Read Banggai TANO-TANO 8 Bible Online

TANO-TANO 8 - Banggai bible

TANO-TANO 8

¹Ko Efraim miano bantile doi Gideon, “Bulaando ikami moaki mai tinobi doi tempo muluwean tuuk molobosiyo ko Midian miano? Oila kosababpo ikoo mopalaluuwo ikami bunodoiya?” Bunomo doiya konapoo mondommukan motuuk doi Gideon.

²Bai Gideon timbiliyo, “Oila daku linakukon aki nabulaando koalatino kalukai pinokakanakon tukon oila komo lapamo komuyu lakukene. Maukai kopoo linakukon natongo soisik, bai domo kidikoo lobian modoon koanggano luwedoi sasaibino komo lapamo daku pasukan mondopulian lakukanggene.

³ Komuyumokai komo malaat kuasa moluwedoi Mian Bisa tobikon moola poakateo Oreb tukon Zeeb, do Midianoo miano mo lua paubakalingano! Kalu pinokakanakon tukon doiya, oilakai daku jasa?” Salataa Gideon bantile buno doiya, yanila akimo napoo nggimal koidan.

⁴Doi tempodoo Gideon tukon tolu kosakato kona suludadu polongo doi Yordan Paisunobatango sembeleng. Yanila pakadako tuuno bai daano mobanggadudul lelenggene komusuh.

⁵Doi bundu yanila polongo doi Sukot. Idoo Gideon bantile doi kota tumbuno, “Tulungiyomo beena daku suludadu soisik kokinaan, yanila pakadak tuuno bai kami daano molelenggene Zebah tukon Salmuna, tomundo-tomundo Midianoo.”

⁶Bai kokatua-katua doi Sukotoo timbiliyo, “Eh komuyu akiyoon polakoyo koidan Zebah tukon Salmuna, komuyu mangkabimo kinaan! Oila kona totuuk komu suludadu mo sio nabinee kinaan?”

⁷Maka Gideon bantile, “Monondoko! Totiiliyokai kalu ko TEMENENO beekanakumo komanaangan luwedoi Zebah tukon Salmuna, yaku naikon bobokiiyo komuyu tukon sonit tukon sonit mo luwedoi padang bone!”

⁸Doibundu Gideon banggadudukene konaampakonan maka polong doi Pnuel. Indaa koidan yana makabikene kinaan kona suludadu. Bai ko Pnuel miano timbiliyo pokakana tukon Sukot miano napotimbili.

⁹Tobikon doiya Gideon bantile doi yanila, “Totiiliyomo sio naikon kuabali tukon salamat. Tukon doi tempodoo yaku naikon lubange nakota nia namenala!”

¹⁰Doiya kosinggato Zebah tukon Salmuna tukon sasaibino konasuludadu daanoon modaano doi Karkor. Doi sasaibinodoo kopadang bone miano nasuludadu, uga-ugaate daanoon songulo lima koloon komian tolong komo totinggal; sakat lua kolono koloon konasuludadu matemo.

¹¹Gideon manisikiyo konapokalalatanan kopadang bone doi Hobab tukon Yogbeha taalikon tolopot maka lobosio komusuh tukon tongosinggaang.

¹²Zebah tukon Salmuna Midianoo natomundo mo lua buleng, bai Gideon lelenggene tukon lakoyo yanila, tukon sasaibino konapoo suludadu polobosi teali nggalanggabut.

¹³Doibundu luwedoi napoo ampakonan mule doi polobosian, Gideon mangala loloon mo loloiyo kotoliboan doi Heres.

¹⁴Idoo yana lakoyo komeeng kotabo-tabo mo luwedoi Sukot, maka yana sadaiyo domianoo tuuk doi sasaibino kokatua doi Sukot sambuno-sambuno. Maka domianoo tulisemo dosambu-sambunodoo maka beekene Gideon — sasaibino daano ko pitu kolono pitu komian sambuno.

¹⁵Lapadoiya Gideon taus mopososuung kokatua-katua doi kotadoo maka bantile, “Tantu komuyu daano moneneeke baikon komuyu mobiasa motolake doi potulungiyano yaku, sabab yaku akiyoon kulakoyo Zebah tukon Salmuna, bolikon? Komuyu aki yase beena kinaan doi suludadu, sabab doiya kosinggato yanila daano pakadak. Kitayo, naiya Zebah tukon Salmuna.”

¹⁶Lapa doiya Gideon mangala sonit tukon sonit mo luwedoi padang bone, maka bobokiiyo sasaibino dokota Sukotoo katua-katuano.

¹⁷Doi Pnuel yana lubange komenara tukon akateo sasaibino mala-malane doi kotadoo.

¹⁸Sambuno lapa doiya Gideon masadai doi Zebah tukon Salmuna, “Bulaando kondondoongo komian komuyu mo akateo doi Taborroo?” Zebah tukon Salmuna timbiliyo, “Yanila sasaibino buno ikoo, pokakana kobangsawan tulunano.”

¹⁹“Doiya utu-utusonggu — tinanggu napau-pau,” Gideon bantile. “Kalu andeno akipoo akateo yanila, yaku paladandi mate aki naikon kuakateo komuyu koidan.”

²⁰Maka Gideon bantile doi Yeter, napau langgongo, “Akateyomo yanila.” Bai Yetel daano motatabokon. Jadi yana matakut tobikon doiya yana aki nabubute konasabel tuuk moakateo.

²¹Zebah tukon Salmuna bantile doi Gideon, “Ayo, kalu ikoo mala-malane, akateyomo kami tukon limamu susuumu!” Maka Gideonkai akateyomo yanila tukon alayomo sasaibino ko mae-maenan modaano doi napoo unta bulungo.

²²Doibundu ko Israel miano bantile doi Gideon, “Ikoo oluputemo kami luwedoi Midin miano nakakuasaan. Tobikon doiya ikoo sio muteali mai katua — ikoo tukon muturunan.”

²³Gideon timbiliyo, “Aki, yaku aki naikon kuteali pokatua, mau kupaukai bai aki. TEMENENOkai komo katuaiyo komuyu.”

²⁴Bai doibundu Gideon bantile koidan, “Tolongo meeng daku kakabi; kosumbang komuyu molambase luwedoi musuh, siokai posalakanggene sasaibino doiyaku.” (Ko Midian miano biasa mapake sumbang mosoni; pokakana buno mian bailon mo dungol doi padang bone.)

²⁵“Monondok,” yanila timbiliyo, “tukon sanaang konoanggami naikon mobeekene doikoo.” Maka yanila beleatene komeeng kotoik patolo, doibundu sasamba komian lubat tukon abese idoo kosumbang mo lapamo yanila lambase luwedoi musuh.

²⁶Sasaibino dososubakonoo mosoni mo sinalakanggong doi Gideon doi tempodoo konakotoong kabi luakolono kokilogram, akiyoon natongusokon komae-maenan, inoon, toik manampal tomundo-tomundo Midian mo pakeo, tukon inoon mo talaat doi napoo unta-unta bulungo.

²⁷Luwedoi mosonidoo, Gideon mokubai meeng kopilogot timbalango, maka yana abese doi nakambung, doiyamo doi Ofra. Sasaibino ko Israel miano taus indaa sulano nasosubaiyo dopilogotoo timbalango, tobikon doiya yanila akimokai napopusinggon ko Mian Bisa. Tukon dolanggedoo tealimo talong doi Gideon tukon nakaluargaa.

²⁸Ko Midian miano akiyono konapoo kokuatan koidan; yanila Israel miano lungguiyomo. Maka amanokai dokotadoo sangkap kolono kotaun konakalumbit doi nadaanoan Gideon motubo.

²⁹Salataa lapa dopolobosianoo, Gideon abali doi kambung susuungo tukon dungol indaa.

³⁰Yana daano konapau mala-malaneno pitu kolono komian, sabab konaboloki badaang.

³¹Daano koidan konaboloki piala doi Sikhem, luwedoi naboloki piala nia yana malaat meeng kopau malaneno mo sinombuikon Abimelekh.

³²Salataa motuamo tuuno maka sodo Gideon Yoas napaudoo mate. Yana tinadin doi Yoas natinadinan, dotamanodoo. Dobatadinanoo konatangabosan doi Ofra, doiyamo Abiezer pulino nakota.

³³Salataa lapa Gideon mate, ko Israel miano akimo nasetia doi Mian Bisa. Yanila sosubaiyo kopilogot-pilogot Baal tukon tealikene ko Baal-Berit napoo pilogot.

³⁴Yanila akimo nabakaleda koidan doi Mian Bisa, napoo TEMENENO, mo lapamo oluputene yanila luwedoi sasaibino komusuh nakakuasaan doi potikunggon yanila.

³⁵Yanila koidan aki nabalase doi Gideon nakaluaraa nabudi luwedoi sasaibino Gideon najasa motuuk doi Israel miano.