Read Banggai TANO-TANO 7 Bible Online

TANO-TANO 7 - Banggai bible

TANO-TANO 7

¹Daano kooloyo meeng Gideon tukon sasaibino konasuludadu bangun dodoa tuuno. Yanila taus tukon basandung loolani ko Halod paisuno uuno. Ko Midian miano nabasandungan tangabos taalikon lembet luwedoi napoodungolan, doi peak loolani ko More bunggulo.

²Ko TEMENENO bantile doi Gideon, “Komu suludadu badaang tuuno. Yaku aki kuiyase beena kamanaangan doi yanila luwedoi Midian miano, sabab naikon yanila pikikene yanila manaang sabab napoo bukuanan susuungo, tobikon aki napoo nggaala-Ku.

³ Jadi popitoikenemo doi musuludadu, ‘Indee komo lasayo matakut, sio namoso-mosobit tinggale ko Gilead Bunggulo nia tukon abali doi nabonua.’ ” Maka daano kolua kolono lua koloon komian momule; tukon tolongo songulo koloon komo dungol.

⁴Maka TEMENENO bantile koidan doi Gideon, “Komu suludadu daano motodul badaang. Babayomo yanila doi paisubatango. Indaa Yaku naikon lilike yanila tuuk doikoo. Kalu Yaku bantile doikoo, ‘Namian nia sio nataus tukon ikoo,’ yana sio nataus. Bai kalu Yaku bantile, ‘Namian nia aki namoola taus tukon ikoo,’ yana aki namoola taus.”

⁵Maka Gideon babayo domian-mianoo doi paisubatango, maka ko TEMENENO bantile doi Gideon, “Komian mo dalepe kopaisu buno asu, sio mualaase luwedoi mian moladanggene kotuulo kalu namonginum paisu.”

⁶Maka daano kotolu kosakato komian mo dalepe kopaisu luwedoi limano; sasaibino kobailon ladanggene kotuulo kalu namonginum.

⁷Lapadoiya ko TEMENENO bantile doi Gideon, “Tukon tolu kosakato komian mo dalepe dopaisudoo, yaku naikon olupute komuyu tukon beekene komanaangan doi komuyu luwedoi Midian miano. Sumboliiyomo kobailonggon namule.”

⁸Tobikon doiya Gideon sumboliiyo sasaibino ko Israel miano bailon namule alaasene domo tolu kosakatodoo komian. Sasaibino komandu tukon popuukon inala luwedoi mian-mian mo muledoo. Ko Midian miano daanoon doi peak taalikon doi bilit ko Israel miano nabasandungan.

⁹Doi popookoo TEMENENO bantile doi Gideon, “Gideon, bangun! Tauso lobosio ko Midian miano nabasandungan. Yaku beekenemo komanaangan doi komuyu luwedoi yanila.

¹⁰Bai kalu ikoo matakut, tobiyo Pura, muatadoo nataus polaing-laing doi musuh nabasandungan.

¹¹Sio ikoo naikon komo mondongolii oila komusuh napinobatikonggon, tukon dolanggedoo naikon tealikene ikoo barani momolobosi.” Maka tauso Gideon tukon Pura doi musuh nabasandungan kalalatano.

¹²Ko Midian miano, tukon Amalek tukon mian-mian bailonggon mo luwedoi padang bone, tasabukono doiyayaa doi peakoo. Konatokitaan buno betek mo pototongi. Konapoo unta-unta badaang tuuno buno bone doi tobun bibilo.

¹³Salataa Gideon polong indaa, yana lengele memeeng komian mo daano mobasalitakene konaolumon doi tulano. Domianoo bantile bunonaiya, “Yaku olumonggene daano komeeng koroti mo tonggonggoling usok doi ndabasandungan maka naloloiyo komeeng kosandung. Dosandungoo tolubang sampe teali pomeseakon kobuta.”

¹⁴Kotulano timbiliyo, “Eh, doiya tantu Gideon nasabel Yoas napau, Israel mianodoo! Koalatino ko Mian Bisa lapamo beena kamanangan doi yana luwedoi Midian miano tukon sasaibino konda suludadu polobosi!”

¹⁵Salataa Gideon lengele domianoo naolumon kaliangano tukon alatino; yanakai totuku sosubaiyo ko Mian Bisa. Doibundu yana abali doi Israel nabasandungan tukon bantile, “Pobato-batotobomo! Ko TEMENENO beekenemo komanaangan doikoo luwedoi Midian nasuludadu polobosi!”

¹⁶Maka Gideon ebese tolu kosakato kona suludadu teali tolu kotambuno. Sasamba komian binee meeng kopopuukon tukon meeng koselekan koantoko posi.

¹⁷Gideon bantile doi yanila, “Kalu yaku polong doi Midian miano nabasandungan kalalatano, popalatikanggene oila daku kinubai, tukon polakukenemo oila daku linakukon.

¹⁸Kalukai yaku tukon kupasukan puukemo kopopuukon, komuyu lakon sio popuukemo kopoo popuukon. Maka komuyu siopoo wookon potikunggon dobasandunganoo, ‘Tuuk TEMENENO tukon tuuk Gideon!’ ”

¹⁹Loolanimo pintanga kopopook, Gideon tukon namian-mian polongo doi musuh nabasandungan kalalatano. Doi tempodoo komian mo dagaiyo dobasandunganoo, sodokai paisoboli mobadagai. Maka Gideon tukon napasukan puukemo kopopuukon tukon pasayomo konapoo selekan-selekan.

²⁰Lua kopasukan bailonggon mokubai buno doiya. Maka yanila sasaibino tidekene konapoo posi-posi tukon limano bobo, tukon puuke kopopuukon mo daano doi yanila limano bakalingano. Yanila wookon, “Sabel tuuk TEMENENO tukon tuuk Gideon!”

²¹Yanila sasaibino tataap kokondong suwe-suwele doi natampat potikunggon dobasandunganoo. Maka sasaibino komusuh nasuludadu polobosidoo obulen todu-toduwokon tukon nggele-nggeleamon.

²²Salataa Gideon tukon namian-mian daano mopuuke kona popuukon, ko TEMENENO kubaiyo komusuh nasuludadu polobosi paisoboli molobosi meeng tukon bailon tukon sabel. Yanila obulen taalikon doi Zerera polong pokakana kona odonan ko Bet-Sita tukon kota Abel-Mehola loolani ko Tabat.

²³Maka Naftali nabenseno, Asyer, tukon manasye nabenseno mau mo taalikon doi tolopot maukai mo taalikon doi talise ko Yordan Paisunobatango inuang koidan. Maka yanila lelenggene ko Midian nasuludadu.

²⁴Koidan posaapon ko Efraim lipuno bunggulo, Gideon makapatu bilita ponguang nia, “Maimo tokolu lobosiyo ko Midian miano. Palataanggene ko Yordan Paisunobatango tukon sasaibino kopaisu batango pauno polong doi Bet-Bara. Inai mopataikene ko Midian miano napintas luwe indaa.” Maka ko Efraim mian-miano binotokon, maka yanila palataanggene ko Yordan Paisunobatango tukon sasaibino kopaisu batango pauno polong doi Bet-Bara.

²⁵Lua kobangsa Midian paubakalingano, doiyamo Oreb tukon Zeeb yanila lakeo. Oreb inakate doi Batu Oreb tukon Zeeb inakate doi tampat papiisan anggur Zeeb. Efraim namian-mianoo banggadudul lelenggene ko Midian miano, maka babayo Oreb tukon Zeeb oluno doi Gideon taalikon doi tolopot ko Yordan.