Read Banggai TANO-TANO 6 Bible Online

TANO-TANO 6 - Banggai bible

TANO-TANO 6

¹Ko Israel miano mokubai lalim koidan doi TEMENENO, tobikon doiya Yana batadikenemo kobangsa Midian nakuasaiyo yanila pitu kotaun konakalumbit.

²Ko Israel miano matakutene ko Midian miano, tobikon yanila sapit doi leng-leng lalomo tukon doi tampat-tampat bailon mo aman doi bunggul-bunggul.

³Tosuungi koidan doi tempo ko Israel miano mo kanggi nabapidokan, ko Midian miano lubat polaing-laing ko Amalek miano tukon komian-mian bailon mo luwedoi padang bone lobosio ko Israel miano.

⁴Yanila basandung doi Israel miano nalipu tukon manase sasaibino komo sinakakon indaa polong doi Gaza lipuno potikunggon taalikon lembet, tukon koidan ko Israel miano nadomba mo piniala, nasapi tukon nakeledai dinambasono akiyonokai komeeng konapoo tininggal tobikon doiya ko Israel miano akiyono konapoo kinaan maunabaino soisik.

⁵Domian-mianoo lubat potuundu tukon kanggiyo konapoo iyayon piniala tukon napoosandung lolongguno mo badaang tuuno koaito. Yanila tukon napoo unta-unta mo todudul badaang tobikon doiya akimo namoola inait. Yanila lubat momanase dotanodoo,

⁶tukon ko Israel miano akimo natoiyo oila konapoo kinubai tuuk doi yanila.

⁷Doibundu ko Israel miano uang kabiyo doi TEMENENO natulungiyo yanila molawane ko Midian miano.

⁸TEMENENO binetekene komeeng konabii doi yanila. Donabidoo bantile, “Bunonaiyamo ko TEMENENO nabantilano, ko Israel na Mian Bisa: ‘Yaku lapamo olupute komuyu doi Mesir.

⁹Komuyu lapamo kusalamatene luwedoi Mesir miano tukon luwedoi mian-mian naitanonia molobosiyo komuyu. Lapamo kusiikayo yanila luwe nai tano nia doi tempo polobosiano yanila, tukon Yaku beekene konabuta doi komuyu.

¹⁰Lapamo kubantile doi komuyu baikon Yakumo ko TEMENENO mu Mian Bisa, tukon baikon komuyu aki namoola sosubaiyo kobangsa Amori napilogot-pilogot konapoo lipu komuyu modungoliyo budodoiya nia. Bai komuyu aki poloingiyo Daku palentah.’ ”

¹¹Daano kooloyo meeng ko TEMENENO namalaekat lubat doi kota Ofra, maka osulang doi kayung telpentin suukano, Yoas kotumbuno, meeng komian moluwedoi golongan Abiezer pulino. Konapau mosinombuikon Gideon daanoon momopintal gandum doi tampat bapiisan anggur. Yana lakukene doiya tukon seseekene sulano ko Midian miano naaki nakitayo.

¹²Ko TEMENENO namalaekatoo okitakene kobutongo doi yana, tukon bantile, “He, pamudanokon mobukuan! Ko TEMENENO loolainge ikoo!”

¹³Gideon timbiliyo, “Maaf, tuan! Kalu bisa ko TEMENENO moloolainge kami, bulaando sasaibino nalangge nia motepakami? Naandomokai sasaibino kolangge mo minasaindinggon mo biasa TEMENENO lakukene loolukoo tukon kotumbunggami mosalitayo bulaando kokaliangano ko TEMENENO natobuatanano yanila luwedoi Mesir? Diabudodoo ko TEMENENO tinggalemo ikami tukon batadikenemo ko Midian miano nakuasaiyo kami.”

¹⁴Doibundu ko TEMENENO beekene napalentah nia doi Gideon, “Tukon sasaibino komubukuanan tauso moolupute ko Israel miano luwedoi Midian miano nakakuasaan. Yakumo komo bitokonggon.”

¹⁵Gideon timbiliyo, “Bulaando moiyaku, TEMENENO? Naandokai konatealian yaku mo olupute ko Israel miano luwedoi Midian miano nakakuasaan. Doi Manasye nabenseno lalomo, pulinggumokai komo aki nabukuan. Tukon doi pulinggu lalomodoo yakumo koidan komo akiyo koanggano tuuno.”

¹⁶“Tantu ikoo moola!” TEMENENO bantile, “sabab Yakumokai naikon komo tomboniiyo ikoo. Ko Midian miano naikon moola ikoo akamanase tukon ambang tongo buno pokakana ko mu sasalaanano komeeng komian tolong.”

¹⁷Gideon timbiliyo, “Kalu bisa-bisa ko TEMENENO moiyase yaku, soba beenggu meeng kopaloosan baikon motutuu TEMENENO komo beekanaku dopalentahdoo doiyaku.

¹⁸Yaku kabiyo ko TEMENENO nasanaang totiili looluk naimbaa sulano kulapa masadia kinaan doi TEMENENO.” “Monondok,” TEMENENO timbiliyo, “Yaku naikon mototiili polong ikoo abali.”

¹⁹Maka mulemo Gideon tukon mokolot meeng kombembe mongula tukon saange kosailo tukon mangala songulo kokilogram kotarigu, boobus koidan mokubai loti mo akiyo ragino. Salataa lapa doiya dosailloo yana abese doi bois lalomo tukon bouluno doi paang lalomo, maka sasaibino doiya binaba tukon sinidokiikon doi TEMENENO namalaekat mo daano mototiili doi kayungo terpentin suukano.

²⁰Do TEMENENO doo namalaekat bantile, “Abesemo dosailloo tukon dolotidoo nai batunia bungguno maka mukundange dosailoo boulono doi bunggono.” Gideon lakukene oila komo pinalentahkon doi yana.

²¹Doi bundu do TEMENENO doo namalaekat ulule kolimano polaing-laing tukon kayung bunduno mo daano yana motaanio maka singgilikene dosailoo tukon dorotidoo. Dobatudoo kait maka mokopulo kabus dosailoo tukon dorotidoo. Sambuno lapa doiya domalaekatoo lemban.

²²Gideon toiyomo baikon domo lubatoo doi yana TEMENENO namalaekat susuungo. Maka tukon matakut bantile Gideon, “Silakamokai yaku, oh TEMENENO Moinakatandak Tuuno! Sabab yaku posasalaano tukon Mumalaekat.”

²³Bai ko TEMENENO bantile doi yana, “Tanaang! Inai momatakut. Ikoo aki naikon mumate.”

²⁴Maka Gideon kekendenge komeeng kobalabaan indaa tukon sombuikene, “Ko TEMENENO monondokan uuno.” Dobalabaanoo daano moanoon doi Ofra, doiyamo Abiezer miano nakota.

²⁵Doi popokoo ko TEMENENO beekene napalentah nia doi Gideon, “Alayo tamamu nasapi langgilo doiyamo sapi mo monondok mopitu kotaun konaumur. Manasemo tamamu nabalabaan kinokondong tuuk doi Baal, maka lubangemo kopilogot boine Asyera timbalango sudongo motaalikon doi balabaanoo sembeleng.

²⁶Kekendengemokai doi kayungo natalatambunan bunggono komeeng kobalabaan molapamo pinikikon tukon monondok. Doi bundu dosapi langgilodoo butongo, sio posuayo totubo salaku sosubakon motuuk doi TEMENENO. Pakeomo dopilogotoo boine Asyera timbalango sudongo mo lapamo ikoo lubange salaku kayung posuano.”

²⁷Maka Gideon molilik songulo konaata maka taus lakukene oila ko TEMENENO napinalentahkon doi yana. Bai sabab yana todudul matakutene kopulino tukon komian doi nakambungoo, yana aki nabarani lakukene dolanggedoo doi nadaanoan kooloyo. Jadi yana lakukene doi tempo napopookan.

²⁸Salataa dokotadoo tumbuno bangun dodowa soono yanila kitayo kobalabaan motuuk doi pilogot tukon kopilogot boine Asyera timbalango sudongo tolubango. Yanila kitayo koidan baikon doi tampatoo lapamo kinokondong komeeng kobalabaan tukon lapamo sinua koidan komeeng kosaapi langgilo salaku sosubakon.

²⁹Yanila posadaimo meeng tukon bailon, “Indeekai nakokubai naiya?” Salataa inondosuuk, yanila laate baikon Gideon Yoas napau komo lakukene.

³⁰Maka yanila bantile doi Yoas, “Mupaumo komo lomboyo kopilogot balabaano tukon komo lubange kopilogot boine Asyera timbalango doi balabaanoo sembeleng. Tobikon doiya, babayomo domupaudoo natobuat naimbaa yana sio namate!”

³¹Bai Yoas timbiliyo doi sasaibino komo tantaange yana, “Oilakai naikon komuyu ala doi pilogot tukon yase mobelayo yana? Indee komo ala doi yana, naikon inakate oloyo nia! Kalu kopilogot tutuu Mian Bisa, batadikenemo susuungo nabelayo kobutongo, sabab domo minanasoo nabalabaano.”

³²Sabab Yoas bantile, “Batadikenemo dopilogotoo susuungo nalawane Gideon, sabab yana lapamo manase kona balabaan,” maka singgatoo doiya komian sombuikene Gideon “Yerubaal.”

³³Doi tempodoo sasaibino ko Midian miano, Amalek tukon bangsa bailon nabense-benseno doi padang bone taikon tolopot doi Yordan lapamo pototongi. Yanila pintosiiyo ko Yordan Paisunobatango, tukon basandung doi Yizreel Peako.

³⁴Bai ko TEMENENO na Roh kuasaiyomo Gideon, sampe yana puuke kotolompet tuuk uange komian-mian motousokon Abiezel pulino sulano nalubat pomeenggon tukon yana.

³⁵Yana koidan makapatu bito-bito doi Asyer benseno; Zebulon, Naftali tukon Manasye nabenseno mau mo taalikon doi tolopot maukai mo taalikon doi talise ko Yordan Paisunobatango, sulano nakabiyo yanila napomeenggon tukon yana. Maka yanila sasaibino lubat tuuk motomboniiyo Gideon.

³⁶Maka Gideon bantile doi Mian Bisa, “TEMENENO, ikoo lapamo bantile baikon ikoo yase pakeyo yaku sulano kuolupute ko Israel miano.

³⁷Kalu bisa buno doiya, maka doi buta bunggono nia, lipu nabiasaan poalaasanano kogandum luwedoi kuwongo, tukon idoomo koidan kona tangabosan kodomba bulono mo lapamo yaku guntinge. Kalu namodoakon tolongo domba buluno nia tolong komo mbinetokii soiluk, tukon kobutano aki, maka doiyamokai kobuktiino baikon ikoo naikon pakeo yaku sulano kuolupute ko Israel miano.”

³⁸Maka tealimo bunodoiya: Salataa Gideon bangun dodoa soono tukon piise dodombadoo bullono, yana malaat paisu soiluk meeng komangkok.

³⁹Maka yana bantile doi Mian Bisa, “TEMENENO, inaikai monggimal kalu yaku basilingan koikoidan. Pataikanaku momokubai meeng kopalasobaan koidan, tukon nadomba bulunonia mo ginunting. Bai nakolualuunggono nia tokita nadomba nia buluno motataap motuul, baikai kobutano komo mbetak.”

⁴⁰Doi popookoo ko Mian Bisa lakukene oila Gideon nakinabidoo, tobikon modoakon dodoa soono domba bullonodoo tokita motuul, bai mbetako kobutano sabab kanakon soiluk.