon, tukon bangsa Hewi mo dungol doi Libanon bunggulo, kona tambuunan luwedoi Baal-Hermon bunggulo polong doi loloon mololoiyo ko Hamat.

⁴Yanila daano indaa sulano nateali batu udian doi bangsa Israel. Tukon bunodoiya moola natinoi oilakai kobangsa Israel tulutiyo koparentah-parentah mo lapamo TEMENENO beekene doi tumbunoila luwe Musa.

⁵Doiyamo kosababpo ko Kanaan miano, Hef, Amori, Feris, Hewi, tukon Yebus tataap podungoli tukon Israel miano doi tanodoo.

⁶Ko Israel miano pokila-kilamo tukon dobangsa-bangsadoo, tukon malaingo mososubaiyo konapoo pilogot-pilogot.

⁷Ko Israel miano baladosamo doi TEMENENO, napoo Mian Bisa, yanila toliminggenemo doi Yana tobikon doiya yanila bakaleda doi pilogot-pilogot Baal tukon Asyera.

⁸Maka ko TEMENENO nggimoliiyo doi Israel miano, tukon batadikene kotomundo Kusyan-Lisyataim mo luwedoi Mesopotamia nalungguiyo yanila. Alu kataun konakalumbit dotomundodoo nakuasaiyano yanila.

⁹Doibundu ko Israel miano uang makabi tulung doi TEMENENO, maka ko TEMENENO utuse Otniel sulano naolupute yanila. (Otniel doiyamo Kenas napau, Kaleb utuso pioto.)

¹⁰Ko TEMENENO Na Roh kuasaiyo Otniel tobikon yana teali mokatuaiyo ko Israel miano. Yana taus polobosi, maka ko TEMENENO beena kamanaangan doi yana doi tomundo Mesopotamia.

¹¹Maka amano dotanodoo sangkap kolono kotaun konakalumbit. Doibundu Otniel matemo.

¹²Ko Israel miano baladosamo koidan doi TEMENENO, tobikon TEMENENO kubaiyo Eglon, tomundo Moab, teali lobian konabukuanan doi Israel.

¹³Tomundo Eglon pomeenggon tukon bangsa Amon tukon Amalek, maka lungguiyo ko Israel miano, tukon doibundu lambase ko Yerikho, dokota kurmadoo.

¹⁴Songulo alu kotaun konakalumbit ko Israel miano Eglon nakuasaiyano.

¹⁵Bai salataa ko Israel miano uang mangkabi tulung doi TEMENENO, Yana utuse Ehud sulano naolupute yanila. Ehud meeng komian mo bobo; yana Gela napau luwedoi Benyamin nabenseno, tukon yanamo komo biasa antekene kolulu doi Tomundo Eglon mo sio Israel miano nabeale.

¹⁶Doi meeng kooloyo Ehud mokubai meeng kosabel mo lua komangano konakobulus kabi sembeleng kometer. Yana salunggene dosabelloo doi oako tambikon doi bakalinga doi nakalambi lalomo,

¹⁷maka taus salakanggene kolulu moluwedoi Israel miano doi Tomundo Eglon. Dotomundodoo malanak tuuno.

¹⁸Lapa salakanggene doluludoo, Ehud sumboliiyo komian-mian motanggunge dodoy mosonidoo namule.

¹⁹Bai Ehud susuungo tade salataa polong doi batu-batu mobinotik loolani ko Gilgal, maka abali doi Eglon. Doi tempodoo Eglon daano doi nakombiang mo memel taalikon doi babo doi kamali. Ehud bantile doi Eglon, “Sosa konda tinoli! Ata babayo kobilita laasia tuuk konda tinooli.” Maka tomundo bantile, “Totiili looluk” maka yana palentahkene sasaibino koata sulano natobuat tukon tinggale yana tukon Ehud basusuunganggon. Doibundu, Ehud koolaniyo tomundo modaano moosulang, maka bantile, “Daano kobilita mo luwedoi Mian Bisa tuuk doi nda tinooli!” Salataa lengele doiya, dotomundodoo kokondong.

²¹Banggadudul Ehud kibute konasabel tukon limano bobono luwedoi oako bakalinga, maka tebekene tatamon tuuno doi tomundo tiano lalomo. Popupuson dosabelloo mangano polong doi pulunokai usok doi tomundodoo tiano inak-inakko lalomo, tadul polong tonggulung. Ehud batadikene dosabeloo idoo,

²³maka tobuat tukon tutupe maka supate dokombiangoo tataapono,

²⁴doibundu yana taus. Salataa sasaibino tomundo naata-ata lubat tukon laate dokombiangoo tataapon-tataapono mo tosupat, yanila anggene dotomundodoo daano doi lalom tukon daanoon moteme.

²⁵Salataa malumbito konapoo totiiliyano tukon dotomundodoo akimo koidan nabukayo kotataapon, yanila pusingo maka mangala posupat tataapon tukon bukayo dotataaponoo. Tokita doi yanila donapoo tomundo mate tetelengan doi soaan.

²⁶Daanoon yanila momoto-mototiili, Ehud dampasenemo kobutongo doi Seira liise kobatu-batu mobinotik.

²⁷Mosoisobit salataa polong doi Efraim lipuno bunggulo, yana puuke kopopuukon tuuk uange ko Israel miano napolobosi. Yanila lubat maka yana katuaiyo yanila obulus luwedoi lipudoo mobunggukon.

²⁸“Laingaku,” konabantilano doi yanila, “TEMENENO lapamo lungguiyo ko Moab miano, dopoomusuhdoo.” Maka luwedoi Ehud nakatuaiyano, tokolumokai ko Israel mianodoo moluwedoi bunggul-bunggulloo. Yanila lambase ko Moab miano nalipu pintosiiano ko Yordan Paisunobatango. Akiyo komeeng komian mo luwedoi musuhdoo mopinataikon napintas tukon salamat.

²⁹Doi polobosianoo lalomo yanila mangakate uga-ugaate songulo koloon ko Moab nasuludadu motalengaon; akiyo komeeng mo tubo.

³⁰Doi oloyodoo ko Israel miano lungguiyomo ko Moab miano, maka dotanodoo amano alu kolono kotaun kona kalumbit.

³¹Komo katuaiyo koikoidan doiyamo Samgar Anat napau yana koidan kakaate tukon olupute ko Israel miano. Tukon tongkat posiing saapi, yana mangakate noom kosakato ko Filistin miano.