Read Banggai TANO-TANO 5 Bible Online

TANO-TANO 5 - Banggai bible

TANO-TANO 5

¹Doi oloyodoo Debora mananimo tukon Balak Abinoam napau. Buno naiya konabantilano:

²Nggaale ko TEMENENO, sabab ko Israel natalenga-talenga lapamo pomeenggon niat, sulano napoberjuang tukon korayat yase motaus polobosi.

³Ndongoliiyo he sasaibino kotomundo tukon mo wakiliyo kotomundo, yaku manani tuuk doi Israel miano na Mian Bisa, doiyamo TEMENENO.

⁴Salataa Ikoo lengget luwedoi Seir, oh TEMENENO, tukon Edom lipuno Ikoo tinggalemo, lolondong kobuta, kotimbu sausalulanokai tobuka, tukon bunom-bunom kundange kopaisono.

⁵ Kobunggul-bunggul tounggot doi mokuasaiyo ko Sinai salaano, doi TEMENENO salaano, Israel miano na Mian Bisa.

⁶Doi Samgar nalounu, Anat napau, tukon doi Yael nalounu koidan, akiyo komian mo baobsi doi tanodoo, akiyo komian mo dombaa-dumbulo doi loloon babasal.

⁷Ko Israel Nakota-kota akiyo komo dungoliyo, kiis kolipu tobikon ikoo lubat, Debora; ikoo lubat buno boloki mosineang.

⁸Salataa ko Israel miano tambuuno mososubaiyo kopilogot, tealimo kopolobosian doi napootanodoo; daano kosanggapo polono koloon konapoo talenga; akiyo komeeng komiankai komo binggate konasinapan.

⁹Doi sasaibino ko Israel miano natalenga kapalano mo yase usekene kobutongo tukon sanaang, kupelenggene daku pongodotii mobisa-bisa tuuno. Nggaale ko TEMENENO!

¹⁰Eh komuyu momolokiti keledai mo moute, komuyu moosulang doi permadani bunggono, tukon komuyu sasaibino mo ampakon ai-ai, popopitoikene na komanaangan nia salita no!

¹¹Doi loolanian kobubung tololongol kona lamean komian moosulen basalitakene ulang-ulang ko TEMENENO namanaangan, Israel nakamanaangan, TEMENENO namian. Maka yanila bariso ombokoniio kokota tataapono mo babasal.

¹²Kokondongokai Debora, tukon mananimo. Banguno kai Barak, labamokai sasaibino komian mo tinaan!

¹³Kotalenga labino lubat doi nakatua, yanila lubat, tukon batotobo sulano napo berjuang tuuk doi yana.

¹⁴Yanila ampakon luwedoi Efraim taus doi pepelakon, tuunduwo Benyamin napasukan mo baris doi salaanoila. Luwedoi Makhir lubatokai sasaibino konatalenga, tukon luwedoi Zebulon luwe sasaibino kosuludadu kapalano.

¹⁵Sasaibino Isakhar nakatua lubat polaing Debora, oode, Isakhar lubat, tukon Barak malaing koidan; yanila tuunduwo yana motokoluyo kopeak. Bai Ruben nabenseno aki namoola tantukanggene konasikap sabab doi yaniladoo akiyo konatalaatan kopomeenggonan bantilan.

¹⁶Bulaando yanila mo podungoli kodomba-domba? Oilakai sulano napondongoliiyo kopadagai mo uange kona iyayon dinagai? Takainomo Ruben nabenseno aki namoola tantukanggene konasikap sabab doi yaniladoo aki natalaat kopomeenggonan bantilan.

¹⁷Zebulon tukon Naftali daanoon mo kakaate tuuno doi polobosian lalomo, Dan nabenseno tataap dungol doi kapal, tukon Gad nabenseno tataap dungol doi Yordan, taalikon doi tolopot, baikai Asyer benseno tana-tanaang tukon aki naiyase biyol luwedoi yanila natampat popupuson kokota bibilo.

¹⁹Doi Taanakh, loolani kopaisubatango doi Megido, kotomundo-tomundo polobosi, kotomundo-tomundo Kanaan kakaate, bai yanila aki namababa suasa salaku nalangge linambas.

²⁰Kobituwon-bituwon pauno talalaing koidan mokakaate molawane Sisera, luwedoi napoolipu ambakonan doi dapang.

²¹Ko Kisyon Paisunobatango todu-toduap lalinge komusuh. Maju, majumo tukon barani, oh butonggu!

²²Tukon nasuutanan koadalan bulungano koadalan palalaino polokotino moosinggaange.

²³“Kutukemo ko Meros, tukon kotumbuno,” ko TEMENENO Namalaekat nabantilano, “sabab yanila aki nalubat mebee potombonii salaku talenga mo kakaate tuuk doi TEMENENO.”

²⁴Untungokai Yael, Heber naboloki Keni miano; luwedoi sasaibino dosandungoo tumbuno, yanamo komo binalakaati tuuno.

²⁵Sisera makabi paisu, bai yana beena susu doi yana, yana beena susu doi mangkuk lalomo mo pantas tuuk doi tomundo-tomundo.

²⁶Tukon papasok maka martelu doi limano Yael umbase Sisera sampe manas kooluno.

²⁷Doi Yael aino yana tolubang aki naansaang tengetelengan doi buta laatemo konamatean.

²⁸Luwedoi lolombong angato Sisera naboloki mbaleng, tukon bantile, “Bulaandokai konakereta, mo akimo nalubat, bulaando moakimo natololongol kona adalan aino nabulunganan doi buta?”

²⁹Komodoi bundu luwedoi napeleleanidoo mebee potimbili molapamo tantukanggene susuungo doi noano lalomo:

³⁰“Yanila daano moebe-ebese kolangge-langge mo linambas, tuuk sasamba kosuludadu, meeng, kai lua kopau boine. Tuuk doi Sisera, konaobos kalambi mo maaling koolino, tuuk tomundo naboloki, salendang mosinuji mobadang kobotiko.”

³¹Boliisi Komu musu-musu, oh TEMENENO, namate buno Sisera, bai sasaibino Komu sobat natambongan monondok bunokai oloyo panano doi dapang! Sambuno lapa doiya monondoko dotanodoo sangkap kolono kotaun konakalumbit.